សំណុំរឿងស្ត្រីម្នាក់ស្លា.ប់ក្នុងគ្លីនិកឯកជន ពេលនេះដល់ដៃតុលាការហើយ
ខេត្តកំពង់ចាម ៖ សំណុំរឿងក្តីរបស់ស្ត្រីម្នាក់វ័យ៥៩ឆ្នាំម្នាក់ដែលបានស្លា.ប់ក្នុងគ្លីនិកឯកមួយនៅថ្នល់បែកឃុំស្វាយទាប ស្រុកចំការលើ រយៈពេលជិត១ខែហើយ …
ខេត្តកំពង់ចាម ៖ សំណុំរឿងក្តីរបស់ស្ត្រីម្នាក់វ័យ៥៩ឆ្នាំម្នាក់ដែលបានស្លាប់ក្នុងគ្លីនិកឯកមួយនៅថ្នល់បែកឃុំស្វាយទាប ស្រុកចំការលើ រយៈពេលជិត១ខែហើយ ដោយភាគីរងគ្រោះកំពុងតែទាមរកយុត្តិធម៌ ចំណែកសមត្ថកិច្ចវិញក៏បានអះអាងថា សំណុំរឿងនេះគឺបានធ្លាក់ទៅដល់ស្ថាប័នសាលាដំបូងខេត្តហើយកំពុងតែមានចំណាត់ការតាមនិតិវិធីច្បាប់ ។
បុរសឈ្មោះ ខាត់ សុន អាយុ៥៩ឆ្នាំ រស់នៅភូមិរំចេក ឃុំតាប្រុក ស្រុកចំការលើ បានឲ្យដឹងនៅរសៀលថ្ងៃទី២៥ ខែតុលា ឆ្នាំ២០១៦ថា ដំបូងនៅពេលដែលប្រពន្ធរបស់គាត់មានសុខភាពមិនសូវល្អ ដោយការដកដង្ហើមរាងថប់ៗនោះ នៅវេលាម៉ោងប្រហែល៩ព្រឹក ថ្ងៃទី២៧ ខែកញ្ញា ឆ្នាំ២០១៦ ក៏បានដឹកតាមម៉ូតូមកកាន់ពេទ្យឯកជនក្នុងភូមិឲ្យគេពិនិត្យមើលដឹងថាមិនស្រួល ពេទ្យប្រាប់ឲ្យបញ្ជូនទៅពេទ្យនៅស្រុកចំការលើ រួចប្រញាប់ដឹកតាមរថយន្តទៅសម្រាកនៅគ្លីនិកឯកជនឈ្មោះ ពុទ្ធា ។
បុរសឈ្មោះ ខាត់ សុន ប្រាប់បន្តថា ក្នុងពេលដែលប្រពន្ធរបស់គាត់ឈ្មោះ ជួន អាន អាយុ៥៨ឆ្នាំ សម្រាកបាន២ថ្ងៃបានធូរស្រាលគ្រាន់បើ ហើយកូនស្រីម្នាក់របស់គាត់ឈ្មោះ សំនៀង ដែលរស់នៅរាជធានីភ្នំពេញបានមកសួរសុខទុក្ខមា្តយ ព្រមទាំងបាននិយាយជាមួយនឹងម្ចាស់គ្លីនិកថា លោកគ្រូមានសម្ភារគ្រប់គ្រាន់ដើម្បីមើលអ្នកជំងឺដែរ ឬទេ? ក្នុងពេលនោះគ្រូពេទ្យម្ចាស់គ្លីនិកបានអះអាងថា មានមិនស្អីនោះទេ ប្រើពេលព្យាបាលកន្លះខែលែងអីហើយ ។ ស្រាប់តែមកដល់ថ្ងៃទី២៩ ខែកញ្ញា ពេទ្យប្រុងឲ្យចាកចេញត្រឡប់ទៅផ្ទះវិញ តែនៅពេលដែលមកស្ទាបខ្លួនដឹងក្តៅ ក៏មិនទាន់អនុញ្ញាតឲ្យចេញទៅទេ គ្រូពេទ្យបានជួយបន្តោងសេរ៉ូមបន្ថែមទៀត ហើយប្រពន្ធរបស់គាត់ក៏បានទារឲ្យពេទ្យដាក់ខ្យល់អុកស៊ីសែន ព្រោះតែពិបាកនឹងដកដង្ហើមពេក ។
បុរសជាប្តីបន្តទៀតថា បន្ទាប់មកហូបបាយបានកន្លះប្រអប់ និងរាងមានកម្លាំងបន្តិច ពេលដែលគាត់(ប្តី)មើលទូរទស្សន៍ លុះពេលងាកមកមើលប្រពន្ធឃើញមានអាការៈដូចជាស្ទះដង្ហើម ក៏បានស្រែកហៅគ្រូពេទ្យឲ្យមកជួយសង្គ្រោះប្រឹងធ្វើចលនាបេះដូងដើម្បីឲ្យដើរវិញ តែនៅតែមិនដឹងខ្លួន រួចក៏បានលើកដាក់លើម៉ូតូដឹកមកសង្គ្រោះនៅមន្ទីរពេទ្យបង្អែកស្រុកចំការលើ ។
គាត់បានបញ្ជាក់ថា ប្រពន្ធគាត់គឺពិតជាបានស្លាប់នៅក្នុងគ្លីនិកខាងលើមែន សម្រាប់ចិត្តរបស់គាត់គឺចង់ឲ្យគ្រូពេទ្យសុំទោស និងទទួលស្គាល់ថា ប្រពន្ធគាត់ពិតជាបានស្លាប់ក្នុងគ្លីនិកនោះមែន ចំណែកចិត្តកូនស្រីឈ្មោះ សំនៀង វិញគឺចង់ឲ្យថ្នាក់លើបិទគ្លីនិកខាងលើតែម្តង ។
លោកវេជ្ជបណ្ឌិត តាន់ គឹមឆេង ប្រធានមន្ទីរពេទ្យបង្អែកស្រុកចំការលើ ឲ្យដឹងនៅព្រឹកថ្ងៃទី២៥ ខែតុលា ឆ្នាំ២០១៦ថា ស្ត្រីអ្នកជំងឺខាងលើមិនបានស្លាប់ក្នុងមន្ទីរពេទ្យបង្អែករបស់លោកនោះទេ ។
លោកវេជ្ជបណ្ឌិត អ៊ាក ឆាយ ប្រធានការិយាល័យសុខាភិបាលស្រុកប្រតិបត្តិការចំការលើ បានឲ្យដឹងថា សម្រាប់ករណីខាងលើនោះត្រូវបាននគរបាលស្រុកចំការលើបញ្ជូនឯកសារទៅដល់ព្រះរាជអាជ្ញាអមសាលាដំបូងខេត្តរួចរាល់ហើយដែរ ។
នាព្រឹកថ្ងៃទី២៦ ខែតុលា ឆ្នាំ២០១៦នេះ «កោះសន្តិភាព»បានព្យាយាមទូរស័ព្ទដើម្បីសុំការបំភ្លឺពីលោកវេជ្ជបណ្ឌិត គ្រួក ពុទ្ធា ម្ចាស់គ្លីនិកនោះដែរ តែទូរស័ព្ទចុចមិនចូលនោះទេ ៕
ចែករំលែកព័តមាននេះ