អ្នកទទួលខុសត្រូវម្នាក់របស់ប៉ូលិសឥណ្ឌាគូសបញ្ជាក់កាលពីថ្ងៃទី២៤ តុលាថា ពួកឧទ្ទាមម៉ៅនិយមយ៉ាងតិច២១នាក់ត្រូវសម្លាប់ដោយកងកម្លាំងសន្តិសុខឥណ្ឌានៅភាគខាងកើតប្រទេសដែលនោះជាការបាត់បង់ធ្ងន់ធ្ងរបំផុតរបស់ក្រុមឧទ្ទាមនោះនាឆ្នាំ២០១៦ ។
ចាប់តាំងពីកន្លះសតវត្សមកហើយក្រុមឧទ្ទាមម៉ៅនិយមដែលលាក់ខ្លួនក្នុងព្រៃនាភាគកណ្តាលឥណ្ឌាបានប្រយុទ្ធប្រឆាំងរដ្ឋអំណាចឥណ្ឌា។ លោកDHARUA មេប៉ូលិសម្នាក់នៃស្រុក MALKANGIRI រដ្ឋអូឌីសា ថ្លែងប្រាប់ AFP ថា ពួកឧទ្ទាមម៉ៅនិយម១ក្រុមមានគ្នារវាងពី៣០ទៅ៤០នាក់ បានប្រមូលផ្តុំគ្នាក្នុងព្រៃនៃតំបន់មួួយស្ថិតនៅចន្លោះរដ្ឋឥ្រន្ទាប្រាដេស និងរដ្ឋអូឌីសា ហើយប៉ូលិសបានធ្វើការពួកស្ទាក់វាយប្រហារលើពួកគេ ។ ពេលនោះសាកសពពួកម៉ៅនិយម២១នាក់ត្រូវបានប្រមូល ។ ប្រតិបត្តិការតាមរុករកនៅបន្ត ។ អ្នកទទួលខុសត្រូវជាន់ខ្ពស់ម្នាក់របស់ក្រុមបះបោរនោះ និងកូនប្រុសរបស់គេអាចស្ថិតក្នុងចំណោមអ្នកស្លាប់ ។
ទាហានឥណ្ឌា១០នាក់ត្រូវស្លាប់កាលពីខែកក្កដានៅរដ្ឋប៊ីហា ភាគខាងកើតឥណ្ឌាក្នុងការវាយប្រហារមួយរបស់ពួកឧទ្ទាមម៉ៅនិយម ។ គ្រាប់បែកច្នៃត្រូវបានប្រើវាយប្រហារលើក្បួនរថយន្តមួយរបស់កងទ័ព ។ រួចកាលពីខែមីនា ប៉ូលិស៧នាក់ស្លាប់ដោយសារការផ្ទុះគ្រាប់មីនមួយគ្រាប់នៅរដ្ឋ CHHATTISGARH ភាគកណ្តាលប្រទេស ។
ពួកឧទ្ទាមម៉ៅនិយមឥណ្ឌានិយាយថា ពួកគេប្រយុទ្ធប្រឆាំងរដ្ឋអំណាចកណ្តាលដើម្បីឱ្យទទួលបានការងារដីធ្លីនិងពង្រឹងច្បាប់សម្រាប់ពួកកុលសម្ព័ន្ធក្រីក្រ ។
មនុស្សយ៉ាងតិច៧.០០០នាក់ស្លាប់ក្នុងជម្លោះនោះរវាងឆ្នាំ២០០៥និង២០១៦ ៕
ចែករំលែកព័តមាននេះ