រាជធានីភ្នំពេញ ៖ នាងខ្ញុងលេចឮថា ផ្ទះដែលនាងស្នាក់នៅរាល់ថ្ងៃត្រូវម្ចាស់កម្មសិទ្ធិដកហូតវិញព្រោះតែខ្វែងពាក្យសម្តីគ្នា ។ នាងខ្ញុងទិញផ្ទះថ្មីមួួយភ្លាមធ្វើឱ្យគេកាន់តែជឿថានាងត្រូវបងស្រីធម៌នៅអូស្ត្រាលីដកហូត
រាជធានីភ្នំពេញ ៖ នាងខ្ញុងលេចឮថា ផ្ទះដែលនាងស្នាក់នៅរាល់ថ្ងៃត្រូវម្ចាស់កម្មសិទ្ធិដកហូតវិញព្រោះតែខ្វែងពាក្យសម្តីគ្នា ។ នាងខ្ញុងទិញផ្ទះថ្មីមួួយភ្លាមធ្វើឱ្យគេកាន់តែជឿថានាងត្រូវបងស្រីធម៌នៅអូស្ត្រាលីដកហូតផ្ទះនោះមែន ។
តារាកំប្លែងស្រីល្បីឈ្មោះនាងស្រេង សុកាន់ដា ហៅខ្ញុង កន្លងមកត្រូវបងស្រីធម៌នៅប្រទេសអូស្ត្រាលីប្រគល់ផ្ទះមួយឱ្យស្នាក់នៅ ។
អ្នកសិល្បៈបញ្ជាក់ថា ប៉ុន្មានខែចុងក្រោយនេះតារាកំប្លែងនាងខ្ញុងប្រឹង ប្រែងការងារសិល្បៈទ្វេឡើងដើម្បីខិតខំរកប្រាក់សង់ផ្ទះផ្ទាល់ខ្លួនដ្បិតបងស្រីធម៌នៅប្រទេសអូស្ត្រាលីដកហូតយកផ្ទះដែលផ្តល់ឱ្យស្នាក់នៅនោះវិញ។ ដោយសារទំនាស់ពាក្យសម្តីខ្លះ ទើបបងស្រីធម៌ដកយកផ្ទះដែលនាងខ្ញុងស្នាក់នៅជាមួយកូន និងក្រុមគ្រួសារអស់រយៈពេលជាង២ឆ្នាំនោះវិញ ។ បងស្រីធម៌ដែលជាម្ចាស់សម្អាងការសុខគាប៊ូតាបានចាក់សោផ្ទះមានតម្លៃមិនក្រោម២០ម៉ឺនដុល្លារនោះចោលដោយមិនមានមនុស្សរស់នៅទេ ។
នាងខ្ញុងបញ្ជាក់ថា ការលេចឮថាបងស្រីធម៌របស់នាងដកហូតយកផ្ទះវិញនោះ គឺជារឿងមិនពិតទេ ។ នាងឈប់ស្នាក់នៅផ្ទះនោះដោយសារនាងត្រូវចេញទៅរស់នៅផ្ទះផ្ទាល់ខ្លួន ។ ចំពោះផ្ទះដែលជារបស់បងស្រីធម៌ដែលផ្តល់ឱ្យស្នាក់នៅនោះ គឺនាងជាអ្នកប្រគល់ឲ្យគាត់វិញ មិនមែនជាការដកហូតដោយសារមានទំនាស់ណាមួយទេ ។
ខ្ញុងនិយាយថា «នាងខ្ញុំ និងបងស្រីធម៌គឺនៅរាប់អានគ្នាដដែល មិនមានការប្រែប្រួលទេ ហើយនាងខ្ញុំនៅតែបន្តទទួលកម្មវិធីកាត់សក់ សម្រាប់សម្អាងការរបស់គាត់ជាធម្មតា។ ការប្រគល់ផ្ទះជូនបងស្រីវិញព្រោះតែនាងខ្ញុំចង់រស់នៅក្នុងផ្ទះផ្ទាល់ខ្លួន ហើយផ្ទះថ្មីនាងខ្ញុំក៏នៅមិនឆ្ងាយពីទីនោះដែរ ប៉ុន្តែសម្រាប់តម្លៃផ្ទះដែលនាងខ្ញុំទិញគឺនាងខ្ញុំមិនអាចបញ្ជាក់បានទេ ។ បើទោះបីជាផ្ទះក្រោយដែលនាងខ្ញុំទិញខ្លួនឯងនោះមានទំហំតូចជាងផ្ទះចាស់ ក៏នាងខ្ញុំពេញចិត្តនឹងអ្វីដែលកើតឡើងពីញើសឈាមដែលនាងខ្ញុំរកបាន» ។
កន្លងមកតារាកំប្លែងនាងស្រេង សុកាន់ដា ហៅនាងខ្ញុងបានរៀបចំពិធីឡើងផ្ទះវីឡាកូនកាត់នៅបុរីពិភពថ្មី ក្នុងខណ្ឌឫស្សីកែវក្បែរស្ថានីយទូរទស្សន៍ស៊ីធីអិន និងនៅមិនឆ្ងាយប៉ុន្មានពីផ្ទះតារាកំប្លែងរួមក្រុមនាយពែកមីទេ ។ កម្មវិធីឡើងផ្ទះនោះធ្វើឡើងកាលពីថ្ងៃទី២១ មេសា ឆ្នាំ២០១៤ ។ មានការសរសើរនាងខ្ញុង និងនាយពែកមីដែលមានវាសនាទទួលបានផ្ទះពីបងធម៌ផ្តល់ឱ្យស្នាក់នៅ ។ ទោះជាយ៉ាងណាក្តីពេលនេះនាងខ្ញុងលែងស្នាក់នៅផ្ទះនោះទៀតហើយ ខណៈនាយពែកមីស្នាក់នៅផ្ទះនោះជាធម្មតាជាមួយកូនប្រពន្ធ ។
អំឡុងពេលនេះនាងខ្ញុងនៅមិនទាន់បើកបេះដូងទទួលយកបុរសណាជាគូស្វាមី ដើម្បីបំបាត់ឈ្មោះជាស្ត្រីមេម៉ាយទេ ។ ស្នេហារបស់នាងផ្តល់សិទ្ធិទៅលើកូនប្រុស ។ នាងសម្រេចតាមកូនប្រុស ព្រោះនាងស្រឡាញ់កូនម្នាក់នេះ ដូច្នេះហើយបើគេយល់ថាអ្នកណាល្អ នាងធ្វើតាម ។ ពេលនេះកូននៅមិនទាន់សម្រេចឱ្យនាងមានប្តីថ្មីទេ ៕
ចែករំលែកព័តមាននេះ