ខេត្តកណ្ដាល ៖ អ្នកភូមិមួយក្រុមមានគ្នាប្រមាណ១០០នាក់ មានទាំងតាអាចារ្យផង កាលពីព្រឹកថ្ងៃទី២៥ តុលា បានប្រមូលផ្តុំគ្នាធ្វើការតវ៉ានៅក្នុងវត្តខ្ពបអណ្ដែត ហៅវត្តក្របៅ ក្នុងសង្កាត់កំពង់សំណាញ់ ក្រុងតាខ្មៅ ដោយទាមទារបណ្ដេញសង្ឃមួយអង្គ ជាគ្រូសូត្រស្ដាំឱ្យចាកចេញពីវត្ត ដោយចោទប្រកាន់ថា សង្ឃ គ្រូសូត្រស្ដាំ អង្គនេះ បានយកក្មេង ស្រី មកចិញ្ចឹម នៅក្នុងវត្ត និង ចាយវាយលុយ កាក់គ្មានមូលហេតុ និងបញ្ជីស្នាមត្រឹមត្រូវ ។
ក្រុមពុទ្ទបរិស័ទ ដែលនាំគ្នាធ្វើការតវ៉ានេះបានឱ្យដឹងថា អ្នកភូមិភាគច្រើន មានការមិនពេញចិត្ត ជាមួយសង្ឃមួយអង្គ ព្រះនាម
ញឹម ខេមរៈ ជាគ្រូសូត្រស្ដាំ មានព្រះជន្មជាង៣០ ដែលបានមកគង់នៅក្នុងវត្តនេះ រយៈពេលជាង២វស្សា ហើយមិនដឹងអ្នកណា ចាត់តាំងឱ្យមកគង់នៅធ្វើគ្រូសូត្រស្ដាំទេ ។
ចាប់តាំងពីសង្ឃអង្គនេះ មកគង់នៅមានពុទ្ធបរិស័ទចំណុះជើងវត្តមិនពេញចិត្តទេ ដោយសារមើលឃើញទង្វើមិនល្អជាច្រើន ។ ពលរដ្ឋបានលើកឡើងថា សង្ឃជាសង្គ្រាជនៅវត្តនេះ មានព្រះជន្មជាង៧០វស្សាស្មារតី និងសុខភាពមិនរឹងមាំ វង្វេងច្រើន ។ ចាប់ តាំងពី សង្ឃ ញឹម ខេមរៈ មកគង់នៅជាគ្រូសូត្រស្ដាំ មិនដឹងចាត់តាំងមកពីណា បានចំណាយលុយវត្តខ្ជះខ្ជាយ ដោយមិនដឹងមូល ហេតុពិតប្រាកដ គ្មានបញ្ជីស្នាម និងមានការពិភាក្សា ជាមួយគណៈកម្មការ តាអាចារ្យ ឱ្យបានត្រឹមត្រូវទេ គឺស្រេចតែអំពើចិត្ត ។
ជាងនេះទៀត ពុទ្ធបរិស័ទមិនពេញចិត្ត ដោយសារគ្រូសូត្រស្ដាំនេះ បានយកក្មេងស្រីមានអាយុ១៤ ទៅ១៥ឆ្នាំ ពីរ បីនាក់ មកចិញ្ចឹមនៅក្នុងវត្ត ដែលខុសនឹងវិន័យធម័នាំឱ្យពុទ្ធបរិស័ទ មិនពេញចិត្តសង្ឃអង្គនេះ ជាយូរមកហើយ ក៏មានផ្ទុះការតវ៉ាបណ្ដេញសង្ឃអង្គនេះចេញជាដាច់ខាត ។
ជុំវិញការចោទប្រកាន់ពីសំណាក់ពុទ្ធបរិស័ទចំណុះជើងវត្តខាងលើ អ្នកយកព័ត៌មានមិនអាចសុំការពន្យល់ពីសង្ឃ ញឹម ខេមរៈ បានទេ ពេលដែលពុទ្ធបរិស័ទមកតវ៉ាដល់វត្ត ព្រៈតេជគុណ ត្រូវបានអាជ្ញាធរនិមន្តចាកចេញ ពីវត្តជាបណ្ដោះអាសន្នសិន ដើម្បីរង់ចាំធ្វើការដោះស្រាយជាក្រោយ ។ ប៉ុន្តែបើតាមពុទ្ធបរិស័ទមួយចំនួនទៀត ដែលគាំទ្រ គ្រូសូត្រស្ដាំ ញឹម ខេមរៈ ប្រាប់ឱ្យដឹងថា ពុទ្ធ បរិស័ទ ដែលធ្វើការតវ៉ានេះ គឺមួយចំនួនតូចទេ ដែលមិនពេញចិត្តគ្រូសូត្រស្ដាំ បានធ្វើការចោទប្រកាន់ដោយគ្មានមូលហេតុច្បាស់ លាស់ ។
អ្នកខ្លះនិយាយថា តាមពិតការចាយវាយលុយកាក់វត្ត គឺសុទ្ធតែមានគណៈកម្មការ អាចារ្យ ដឹងឮត្រឹមត្រូវ ។ គ្រូសូត្រស្ដាំអង្គនេះ គឺ ត្រូវបានអនុគណៈខេត្ត ចាត់តាំងឱ្យមកគង់នៅ ដោយសារសង្គ្រាជនៅវត្តនេះ មានព្រះជនច្រើន ចាស់ជរា ណាស់ហើយ ។
ចាប់តាំងពីគ្រូសូត្រស្ដាំមកគង់នៅវត្តខ្ពបអណ្ដែត ហៅក្របៅនេះ រយៈពេលពីរឆ្នាំ បានជួយបុកអណ្ដូងស្នប់ និងជួយជួសជុលសង់ ផ្ទះឱ្យអ្នកភូមិ ក្រីក្រ និងអ្នកផ្ទុកមេរោគអេដស៍បានច្រើនណាស់ សូម្បីតែអាជ្ញាធរ ក៏បានដឹងដែរ ។
ចំណែកការចោទថា យកក្មេងស្រីមកស្នាក់នៅក្នុងវត្តនោះ គឺមិនត្រឹម មានក្មេងស្រីមកស្នាក់នៅទេ មានទាំងក្មេងប្រុស ច្រើននាក់ទៀត មកស្នាក់នៅក្នុងវត្តនេះ គឺជាកូនអ្នកក្រីក្រ និងកូនអ្កផ្ទុកមេរោគអេដ៍នៅក្នុងភូមិ-ឃុំ គឺមកស្នាក់នៅរៀនសូត្រ ដោយមានការជួយឧបត្ថម្ភពីគ្រូសូត្រស្ដាំអង្គនេះ។
ចែករំលែកព័តមាននេះ