ខេត្តព្រះសីហនុ ៖ អាកាសយានដ្ឋានអន្តរ ជាតិខេត្តព្រះសីហនុបានឈានដល់ដំណាក់កាលថ្មីមួយទៀតហើយ ដោយកាលពីថ្ងៃទី២១ តុលា កន្លងមក អាកាសយានដ្ឋាននេះបានទទួលភ្ញៀវទី១០០ពាន់របស់ខ្លួន ។
ខេត្តព្រះសីហនុ ៖ អាកាសយានដ្ឋានអន្តរ ជាតិខេត្តព្រះសីហនុបានឈានដល់ដំណាក់កាលថ្មីមួយទៀតហើយ ដោយកាលពីថ្ងៃទី២១ តុលា កន្លងមក អាកាសយានដ្ឋាននេះបានទទួលភ្ញៀវទី១០០ពាន់របស់ខ្លួន ។ នេះបើយោងតាមរបាយការណ៍ដែលកោះសន្ដិភាពទទួលបាន ។
អ្នកនាង Himezawa Gana Diola ដែលធ្វើដំណើរពីទីក្រុងហូជីមិញ តាមជើងយន្តហោះ Angkor Air របស់កម្ពុជា គឺជាអតិថិជនដែលមានសំណាងម្នាក់នោះ ហើយអ្នកនាងក៏បានទទួលនូវកម្រងផ្កាដ៏ស្រស់ស្អាតដើម្បីអបអរព្រឹត្តិការណ៍មួយនេះផងដែរ ។
ដើម្បីអបអរព្រឹត្តិការណ៍នេះ ក៏ដូចជាយកឱកាសនេះសម្រាប់ការកែសម្រួលចំណតយន្តហោះផងនោះ Cambodia Airports ដោយមានការសហការជាមួយ Cambodia Angkor Air ក៏បានរៀបចំការទទួលបដិសណ្ឋារកិច្ចដ៏ពិសេសជូនអ្នកនាងផងដែរ ។ ស្នាមបាតដៃរបស់អ្នកនាង Himezawa ត្រូវបានដាក់លើផ្ទាំងឈ្មោះទុកជាអនុស្សាវរីយ៍ ហើយផ្ទាំងដែលមានឈ្មោះរបស់នាង និងកាលបរិច្ឆេទនៃព្រឹត្តិការណ៍ខាងលើនោះ នឹងត្រូវបានដាក់បង្ហាញលើជញ្ជាំងនៃចំណតថ្មីផងដែរ ។
ទិន្នន័យរបស់អតិថិជនទី១០០ពាន់នេះ គឺទទួលបានតាមរយៈការបូកបញ្ចូលនូវភ្ញៀវអន្តរជាតិ និងភ្ញៀវក្នុងស្រុកដែលបានចុះចត និងហោះហើរចេញពីអាកាសយានដ្ឋានអន្តរជាតិខេត្តព្រះសីហនុ តាំងពីដើមឆ្នាំ២០១៦មក ។
សមិទ្ធផលនេះបានបង្ហាញពីចលនាអ្នកដំណើររបស់អាកាសយានដ្ឋានខាងលើ ដែលនឹងរាយការណ៍ពីការលូតលាស់ប្រមាណ៤១%ពីមួយឆ្នាំទៅមួយឆ្នាំ ។ បើធៀបនឹងឆ្នាំ ២០១៥កន្លងមកវិញ ចលនាយន្តហោះត្រូវបានគិតថា នឹងកើនឡើង៣០%ឯណោះ ។
សកម្មភាពវិជ្ជមានរបស់អាកាសយានដ្ឋានអន្តរជាតិព្រះសីហនុ ដែលសម្បូរទៅដោយចរាចរភ្ញៀវកម្សាន្ត គឺមានស្ថិរភាពដោយសារតែការលូតលាស់ផ្នែកទេសចរណ៍ក្នុងប្រទេសកម្ពុជា និងភាពទាក់ទាញថ្មីៗនៃតំបន់ឆ្នេររបស់ប្រទេសនេះ ។
លោក Éric Delobel ប្រធានប្រតិបត្តិរបស់ Cambodia Airports ជាក្រុមហ៊ុនអភិវឌ្ឍន៍ និងគ្រប់គ្រងទៅលើបណ្តាញអាកាសយានដ្ឋានអន្តរជាតិក្នុងប្រទេសកម្ពុជា បាននិយាយថា ៖ «ជាមួយនឹងការមកដល់នូវយន្តហោះដឹកអ្នកដំណើរថ្មីៗ និងការបើកដំណើរការនៃសេវាកម្មអន្តរជាតិក្នុងឆ្នាំនេះ យើងអាចនិយាយបានថា អតិថិជនទី១០០ពាន់នេះ គឺជាសក្ខីភាពមួយទៀតបង្ហាញពីការលូតលាស់នៃវិស័យទេសចរណ៍ផ្នែកសមុទ្រ » ។
លោកថា ៖ « យើងអាចមើលឃើញថា យុទ្ធនាការផ្សព្វផ្សាយរបស់យើងជាមួយនឹងក្រសួងទេសចរណ៍របស់កម្ពុជា សណ្ឋាគារ និងក្រុមហ៊ុនដំណើរកម្សាន្ត គឺពិតជានាំមកនូវលទ្ធផលជាក់ស្តែងពិតមែន ។ ដើម្បីសម្របខ្លួនតាម ក៏ដូចជាជំរុញដល់ការលូតលាស់ ពួកយើងនឹងបន្តជំរុញឲ្យមាននូវផ្លូវថ្មី បង្កើនគុណភាពហេដ្ឋារចនាសម្ព័ន្ធ និងផ្តល់ជាសេវាកម្មមានគុណភាពខ្ពស់ទៅកាន់អតិថិជនរបស់ពួកយើងផងដែរ » ។
ខេត្តព្រះសីហនុ ជាតំបន់ទេសចរណ៍ដ៏មានសក្ដានុពលមួយដែលកំពុងទាក់ទាញភ្ញៀវទេសចរពីជុំវិញពិភពលោក ។ កាលពីពេលថ្មីៗកន្លងទៅនេះ ក្រុមហ៊ុនអាកាសចរណ៍ AirAsia ក៏បានប្រកាសពីគម្រោងបើកការហោះហើរមកកាន់ទឹកដីខេត្តមួយនេះផងដែរ ។
ថ្លែងក្នុងកិច្ចសម្ភាសន៍ដាច់ដោយឡែកមួយនៅឯមជ្ឈមណ្ឌលឧត្តមភាពនៃអាកាសចរណ៍អាស៊ីដែលមានមូលដ្ឋាននៅប្រទេសម៉ាឡេស៊ី លោក Tony Fernandes នាយកប្រតិបត្តិក្រុមហ៊ុនអាកាសចរណ៍ AirAsia បានឲ្យដឹងថា ៖ «ឥឡូវនេះ យើងកំពុងតែរកឱកាសហោះហើរទៅកាន់ខេត្តព្រះសីហនុ ព្រោះថា ទីនោះជាទិសដៅទេសចរណ៍មួយកំពុងមានសក្ដានុពលយ៉ាងខ្លាំងនៅកម្ពុជា។ ម្យ៉ាង គម្រោងហោះហើរទៅកាន់ទីនោះ ក៏ជួយអភិវឌ្ឍវិស័យទេសចរណ៍ក្នុងខេត្តឲ្យកាន់តែរីកចម្រើនទ្វេដងថែមទៀត» ៕
ចែករំលែកព័តមាននេះ