ខេត្តកំពង់ឆ្នាំង ៖ ផ្ទះ១ខ្នងធ្វើអំពីឈើប្រក់ស័ង្កសី មានបណ្តោយ ៥គុណនឹង៦ម៉ែត្រ ត្រូវបានអគ្គីភ័យ ឆាបឆេះទាំងស្រុង នៅវេលាម៉ោង ៥និង៣០នាទីព្រឹក ថ្ងៃទី២៥ ខែតុលា ឆ្នាំ២០១៦ នៅភូមិព្រៃពីស ឃុំឈូកស ស្រុកកំពង់ត្រឡាច ខណៈដែលម្ចាស់ផ្ទះជាប្តីទៅលើកទ្រូនៅឯស្រែ ចំណែកប្រពន្ធ ទៅកំដរបងប្អូនឈឺនៅស្រុក។ លោក ម៉ាត់ លី អធិការ នគរបាលស្រុកកំពង់ត្រឡាច បានឲ្យដឹងថា ម្ចាស់ផ្ទះខាងលើមានប្តីឈ្មោះ លាស់ ម៉ាត់ អាយុ៦៣ឆ្នាំ ប្រពន្ធឈ្មោះ លី អាំមីណាស់ អាយុ៥៨ឆ្នាំ។
លោកបានបន្តថា ផ្ទះខាងលើនេះ នៅតែ២នាក់ប្តីប្រពន្ធ ដោយប្រពន្ធ ទៅកំដរបងប្អូនឈឺនៅស្រុក ចំណែកប្តីនៅផ្ទះម្នាក់ឯង។ មុនពេលកើតហេតុ បុរសជាប្តី បានក្រោកពីដំណេកនៅវេលាទាបភ្លឺ ដើម្បីទៅលើកទ្រូនៅឯស្រែ ស្រាប់តែមួយសន្ទុះក្រោយមក មានអគ្គីភ័យឆាបឆេះផ្ទះយ៉ាងលឿន អ្នកជិតខាងមិនអាចជួយអ្វីបានឡើយ។ ចំណែកបុរសជាម្ចាស់ផ្ទះរត់ពីស្រែមកវិញក៏មិនទាន់ ធ្វើឲ្យអគ្គីភ័យបានឆេះពេញទំហឹង មិនអាចយកអ្វីបានឡើយ គឺឆេះទាំងស្រុងតែម្តង។
ប្រភពដដែលបានបន្តថា ចំពោះទ្រពសម្បត្តិ គឺឆេះអស់ផ្ទះ១ខ្នង មានទំហំ៥គុណនឹង៦ម៉ែត្រ ធ្វើពីឈើប្រក់ស័ង្កសី ឆេះអស់ម៉ូតូ១គ្រឿង កង់១ អង្ករ៥គីឡូក្រាម ប្រាក់ដុល្លា៥០០ដុល្លារ ប្រាក់ខ្មែរ២០ម៉ឺនរៀល ទូរទស្សន៍១គ្រឿង និងឯកសារគ្រួសារមួយចំនួនទៀត ចំពោះមូលហេតុ គឺបណ្តាលមកពីឆ្លងចរន្តអគ្គីសនី៕
ចែករំលែកព័តមាននេះ