ប្រទេសមីយ៉ាន់ម៉ា ៖ អស់រយៈពេល២អាទិត្យ បន្ទាប់ពីលោកប្រធានាធិបតី Barack Obama បានដកទណ្ឌកម្មសេដ្ឋកិច្ចមួយចំនួនធំចេញពីប្រទេសមីយ៉ាន់ម៉ា អ្នកដឹកនាំរបស់ប្រទេសនេះ លោកស្រី Aung San Suu Kyi
ប្រទេសមីយ៉ាន់ម៉ា ៖ អស់រយៈពេល២អាទិត្យ បន្ទាប់ពីលោកប្រធានាធិបតី Barack Obama បានដកទណ្ឌកម្មសេដ្ឋកិច្ចមួយចំនួនធំចេញពីប្រទេសមីយ៉ាន់ម៉ា អ្នកដឹកនាំរបស់ប្រទេសនេះ លោកស្រី Aung San Suu Kyi បាននិយាយទៅកាន់វិនិយោគិនបរទេស និងសន្យាថា នឹងមានច្បាប់ ក៏ដូចជាឱកាសច្បាស់លាស់ក្នុងវិស័យសេដ្ឋកិច្ចដែលមិនទាន់អភិវឌ្ឍន៍។
តាំងពីការផ្ទេរអំណាចមកដល់ខែមេសាមក លោកស្រី Suu Kyi ត្រូវបានរិះគន់លើការពន្យារពេលបង្កើតគណៈកម្មាធិការដើម្បីអនុញ្ញាតគម្រោងវិនិយោគពីបរទេស ទៅលើការតាមដានហួសហេតុនៃការដ្ឋានសាងសង់ក្នុងទីក្រុងធំជាងគេរបស់ប្រទេស និងគម្រោងសេដ្ឋកិច្ចដែលមិនទាន់មានភាពល្អិតល្អន់នៅឡើយ ។
ទាំងអស់នេះត្រូវបានបូកបញ្ចូលជាមួយអស្ថិរភាពនយោបាយ បន្ទាប់ពីការបោះឆ្នោតបែបប្រជាធិបតេយ្យដំបូងធ្វើឲ្យការវិនិយោគពីបរទេសមានត្រឹមតែ៣៨០លានដុល្លារក្នុងអំឡុងពីខែមេសា ដល់ខែកក្កដា ខណៈរយៈពេលដូចគ្នាកាលពីឆ្នាំមុនមានដល់ទៅ២,៦ប៊ីលានដុល្លារ ។
ប៉ុន្តែស្ថានភាពត្រូវបានប្រែប្រួលក្នុងខែកញ្ញា ជាពេលដែលលោកស្រី Suu Kyi បានធ្វើទស្សនកិច្ចទៅកាន់ Washington ហើយលោក Obama ក៏បានប្រកាសពីគោលបំណងរបស់លោក ក្នុងការដកទណ្ឌកម្មសេដ្ឋកិច្ចចេញផងដែរ។ លោកស្រី Suu Kyi ក៏បានប្រញាប់ប្រញាល់ជំរុញច្បាប់វិនិយោគពីបរទេស និងច្បាប់ដទៃដែលទាក់ទងភ្លាមៗ។
ដើម្បីលើកស្ទួយសេដ្ឋកិច្ច លោកស្រី Suu Kyi បានធ្វើទស្សនកិច្ចទៅកាន់បរទេសជាច្រើន រួមមានប្រទេសចិន ថៃ សហរដ្ឋអាមេរិក និងឥណ្ឌា ដើម្បីលើកតម្កើងប្រទេសមីយ៉ានម៉ា ជាប្រទេសសម្រាប់ការវិនិយោគ ។ ចំណែកឯទស្សនកិច្ចទៅកាន់ប្រទេសជប៉ុន នឹងកើតមានឡើងក្នុងខែវិច្ឆិកា ខាងមុខផងដែរ ។
រដ្ឋមន្ត្រីក្រសួងហិរញ្ញវត្ថុ និងការអភិវឌ្ឍ Kyaw Win បានព្យាយាមធានាដល់វិនិយោគិនបរទេស ដោយសន្យាថា ពួកគេនឹងត្រូវបានទទួលដូចនឹងក្រុមហ៊ុនក្នុងស្រុកដែរ ហើយពួកគេនឹងមិនជួបប្រទះនូវការដកហូតសិទ្ធិ និងអាជ្ញាប័ណ្ឌធ្វើអាជីវកម្មពីរដ្ឋនោះទេ ។
គួរបញ្ជាក់ថា បន្ទាប់ពីរយៈពេលប៉ុន្មាន៥០ ឆ្នាំ ដែលប្រទេសនេះស្ថិតនៅក្រោមការដឹកនាំរបស់កងយោធាមក ហេដ្ឋារចនាសម្ព័ន្ធដូចជាផ្លូវថ្នល់ អាកាសយានដ្ឋាន ក៏ដូចជាការផ្គត់ផ្គង់អគ្គិសនីក្នុងប្រទេសត្រូវបានខូចខាត មានន័យថា វិស័យឧស្សាហកម្មក្នុងស្រុកនៅអន់ថយណាស់ ហើយកំណើនសេដ្ឋកិច្ច៨%ប្រចាំឆ្នាំនោះ ភាគច្រើនត្រូវបានជំរុញដោយការនាំចូល ។ វាធ្វើឲ្យមានគម្លាតសេដ្ឋកិច្ច និងឱនភាពកាន់តែខ្លាំងដែលបានដាក់សម្ពាធដល់រូបិយប័ណ្ណក្នុងស្រុក ។
លោក Kyaw Win និយាយថា ៖ « ពួកយើងត្រូវតែជំរុញដល់ពាណិជ្ជកម្ម ដោយបង្កើនការនាំចេញ និងកាត់បន្ថយការនាំចូលតាមរយៈការបង្កើតឧស្សាហកម្មជំនួសការនាំចូល » ។
លោកបន្តថា វាពិតជាសំខាន់ណាស់ក្នុងការអភិវឌ្ឍផលិតកម្មក្នុងស្រុកនៃក្រុមហ៊ុនធុនតូចនិងមធ្យម ហើយសន្យាថា នឹងផ្តល់ជំនួយផ្នែកបច្ចេកទេស និងហិរញ្ញវត្ថុ ។
លោក Kyaw Win ក៏បានសន្យាថា នឹងទប់ស្កាត់ទំនិញគេចពន្ធដែលបានធ្វើឲ្យប៉ះពាល់យ៉ាងខ្លាំងដល់ចំណូលពន្ធដារ ។ រដ្ឋាភិបាលកណ្តាលរបស់មីយ៉ាន់ម៉ានៅមិនទាន់អាចគ្រប់គ្រងផ្នែកដ៏ធំនៅប៉ែកព្រំដែនខាងជើងឆៀងខាងកើត ជាប់នឹងប្រទេសចិននិងថៃ ជាតំបន់ដែលក្រុមបះបោរគ្រប់គ្រងពាណិជ្ជកម្មឆ្លងដែននៅឡើយទេ ។
រដ្ឋមន្ត្រីខាងលើបន្ថែមថា ៖ « ការធ្វើពាណិជ្ជកម្មខុសច្បាប់ក្នុងប្រទេសមីយ៉ាន់ម៉ា គឺកំពុងតែរាលដាល ។ បរិមាណពាណិជ្ជកម្មខុសច្បាប់ គឺច្រើនជាងពាណិជ្ជកម្មស្របច្បាប់ទៅទៀត ។ ហេតុនេះ ពួកយើងកំពុងព្យាយាមបញ្ឈប់វា » ៕
ចែករំលែកព័តមាននេះ