រាជធានីភ្នំពេញ ៖ បុរសម្នាក់បើករថយន្តដឹកស្វាយ មកដល់គោលដៅនគរបាលចរាចរណ៍ ក្រោមស្ពានអាកាស៧មករា រវល់តែដកប្រាក់បង់ឱ្យនគរបាលចរាចរណ៍ មិនបានបន្ថយល្បឿន ក៏ជ្រុលទៅបុករថយន្តមួយគ្រឿងទៀតចំពីមុខពេញទំហឹង បណ្ដាលឱ្យរងការខូចខាត កើតឡើងកាលពីវេលាម៉ោង១១ និង៥០នាទីយប់ថ្ងៃទី២៤ តុលា ស្ថិតនៅត្រង់ចំណុចក្រោមស្ពានអាកាស៧មករា តាមបណ្ដោយផ្លូវ៥៩៨ ក្នុងសង្កាត់ទឹកល្អក់១ ខណ្ឌទួលគោក ។
តាមប្រភពពីកន្លែងកើតហេតុឱ្យដឹងថា គេឃើញរថយន្តមួយគ្រឿងម៉ាកហ៊ីណូ ពណ៌.ស ពាក់ស្លាកលេខភ្នំពេញ 3D-0446 មានដឹកផ្លែស្វាយពេញរថយន្ត ចំណុះ៣តោនកន្លះ ជិះដោយបុរសពីរនាក់មិនស្គាល់ឈ្មោះ ក្នុងទិសដៅពីត្បូងទៅជើង តាមបណ្តោយផ្លូវ២៧១ក្នុងល្បឿនមធ្យម ។ លុះមកដល់ចំណុចកើតហេតុ ដោយសារតែម្ចាស់រថយន្តរវល់តែងាកដកប្រាក់បង់ឱ្យនគរបាលចរាចរណ៍ ដែលប្រចាំការណ៍គោលដៅត្រង់ចំណុចនោះ មិនបានមើលរថយន្តវីហ្គោ ពណ៌ទឹកប្រាក់ ពាក់ស្លាកលេខភ្នំពេញ2X-6409បើកបរដោយបុរសពីរនាក់ បើកតាមផ្លូវ៥៩៨ក្នុងទិសដៅពីត្បូងទៅជើង ហើយបំណងបត់ឆ្វេង ក៏បណ្ដាលឱ្យរថយន្តទាំងសងខាងបុកផ្ទប់គ្នាចំពីមុខពេញទំហឹង ធ្វើឱ្យរថយន្តវីហ្គោកំពិតចំហៀងខាងមុខខាងស្ដាំ ចំណែករថយន្តដឹកស្វាយវិញកំពិតខាងមុខតែបន្តិចប៉ុណ្ណោះ តែមិនបង្កគ្រោះថ្នាក់ដល់អ្នកបើកបររថយន្តទាំងសងខាងនោះឡើយ ។
ក្រោយពេលកើតហេតុ ខាងរថយន្តបង្កបានទាក់ទងហៅថៅកែរថយន្តរបស់ខ្លួនឱ្យមកជួយដោះស្រាយជាមួយរថយន្តរងគ្រោះហើយខាងបង្ក ក៏ព្រមចេញថ្លៃខូចខាតរថយន្តទាំងស្រុង ទៅខាងរថយន្តរងគ្រោះដើម្បីបញ្ចប់រឿង ។
ចែករំលែកព័តមាននេះ