លោកអធិការរងខណ្ឌពោធិ៍សែនជ័យម្នាក់ត្រូវគេវាយហើមមុខ
រាជធានីភ្នំពេញ ៖ លោកអធិការរងទទួលបន្ទុកផ្នែកនគរបាលយុត្តិធម៌ខណ្ឌពោធិ៍សែនជ័យត្រូវបុរសម្នាក់វាយចំក្រោមភ្នែកចំហៀងខាងស្តាំបង្កឲ្យមានការភ្ញាក់ផ្អើលកាលពី…
រាជធានីភ្នំពេញ ៖ លោកអធិការរងទទួលបន្ទុកផ្នែកនគរបាលយុត្តិធម៌ខណ្ឌពោធិ៍សែនជ័យខណៈទាស់សម្តីគ្នាក៏ត្រូវបុរសម្នាក់វាយចំក្រោមភ្នែកចំហៀងខាងស្តាំបង្កឲ្យមានការភ្ញាក់ផ្អើលកាលពីវេលាម៉ោង៦ និង៤០នាទីព្រលប់ ថ្ងៃទី២៤ ខែតុលា ឆ្នាំ២០១៦ តាមបណ្ដោយផ្លូវបេតុងអត់លេខ ស្ថិតក្នុងភូមិមានជ័យ សង្កាត់ស្ទឹងមានជ័យ ខណ្ឌមានជ័យ ។
ជនរងគ្រោះមានឈ្មោះ កិត វណ្ណៈ ភេទប្រុស អាយុ៤០ឆ្នាំ មានតួនាទីជា អធិការរង ទទួលបន្ទុកផ្នែកនគរបាលយុត្តិធម៌ខណ្ឌពោធិ៍សែនជ័យ ស្នាក់នៅផ្ទះលេខ៣១០ ផ្លូវលំ សង្កាត់ចោមចៅ ខណ្ឌពោធិ៍សែនជ័យ ។ ចំណែកជនបង្កមានឈ្មោះ ផន សុភា ភេទប្រុស អាយុ៤៣ឆ្នាំ ស្នាក់នៅផ្ទះលេខ២២៧ ផ្លូវលំ ភូមិមានជ័យ សង្កាត់ស្ទឹងមានជ័យ ខណ្ឌមានជ័យ ។
តាមសម្តីជនរងគ្រោះបាននិយាយថា មុនពេលកើតហេតុ រូបគាត់បានបើករថយន្តម៉ាកកាមរីបាឡែន ពណ៌កណ្តុរល្មែះជូនម្តាយរបស់គាត់ទៅផ្ទះនៅក្រោយវត្តស្ទឹងមានជ័យ ដោយធ្វើដំណើរតាមផ្លូវបេតុងអត់លេខ ក្នុងទិសដៅពីត្បូងទៅជើង ខណៈមកដល់ចំណុចកើតហេតុដោយសារផ្លូវតូចចង្អៀតហើយស្ទះចរាចរណ៍ ស្រាប់តែបុរសជាជនបង្កបានជិះម៉ូតូម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ 1BR-0662 ធ្វើដំណើរតាមផ្លូវបេតុងអត់លេខដែរទិសដៅពីជើងទៅត្បូង(បញ្ច្រាសទិសគ្នា)ក្នុងស្ថានភាពស្រវឹងបានជិះមកឈប់ពីមុខរថយន្តគាត់ រួចបើកភ្លើងហ្វាម៉ូតូចុះឡើងៗ ពេលនោះរូបគាត់បានចុចកញ្ចក់រថយន្ត រួចសួរថា មានរឿងអី ស្រាប់តែជនបង្ករូបនោះមិននិយាយស្ដីអ្វីទាំងអស់ បានចុះពីលើម៉ូតូស្ទុះមកវាយរូបគាត់១ដៃចំក្រោមភ្នែកចំហៀងខាងស្តាំបណ្តាលឲ្យហើមបន្តិច ពេលនោះរូបគាត់បានចុះពីលើរថយន្តដើម្បីសួរនាំ តែជនបង្កបានស្ទុះទៅវាយគាត់ទៀត តែត្រូវបានប្រជាពលរដ្ឋដែលនៅក្បែរនោះជួយឃាត់ទាន់ បន្តិចក្រោយមកទើបសមត្ថកិច្ចមូលដ្ឋានបានចុះទៅដល់កន្លែងកើតហេតុ និងនាំខ្លួនជនបង្ក និងរូបគាត់ទៅសាកសួរនៅប៉ុស្តិ៍នគរបាលស្ទឹងមានជ័យ ។
ក្រោយពេលឃាត់ខ្លួនជនបង្កយកទៅសួរនាំ ជនបង្កមិនបាននិយាយស្ដីអ្វីទាំងអស់ ហើយស្វាងស្រវឹងបន្តិចដឹងកំហុសបានលើដៃសំពះសុំទោសជនរងគ្រោះ ប៉ុន្តែជនរងគ្រោះមិនព្រមលើកទោសឲ្យទេ បានដាក់ពាក្យបណ្ដឹងទាមទារជំងឺចិត្តចំនួន៥០០ដុល្លារ ប៉ុន្តែជនបង្កអត់មានលុយ បានត្រឹមតែសុំទោសប៉ុណ្ណោះ ។ បន្ទាប់មកដោយសារតែចរចាគ្នាអត់ត្រូវ ជនរងគ្រោះសូមឲ្យសមត្ថកិច្ចធ្វើតាមនិតិវិធី ៕
ចែករំលែកព័តមាននេះ