សារព័ត៌មានបរទេស កាលពីពេល ថ្មីៗកន្លងមកផ្សាយថា អង្គការស្រាអន្តរជាតិ (OIV) បានព្យាករពីផលិតផលស្រានៅទូទាំងពិភពលោកក្នុងឆ្នាំ២០១៦នេះថា មានប្រហែល២៥៩លានហិកតូលីត្រ ធ្លាក់ចុះបើគិតក្នុងរយៈពេលដូចគ្នា កាលពីឆ្នាំមុនចំនួន៥% និងចាត់ទុកថាជាកម្រិតទាបបំផុត នៃការផលិតស្រានៅលើពិភពលោកតាំងពីឆ្នាំ២០០០មក ។
«OIV» បានបង្ហាញពីទំនុកចិត្តថា មូលហេតុដែលធ្លាក់ចុះទាបនឹងមិនប៉ះពាល់ថ្លៃរបស់ស្រានៅលើទីផ្សារ ព្រោះអ្នកផលិតបានព្យាករពីស្ថានការណ៍ក្នុងរយៈពេលយូរមកហើយ និងមានស្តុកត្រៀមទប់ទល់នឹងផលប៉ះពាល់ពីធម្មជាតិ ។
បាតុភូតអាកាសធាតុក្តៅក្នុងឆ្នាំ២០១៦មានសភាពខ្លាំងក្លាបំផុតក្នុងអំឡុងពេលជាច្រើនទសវត្ស និងផ្តល់ផលប៉ះពាល់ដល់ឧស្សាហកម្មផលិតស្រារបស់ក្រុមប្រទេសនៅអាមេរិកឡាទីន ដោយផលិតផលស្រារបស់អាហ្សង់ទីនធ្លាក់ចុះដល់ទៅ៣៥% តាំងពីដើមឆ្នាំនៅសល់ត្រឹមតែ៨,៨លានហិកតូលីត្រ ធ្លាក់ពីចំណាត់ថ្នាក់ផលិតស្រាទី៥ នៅលើពិភពលោកស្ថិតក្នុងលំដាប់ទី៩ ។ ចំណែកស្រារបស់អាហ្វ្រិកខាងត្បូងធ្លាក់ចុះនៅសល់ទាបជាង១០លានហិកតូលីត្រក្នុងមួយឆ្នាំ ជាលើកដំបូងចាប់តាំងពីឆ្នាំ២០១១មក ។
«OIV» បានព្យាករថា នឹងស្ថិតនៅ៩,១លានហិកតូលីត្រនៅឆ្នាំនេះ ដោយធ្លាក់ចុះប្រហែល១៩,១% បើប្រៀបធៀបទៅនឹងរយៈពេលដូចគ្នានៃឆ្នាំមុន ។ ប្រទេសដែលមានផលិតផលស្រាច្រើនបំផុតនៅលើលោកក្នុងឆ្នាំ២០១៦ គឺប្រទេសអីុតាលី ព្រោះមានតួលេខ៤៨,៨លានហិកតូលីត្រ ស្ថិតនៅចំណាត់ថ្នាក់ទី១ ខណៈពេលបារាំងនៅលំដាប់ថ្នាក់ទី២ ៕
ចែករំលែកព័តមាននេះ