លោកចៅសង្កាត់ព្រែកប្រាបំភ្លឺថា ជ្រុលដៃ! ដោយសារភាន់ច្រឡំតែប៉ុណ្ណោះ
នៅល្ងាចថ្ងៃទី២៥ ខែតុលា ឆ្នាំ២០១៦ លោកហួរ ហួរ ចៅសង្កាត់ព្រែកប្រា បានថ្លែងប្រាប់កោះសន្តិភាពតាមរយៈទូរស័ព្ទ អោយដឹងថា «លោកពិតជាសោកស្តាយចំពោះទង្វើអចេតនារបស់ខ្ញុំ»។
រាជធានីភ្នំពេញ ៖ បន្ទាន់ពីគេហទំព័រកោះសន្តិភាពបានចុះផ្សាយដោយដាក់ចំណងជើងថា « ១ដៃរបស់លោកចៅសង្កាត់ព្រែកប្រា សន្តិសុខម្នាក់ផ្ទប់នឹងជញ្ជាំងសន្លប់ស្តូកស្តឹង » រួចមក នៅល្ងាចថ្ងៃទី២៥ ខែតុលា ឆ្នាំ២០១៦ លោកហួរ ហួរ ចៅសង្កាត់ព្រែកប្រា បានថ្លែងប្រាប់កោះសន្តិភាពតាមរយៈទូរស័ព្ទ អោយដឹងថា «លោកពិតជាសោកស្តាយចំពោះទង្វើអចេតនារបស់ខ្ញុំ»។ លោកបន្តថា «ខ្ញុំសន្យាថា នឹងដោះស្រាយបញ្ហាគ្រប់យ៉ាងជាមួយជនរងគ្រោះ និងសូមសោកស្តាយចំពោះសកម្មភាពជ្រុលដៃរបស់ខ្ញុំ, រហូតមកដល់ពេលនេះ ស្ថានភាពជំងឺជនរងគ្រោះក៏បានធូរស្បើយផងដែរ»។
សូមបញ្ជាក់ថា កាលពីវេលាម៉ោង១៧ និង៤៥នាទីល្ងាច ថ្ងៃទី២៤ ខែតុលា ឆ្នាំ២០១៦ នៅចំណុចក្លោងទ្វារច្រកចូល ក្នុងបុរីសម្បត្តិមានហេង ស្ថិតក្នុងភូមិឈូក សង្កាត់និរោធ ខណ្ឌច្បារអំពៅ ។ គឺដំបូងឡើយ លោកចៅសង្កាត់បានបើករថយន្តមិនចាំម៉ាក មកពីធ្វើការដោយចតនៅមុខផ្ទះរបស់ខ្លួន ពេលនោះសន្តិសុខយាមបុរីម្នាក់បានដើរទៅប្រាប់អោយលោកចៅសង្កាត់ចតទៅខាងមុខបន្តិចទៅ ព្រោះចតបែបហ្នឹងចតទើបផ្លូវចូលបុរីរបស់ម្ចាស់ខ្លួន ។ ពេលនោះ លោកហួរ ហួត ចៅសង្កាត់ព្រែកប្រា ក៏បានដើរសំដៅមកសួរនាំសន្តិសុខខាងលើ ដើម្បីសួរនាំអោយច្បាស់ថា ហេតុអ្វីបានជាមកនិយាយពាក្យខាងលើដាក់គាត់ ព្រោះគាត់ចតនៅមុខផ្ទះរបស់គាត់ទេតើ? រំពេចភ្លាមនោះ ស្រាប់តែលិចមុខសន្តិសុខ២នាក់ផ្សេងទៀត ដើរមកក្បែរ ប៉ុន្តែមិនដឹងថា បាននិយាយជាមួយលោកចៅសង្កាត់អ្វីខ្លះទេ ក៏ត្រូវលោកហួរ ហួត វាយ១ដៃចំក្បាលផ្ទប់ទៅនឹងជញ្ជាំងពេញទំហឹង បណ្តាលប្រកាច់ រហូតសន្លប់សន្តូកស្តឹងតែម្តង ។ ភ្លាមៗនោះ សន្តិសុខដែលរងរបួស ត្រូវបញ្ចូនទៅសង្គ្រោះនៅមន្ទីរពេទ្យបង្អែកច្បារអំពៅ ហើយក៏ត្រូវបញ្ចូនបន្តទៅ មន្ទីរពេទ្យមិត្តភាពខ្មែរសូវៀត ព្រោះតែសភាពរបួសធ្ងន់ធ្ងរពេក សន្តិសុខរងកណ្ដាប់ដៃលោកចៅសង្កាត់ព្រែកប្រា បញ្ចូនទៅសង្គ្រោះបន្ទាន់នៅវៀតណាម ថ្ងៃទី២៥ តុលា នេះ ។
ឆ្លើយតបទៅនឹងបាតុភាពខាងលើ លោក ហួរ ហួត ចៅសង្កាត់ព្រែកប្រា បានបញ្ជាក់អោយដឹងថា ៖ ខ្ញុំសូមបញ្ជាក់ថា ដំបូងឡើយ ករណីនេះកើតឡើងដោយការភាន់ច្រឡំ តែប៉ុណ្ណោះ ។
លោក ហួរ ហួត ចៅសង្កាត់ព្រែកប្រា បន្តបំភ្លឺដំណើររឿងថា ៖ នៅវេលាម៉ោង១៧ និង៤០នាទី រូបលោកបានបើករថយន្តត្រឡប់មកផ្ទះវិញ ហើយក៏ឈប់នៅមុខផ្ទះរង់ចាំថយរថយន្តចូលក្នុងផ្ទះ គាប់ជួន មានសន្តិសុខបុរីម្នាក់ បានដេញរថយន្តរបស់លោកអោយចេញ ដោយទុកផ្លូវអោយរថយន្តមេរបស់គេ(បុរី)ចេញ ។ បន្ទាប់មក លោកក៏ទៅសួរសន្តិសុខនោះថា «តើខ្ញុំចតមុខផ្ទះខ្ញុំ អោយខ្ញុំទៅណា?» ។ រួចហើយសន្តិសុខម្នាក់នោះក៏បានសុំទោសរូបលោកដោយមិនបានដឹងថា ផ្ទះរបស់លោកចៅសង្កាត់ព្រែកប្រានៅទីនេះ ខណៈកំពុងជជែកគ្នា… ស្រាប់មានសន្តិសុខ២នាក់ផ្សេងទៀត ជិះម៉ូតូមកដល់ ក៏បានសួរនាំ ដោយសំឡេងខ្លាំងៗពីលើម៉ូតូ រួចដើរតម្រង់មករករូបលោកដោយកាយវិការគិតថា នឹងមកវាយខ្ញុំហើយ ។ ទន្ទឹមនឹងនេះ លោក ហួរ ហួតនឹកស្មានថា សន្តិសុខដែលជិះម៉ូតូនោះមកវាយរូបលោក ទើបលោកទះចំក្បាល ធ្វើអោយសន្តិសុខនោះដួល ខណៈដែលដួលលោកក៏លើកសន្តិសុខនោះហើយ ក៏បាននិយាយសុំទោសផងដែរ ។ ក្រោយមកសន្តិសុខនោះត្រូវបានបញ្ជូនទៅកាន់មន្ទីរពេទ្យបង្អែកនិងបន្តទៅកាន់មន្ទីរពេទ្យខ្មែរ-សូវៀត ដើម្បីពិនិត្យស្ថានភាពរបូស។
ជាក់ស្តែង ក្រោយពីជ្រុលដៃទះកំផ្លៀងសន្តិសុខរូបនោះហើយភ្លាមៗ នៅយប់ថ្ងៃទី២៤ តុលា លោកចៅសង្កាត់ព្រែកប្រា បានព្យាយាមយកទុកដាក់ តាមដានពិនិត្យស្ថានភាព ជនរងគ្រោះ ទាំងនៅមន្ទីរពេទ្យបង្អែកច្បារអំពៅ និងបន្តដល់មន្ទីរពេទ្យមិត្តភាពខ្មែរ-សូវៀត ព្រមទាំងបានជួយសម្របសម្រួល ក្នុងការព្យាបាលដល់ជនរងគ្រោះ។ ទោះបីយ៉ាងណា លោកចៅសង្កាត់ បានសម្តែងការសោកស្តាយ ចំពោះសកម្មភាពរបស់លោក ដែលបានជ្រុលដៃទះចំក្បាលសន្តិសុខរហូតដល់ចូលមន្ទីរពេទ្យ ៕
ចែករំលែកព័តមាននេះ