ផ្លូវលំសណ្ដស្ទឹងព្រែកត្នោតនៅសង្កាត់ទៀនដែលដាច់ត្រូវបានតភ្ជាប់ឡើងវិញហើយ
រាជធានីភ្នំពេញ ៖ លោក នុត ពុធដារ៉ា អភិបាលខណ្ឌដង្កោបានប្រាប់កោះសន្តិភាពតាមទូរស័ព្ទកាលពីវេលាល្ងាចថ្ងៃទី២៤ តុលាថា
រាជធានីភ្នំពេញ ៖ លោក នុត ពុធដារ៉ា អភិបាលខណ្ឌដង្កោបានប្រាប់កោះសន្តិភាពតាមទូរស័ព្ទកាលពីវេលាល្ងាចថ្ងៃទី២៤ តុលាថា
រាជធានីភ្នំពេញ ៖ លោក នុត ពុធដារ៉ា អភិបាលខណ្ឌដង្កោបានប្រាប់កោះសន្តិភាពតាមទូរស័ព្ទកាលពីវេលាល្ងាចថ្ងៃទី២៤ តុលាថា កំណាត់ផ្លូវលំសណ្ដស្ទឹងព្រែកត្នោត ត្រង់ចំណុចផ្លូវកោងភូមិសាលា សង្កាត់ទៀន ខណ្ឌដង្កោ ដែលត្រូវបានកម្លាំងទឹកហៀរពីស្ទឹងព្រែកត្នោត បុកខ្លាំងបណ្ដាលឲ្យបាក់ដាច់ប្រមាណជាង៧០ម៉ែត្រនោះ ត្រូវបានតភ្ជាប់ឡើងវិញហើយនាវេលាម៉ោង៤រសៀលថ្ងៃដដែលនោះ បន្ទាប់ពីការខិតខំជម្នះរាល់ការលំបាកក្នុងការទប់ទឹកពីសំណាក់ក្រុមការងារ ក្រសួងធនធានទឹក និងអាជ្ញាធរខណ្ឌ អស់រយៈពេលជិត១០ថ្ងៃកន្លងមកនេះ ។
ក្រោយពេលផ្លូវដាច់ អាជ្ញាធរខណ្ឌបានសហការជាមួយក្រសួងធនធានទឹកបានទប់ឡើងវិញ ដោយខាងក្រសួងមានកម្លាំងមន្ត្រីបច្ចេកទេស និងគ្រឿងចក្រព្រមទាំងរថយន្តដឹកដីដាក់ប្រចាំការ ។ ចំណែកខាងអាជ្ញាធរខណ្ឌ បានរកទីតាំងជីកដី សម្រាប់ដឹកយកទៅច្រកបាវដាក់ទប់រហូតពេលនេះ ទប់បានសម្រេចជាស្ថាពរឡើងវិញហើយ ។
តាមប្រភពព័ត៌មានពីមន្ត្រីសាលាសង្កាត់ទៀនបានឲ្យដឹងកាលពីថ្ងៃទី២៣ តុលាថា ផ្លូវទំនប់សណ្ដស្ទឹង ត្រង់ចំណុចភូមិសាលា សង្កាត់ទៀននេះ គឺជាចំណុចផ្លូកោង ដោយទីនោះមានស្ពានតូចមួយផងដែរ ។ ដោយសារតែបែបនេះ ទើបពេលទឹកឡើងហូរខ្លាំង ក៏បានបុកបណ្ដាលឲ្យដាច់ ។ មិនតែប៉ុណ្ណោះទំនប់នេះមានសារសំខាន់ខ្លាំងណាស់ ក្នុងការការពារមិនឲ្យលិចភូមិឋានប្រជាពលរដ្ឋ ដីស្រែរាប់រយហិកតា និងផ្លូវថ្នល់ជាច្រើនកន្លែង ហើយបន្ទាប់ពីផ្លូវនោះដាច់បានបង្កឲ្យមានការលិចលង់គ្រប់កន្លែង ជាពិសេសកំណាត់ផ្លូវលេខ២១៧ ហៅផ្លូវចំការដូង ។
ដោយឡែកមន្ត្រីនគរបាលប៉ុស្ដិ៍ស្ពានថ្មមួយរូប បានឲ្យដឹងថា ផ្លូវលេខ២១៧ ត្រូវបានទឹកលិចបង្កឲ្យមានការបិទចរាចរណ៍រយៈពេលមួយសប្តាហ៍មកហើយ ក៏ព្រោះតែការបាក់ផ្លូវ ទំនប់សណ្ដស្ទឹងត្រង់ចំណុចខាងលើនោះ ប៉ុន្តែនៅពេលផ្លូវខាងលើនេះ ត្រូវបានតភ្ជាប់ឡើងវិញនោះ ទឹកលែងហូរធ្លាក់មកថែមទៀត កំណាត់ផ្លូវ២១៧ នោះក៏លែងលិចទៀតដែរ និងអាចស្រករីងនៅពេលប៉ុន្មានថ្ងៃខាងមុខឆាប់ៗនេះ ។ប៉ុន្តែមួយរយៈនៃការលិចទឹកនោះ បានធ្វើឲ្យកំណាត់ផ្លូវចំការដូងនេះ ត្រូវបានទឹកហូតដាច់ច្រើនកន្លែងផងដែរ ហើយចរាចរណ៍ក៏អាចត្រូវបានវាងបណ្ដោះអាសន្នទម្រាំទឹកស្រកអស់ និងមានការជួសជុលឡើងវិញ ៕
ចែករំលែកព័តមាននេះ