រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៧៥គីឡូក្រាមនៅលើសង្វៀនទូរទស្សន៍ភីអិនអិន ថ្ងៃអាទិត្យទី៣០ តុលា ខាងមុខនេះ ត្រូវបានសម្រាកមួយពេលសិន
រាជធានីភ្នំពេញ ៖ ការប្រកួតប្រដាល់វគ្គសន្សំពិន្ទុឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៧៥គីឡូក្រាមនៅលើសង្វៀនទូរទស្សន៍ភីអិនអិន ថ្ងៃអាទិត្យទី៣០ តុលា ខាងមុខនេះ ត្រូវបានសម្រាកមួយពេលសិន ប៉ុន្តែគណៈកម្មការរៀបចំការប្រកួតបានដាក់គូប្រកួតមិត្តភាពអន្តរជាតិជំនួសវិញ ។
អ្នកដែលត្រូវឡើងប្រកួតជាលក្ខណៈមិត្តភាពអន្តរជាតិជាមួយកីឡាករថៃលើកនេះ មានកីឡាករពេជ្រ ប៊ុនឆេន មកពីក្លិបកងពលធំអន្តរាគមន៍លេខ២ ប្រកួតជាមួយកីឡាករថៃឈ្មោះដែន ស្យាម ក្នុងប្រភេទទម្ងន់៥៤គីឡូក្រាម និងកីឡាករឡុង សុវណ្ណឌឿន មកពីក្លិបសាលវ័ន្តកីឡា ប្រកួតជាមួយកីឡាករថៃឈ្មោះឌីស៊ែល លេក ក្នុងប្រភេទទម្ងន់៦៩គីឡូក្រាម ។
តាមការឱ្យដឹងកីឡាករថៃទាំង២រូបនេះសុទ្ធតែធ្លាប់មកប្រកួតនៅស្រុកខ្មែរជាពិសេសកីឡាករដែនស្យាមតែម្ដងគ្រាន់តែគេមិនធ្លាប់ជួបពេជ្រ ប៊ុឆេនប៉ុណ្ណោះ ។ បើធ្វើការប្រៀបធៀបសមត្ថភាពរវាងកីឡាករទាំង២គឺប្រហែលគ្នា ទាំងផ្លែកែងនិងជង្គង់អាចប្រើការបានយ៉ាងស្ទាត់ជំនាញដូចគ្នា គ្រាន់តែចិត្តរបស់ពេជ្រ ប៊ុនឆេន មិនសូវសឿងប៉ុណ្ណោះ ។ សម្រាប់អ្នកធ្លាប់តាមដានការប្រកួតកន្លងមក ពួកគេមិនហ៊ានទាយទុកមុនពីលទ្ធផលចុងក្រោយនោះទេ ។ ដូច្នេះបើចង់ដឹងថាអ្នកណាខ្លាំងជាងអ្នកណាមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ ។
ចំណែកឡុង សុវណ្ណឌឿន វិញទទួលបានការទុកចិត្តពីអ្នកគាំទ្រដោយសារកីឡាករថៃឈ្មោះឌីស៊ែល លេករូបនេះ ធ្លាប់មកប្រកួតនៅស្រុកខ្មែរជាច្រើនលើកមែនប៉ុន្តែអត់ដែលឈ្នះម្ដងណាឡើយ ។ ម្យ៉ាងវិញទៀត ឡុង សុវណ្ណឌឿន ជាអ្នកប្រដាល់ជើងខ្លាំងមួយរូបដែលមានប្រវត្តិប្រកួតមិនធម្មតានោះទេ ស្នៀតកណ្ដាប់ដៃ និងស្នៀតជើងរបស់គេល្អខ្លាំងណាស់ ឯចិត្តក៏សឿងណាស់ដែរ ។ ដូច្នេះសម្រាប់ការប្រកួតលើកនេះឡុង សុវណ្ណឌឿន ប្រហែលមិនធ្វើឱ្យអ្នកគាំទ្រខកចិត្តឡើយ ។
ចំណែកគូប្រកួតមិត្តភាពធម្មតាវិញមានធន់ មករា មកពីក្លិបកងយោធពលខេមរៈភូមិន្ទ ប្រកួតជាមួយចៅ ស្ដាយ មកពីក្លិបសុភានូគុនខ្មែរ ។ ខុន បូឡា មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយឌុម កែវដប មកពីក្លិបសុភានូគុនខ្មែរ និងអែម ម៉ាន់ណូអែល មកពីក្លិបកុមារទេពមានរិទ្ធ ប្រកួតជាមួយស៊ីវ សុងម៉េង មកពីក្លិបនាគរាជមានជ័យ ៕
ចែករំលែកព័តមាននេះ