បុរសម្នាក់ត្រូវបានសង្ស័យថា បានប្រើប្រាស់ថ្នាំញៀ.នលើសកម្រិត រហូតវង្វេងស្មារតីដើរនិយាយតែម្នាក់ឯងទាំងស្ថានភាពភ័យស្លន់ស្លោ និងស្រមើស្រមៃថា
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវបានសង្ស័យថា បានប្រើប្រាស់ថ្នាំញៀ.នលើសកម្រិត រហូតវង្វេងស្មារតីដើរនិយាយតែម្នាក់ឯងទាំងស្ថានភាពភ័យស្លន់ស្លោ និងស្រមើស្រមៃថា មានគេដេញសម្លា.ប់គាត់ ហើយក៏បានរត់ឡើងបង្គោលភ្លើងបំភ្លឺផ្លូវអស់រយៈពេលជាច្រើនម៉ោង ទើបព្រមចុះមកវិញ បង្កឱ្យមានការភ្ញាក់ផ្អើលកាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី១៣ ខែឧសភា ឆ្នាំ២០២២ នៅចំណុចសួនច្បាររង្វង់គួចកាណុង ស្ថិតក្នុងសង្កាត់ស្រះចក ខណ្ឌដូនពេញ ។
បើតាមប្រភពពីប្រជាពលរដ្ឋដែលឃើញហេតុការណ៍ផ្ទាល់បានប្រាប់ឱ្យដឹងថា បុរសខាងលើនេះ មិនត្រូវបានស្គាល់អត្តសញ្ញាណនោះទេ ។ ហើយនៅមុនពេលកើតហេតុ គេក៏មិនដឹងថាតើគាត់មកណាទៅណានោះទេ? ដោយគេបានឃើញគាត់ដើរតែម្នាក់ឯង ទាំងស្ថានភាពភ័យស្លន់ស្លោ និងបានស្រែកឱ្យគេជួយថា «មានគេដេញសម្លា.ប់គាត់»។
ពលរដ្ឋបន្តថា ខណៈពេលដើរមកដល់កន្លែងប៉ុស្តិ៍ប្រចាំការរបស់សមត្ថកិច្ចនៅចំណុចសួនច្បាររង្វង់គួចកាណុង ស្រាប់តែបុរសរូបនេះបានរត់ឡើងលើបង្គោលភ្លើងបំភ្លឺផ្លូវ ទៅអង្គុយនៅខាងលើ រួចនិយាយតែម្នាក់ឯងតាមការស្រមើស្រមៃរបស់គាត់ ។ ឃើញដូច្នោះ ប្រជាពលរដ្ឋដែលធ្វើដំណើរតាមផ្លូវបានឈប់ចោមរោមមើល និងបាននិយាយលួងលោមឱ្យគាត់ចុះមកក្រោមវិញ តែគាត់មិនស្តាប់ និងនិយាយតែម្នាក់ឯងតាមអ្វីដែលគាត់នឹកឃើញ ។
ពលរដ្ឋបន្តទៀថា បន្ទាប់ពីមានការភ្ញាក់ផ្អើល ប្រជាពលរដ្ឋក៏បានរាយការណ៍ប្រាប់ទៅសមត្ថកិច្ចមូលដ្ឋាន ឱ្យចុះមកកន្លែងកើតហេតុភ្លាមៗ និងបានលួងលោមហៅបុរសរូបនោះឱ្យចុះមកក្រោមវិញ ប៉ុន្តែពេលកាន់តែឃាត់ បុរសរូបនោះកាន់តែបានចិត្ត និងផ្គើនមិនព្រមចុះមកទេ។
ដោយអស់លទ្ធភាពក្នុងការលួង ទាំងសមត្ថកិច្ច និងប្រជាពលរដ្ឋ បានបណ្តោយឱ្យបុរសរូបនោះ អង្គុយតែម្នាក់ឯង ចំណែកពួកគាត់ចាំឃ្លាំមើលសកម្មភាពបុរសនោះពីចម្ងាយអស់រយៈពេលជាង៣ម៉ោង ទើបបុរសរូបនោះ ព្រមចុះមកវិញដោយខ្លួនឯងតែម្តង៕
ចែករំលែកព័តមាននេះ