ស្ថាបនិកគេហទំព័រAlibaba លោកJack Ma បានជំរុញឲ្យមន្ត្រីរដ្ឋាភិបាលចិន ប្រើប្រាស់ទិន្នន័យឲ្យបានទូលំទូលាយថែមទៀតដើម្បីបញ្ឈប់បទល្មើសឧក្រិដ្ឋទាំងស្រុង ។
លោកMa បានបញ្ចេញទស្សនៈរបស់ខ្លួននៅពេលផ្តល់បទ
ស្ថាបនិកគេហទំព័រAlibaba លោកJack Ma បានជំរុញឲ្យមន្ត្រីរដ្ឋាភិបាលចិន ប្រើប្រាស់ទិន្នន័យឲ្យបានទូលំទូលាយថែមទៀតដើម្បីបញ្ឈប់បទល្មើសឧក្រិដ្ឋទាំងស្រុង ។
លោកMa បានបញ្ចេញទស្សនៈរបស់ខ្លួននៅពេលផ្តល់បទសម្ភាសន៍តាមទូរទស្សន៍នៅចំពោះមុខមន្ត្រីច្បាប់ និងមន្ត្រីសន្តិសុខផ្ទៃក្នុងប្រមាណជាង១,៥លាននាក់ ។ បើតាមសារព័ត៌មានBloomberg បន្ថែមថា សម្តីរបស់គាត់ត្រូវបានផ្សាយជាសាធារណៈលើWeChat របស់គណៈកម្មាធិការបក្សកុម្មុយនីស្ដចិន សម្រាប់កិច្ចការនយោបាយ និងច្បាប់ទៀតផង ។
សុន្ទរកថារបស់Ma បានសង្កត់ធ្ងន់ពីរបៀបប្រើប្រាស់ទិន្នន័យប្រកបដោយប្រសិទ្ធភាពក្នុងការបញ្ចៀសបទល្មើស ផ្សេងៗមុនពេលវាកើតឡើងដូចជាយុទ្ធសាស្ត្រប្រើប្រាស់ទិន្នន័យក្នុងការជួយអាជ្ញាធរតាមចាប់ភេរវករជាដើម ។ គាតបន្តថា ប្រសិនបើមានគេទិញនាឡិកា រំសេវ ឆ្នាំងអគ្គិសនីសម្ពាធខ្ពស់ ឬនៅក្នុងពេលតែមួយនោះ មានន័យថា វាជាសញ្ញាបញ្ជាក់ឲ្យដឹងមុនថាបុគ្គលម្នាក់នោះនឹងច្នៃគ្រាប់បែកយ៉ាងពិតប្រាកដ ។ មួយទៀតប្រសិនបើមានមនុស្សណាម្នាក់ប្រើប្រាស់ការបង់ប្រាក់តាមអេឡិចត្រូនិក សម្រាប់ជិះរថយន្តក្រុងច្រើនក្នុងមួយថ្ងៃអាចបញ្ជាក់ថា ម្នាក់នោះប្រហែលជាចោរលូកហោប៉ៅដែរ ។
កាលពីខែកក្កដា ឆ្នាំ២០១៥ ប្រទេសចិនបានចេញសេចក្តីព្រាងច្បាប់សុវត្ថិភាពអីុនធើរណេត(Cybersecurity Law) ដែលផ្តល់សិទ្ធិឲ្យរដ្ឋាភិបាលក្នុងការចូលយកទិន្នន័យនានាពីអ្នកប្រើប្រាស់អីុនធើរណេត ប្រសិនបើវាអាចនឹងប៉ះពាល់ដល់សន្តិសុខជាតិ ។ បន្ទាប់ពីចេញសេចក្តីព្រាងច្បាប់មករដ្ឋាភិបាលចិនគ្រោងនឹងចាប់ឲ្យមានមន្ត្រីប៉ូលិសប្រចាំការនៅគ្រប់ក្រុមហ៊ុនអីុនធើរណេតទាំងអស់ ដើម្បីឲ្យពួកគេអាចអនុវត្តច្បាប់ឲ្យកាន់តែមានប្រសិទ្ធភាព ។ នៅដំណាច់ឆ្នាំ២០១៥ ប្រទេសចិន បានអនុម័តច្បាប់ប្រឆាំងភេរវកម្មដែលតំរូវឲ្យបណ្តាលក្រុមហ៊ុន ឬអង្គភាពដែលប្រើប្រាស់សេវាអីុនធើរណេតទាំងអស់ រួមនឹងក្រុមហ៊ុនទូរគមនាគមន៍ទាំងឡាយត្រូវផ្តល់ការគាំទ្រផ្នែកបចេ្ចកវិទ្យា និងជំនួយការដល់រដ្ឋាភិបាលចិនក្នុងការស៊ើបអង្កេតទាក់ទង់នឹងភេរវកម្ម ។
លោកMa បញ្ជាក់ថា បណ្តាក្រុមហ៊ុនក្នុងស្រុកធំនាពេលនេះបានក្លាយជាផ្នែកមួយនៃប្រព័ន្ធការពារសន្តិសុខប្រឆាំងបទល្មើសឧក្រិដ្ឋតាមរយៈការចែករំលែកទិន្នន័យរបស់អ្នកប្រើប្រាស់ជាមួយរដ្ឋាភិបាល ។
តាមសារព័ត៌មានThe Wall Street Journal បានបង្កើតចម្ងល់ថាតើAlibaba នឹងសហការក្នុងការផ្តល់ទិន្នន័យរបស់អ្នកប្រើប្រាស់របស់លោកទៅរដ្ឋាភិបាលទេ? ខាងក្រុមហ៊ុនឆ្លើយតបថា នៅពេលនេះមិនទាន់ចែករំលែកទិន្នន័យអ្នកប្រើប្រាស់ជាមួយរដ្ឋាភិបាលទេ ដោយសារច្បាប់មិនតម្រូវឲ្យធ្វើ តែក្រុមហ៊ុនត្រូវតែផ្តល់ព័ត៌មាននៅពេលមានណាដែលមានច្បាប់តម្រូវឲ្យធ្វើ ៕
ចែករំលែកព័តមាននេះ