លោក ធន សារ៉ាយ ប្រធានសមាគមអាដហុក ខកខានមិនបានចូលបំភ្លឺតុលាការក្នុងនាមសាក្សី
រាជធានីភ្នំពេញ ៖ លោក ធន សារ៉ាយ ប្រធានសមាគមអាដហុក នៅព្រឹកថ្ងៃទី២៤ ខែតុលា បានអវត្តមានក្នុងការចូលទៅបំភ្លឺតាមដីកាកោះ
រាជធានីភ្នំពេញ ៖ លោក ធន សារ៉ាយ ប្រធានសមាគមអាដហុក នៅព្រឹកថ្ងៃទី២៤ ខែតុលា បានអវត្តមានក្នុងការចូលទៅបំភ្លឺតាមដីកាកោះរបស់លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ ។ យោងតាមដីកាចុះថ្ងៃទី៧ ខែតុលា លោកចៅក្រម ធាម ច័ន្ទពិសិដ្ឋ បានកោះហៅលោក ធន សារាយ ប្រធានសមាគមអាដហុក ក្នុងឋានៈជាសាក្សីឲ្យចូលទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរជុំវិញដំណើររឿងសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ ប្រព្រឹត្តនៅរាជធានីភ្នំពេញ កាលពីអំឡុងខែមីនា-មេសា ឆ្នាំ២០១៦ ។
សូមបញ្ជាក់ថា ពាក់ព័ន្ធនឹងករណីអវត្តមានក្នុងការចូលខ្លួនរបស់លោក ធន សារាយ គេនៅពុំទាន់មានប្រភពណាបញ្ជាក់ពីមូលហេតុបែបណានៅឡើយទេ ក៏ប៉ុន្តែមន្ត្រីរដ្ឋបាលនៃសមាគមអាដហុក បានសរសេរលើដីកាកោះថា លោក ធន សារាយ ជាប់បំពេញបេសកកម្មនៅក្រៅប្រទេស ។
គួរបញ្ជាក់ថា បុគ្គលិកសមាគមអាដហុកចំនួន៤រូប ត្រូវបានលោក ធាម ច័ន្ទពិសិដ្ឋ ចៅក្រមសើុបសួរសាលាដំបូងរាជធានីភ្នំពេញ សម្រេចចេញដីកាឃុំខ្លួនជាបណ្តោះអាសន្ន កាលពីល្ងាចថ្ងៃទី២ ខែឧសភា ឆ្នាំ២០១៦ ក្រោយពីលោក គុជ គីមឡុង ព្រះរាជអាជ្ញារងអមសាលាដំបូងរាជធានីភ្នំពេញ សម្រេចចោទប្រកាន់ជាផ្លូវការ គឺ ១-លោក នី សុខា ប្រធានផ្នែកស៊ើបអង្កេត ២-លោក ណៃ វ៉ង់ដា អនុប្រធានផ្នែកស៊ើបអង្កេត ៣-លោក យី សុខសាន្ត អនុប្រធានផ្នែកស៊ើបអង្កេត និង៤-លោកស្រី លឹម មុន្នី មន្ត្រីស៊ើបអង្កេតជាន់ខ្ពស់ ពីបទសូកប៉ាន់សាក្សី យោងតាមមាត្រា៥៤៨ នៃក្រមព្រហ្មទណ្ឌកម្ពុជា ។
ចំណែកលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) និងជាអតីតបុគ្គលិកអាដហុកដែរនោះ ក៏បានជាប់ឃុំនៅពន្ធនាគារប៉េហ្សុីពីបទ សមគំនិតសូកប៉ានសាក្សី យោងតាមបទប្បញ្ញត្តិមានចែងតាមមាត្រា២៩ និងមាត្រា៥៤៨ នៃក្រមព្រហ្មទណ្ឌកម្ពុជា ។ រហូតមកដល់ពេលនេះ ជនជាប់ចោទទាំង៥នាក់ មិនទាន់ត្រូវបានវិនិច្ឆ័យទោសនៅឡើយទេ ពោលគឺឃុំខ្លួនជាបណ្ដោះអាសន្ន ដើម្បីធ្វើការស៊ើបអង្កេត ។
រឿងក្ដីទាក់ទងនឹងក្រុមបុគ្គលិកសមាគមអាដហុក និងមន្ដ្រី គ.ជ.ប គឺបានចេញពីសំណុំរឿងស្នេហារវាងលោក កឹម សុខា និងនាង ខុម ចាន់តារាទី ៕
ចែករំលែកព័តមាននេះ