ខេត្តក្រចេះ ៖ ពលរដ្ឋមានគ្នាប្រមាណជិត២០០នាក់ រស់នៅឃុំគោលាប់ ស្រុកចិត្របុរី បានលើកគ្នាមករំដោះយកគោយន្តដឹកឈើរបស់ពួកគាត់ចំនួន៦គ្រឿង ចេញពីកណ្តាប់ដៃកងរាជអាវុធហត្ថលើផ្ទៃប្រទេសយកទៅផ្ទះវិញ ក្រោយពីមានការចុះឡោមព័ទ្ធចាប់ឃាត់នៅលើផ្លូវលំក្បែរផ្លូវជាតិលេខ៧អស់ជាច្រើនម៉ោង ។
ខេត្តក្រចេះ ៖ ពលរដ្ឋមានគ្នាប្រមាណជិត២០០នាក់ រស់នៅឃុំគោលាប់ ស្រុកចិត្របុរី បានលើកគ្នាមករំដោះយកគោយន្តដឹកឈើរបស់ពួកគាត់ចំនួន៦គ្រឿង ចេញពីកណ្តាប់ដៃកងរាជអាវុធហត្ថលើផ្ទៃប្រទេសយកទៅផ្ទះវិញ ក្រោយពីមានការចុះឡោមព័ទ្ធចាប់ឃាត់នៅលើផ្លូវលំក្បែរផ្លូវជាតិលេខ៧អស់ជាច្រើនម៉ោង ។
ភាពតានតឹងនៅលើកំណាត់ផ្លូវជាតិលេខ៧ បានកើតឡើងតាំងម៉ោង៤ទៀបភ្លឺ រហូតដល់ម៉ោង៩ព្រឹកថ្ងៃទី២២ តុលា នៅលើផ្លូវលំក្នុងឃុំគោលាប់ ក្បែរទីបញ្ជាការកងរាជអាវុធហត្ថស្រុកចិត្របុរី រវាងប្រជាពលរដ្ឋជាច្រើនរយនាក់ ជាមួយនឹងកម្លាំងកងរាជអាវុធ ហត្ថលើផ្ទៃប្រទេស និងកងអាវុធហត្ថស្រុក និងខេត្តជាង៣០នាក់។ បានប្រកែកតវ៉ាគ្នាតឹងសសៃ.ក ផ្តើមចេញពីករណីបង្ក្រាបគោយន្តកន្ត្រៃដឹកឈើគ្រាក់ធ្នង់ បន្តិចមកក៏ត្រូវបានធូរស្រាលវិញ បន្ទាប់ពីពលរដ្ឋប្រុស-ស្រីក្មេងចាស់ជិត២០០គ្រួសារ សុទ្ធសឹងមានទីលំនៅឃុំគោលាប់ បាននាំគ្នាចេញមករំដោះយកគោយន្តទាំង៦គ្រឿងរបស់ពួកគាត់វិញ ដោយសម្រេចទម្លាក់ឈើអុសគ្រាក់ធ្នង់ទាំងនោះ ចោលនៅចិញ្ចើមផ្លូវ ។
មេឃុំគោលាប់ លោក ឈុំ ឆូយ ដែលមានវត្តមានក្នុងការចុះសម្របសម្រួលដោះស្រាយភាពតានតឹង រវាងពលរដ្ឋជាមួយនឹងកម្លាំងអាវុធហត្ថជិត៣០នាក់ ដែលបានឡោមព័ទ្ឋគោយន្តកន្ត្រៃដឹកឈើរបស់ពួកគាត់៦គ្រឿងនោះ មានប្រសាសន៍ថា ស្ថានការណ៍នោះ មិនបានបង្កឲ្យប៉ះពាល់រហូតមានគ្រោះថ្នាក់ដល់បងប្អូនប្រជាពលរដ្ឋណាម្នាក់នោះទេ ។ ក្រោយពីមានការចរចាមិនត្រូវគ្នា រវាងពលរដ្ឋជាមួយនឹងមន្ត្រីកងរាជអាវុធហត្ថលើផ្ទៃប្រទេស ដែលមានបញ្ជាបេសកកម្មឲ្យមកបង្ក្រាបបទល្មើសព្រៃឈើមិនរើសមុខ និងឈរលើជំហរបង្ក្រាបយ៉ាងដាច់អហង្ការ តែក៏ត្រូវបានធូរស្រាល និងរំសាយវិញបន្ទាប់ពីពលរដ្ឋបះបោរនាំគ្នាឡើងលើគោយន្តកន្ត្រៃទាំង៦គ្រឿង ស្រាយឈើគ្រាក់ធ្នង់ទម្លាក់ចោល ហើយបានបើកគោយន្តទាំងនោះត្រឡប់ចូលផ្ទះរៀងៗខ្លួន ។ ចំណែកឯឈើទាំង នោះ ក៏ត្រូវបានមេព្រៃនាំយកទៅរក្សាទុក ។
ពលរដ្ឋដែលរងការចាប់យកឈើទាំងនោះបានលើកឡើងថា ឈើទាំងនេះត្រូវបានពួកគាត់ចូលទៅព្រៃជ្រៅៗ ជីកកាយពីក្នុងដីដែលត្រូវគេឈូយឆាយកប់ចោល ដឹកយកមកសម្រាប់លក់ គ្រាន់បានលុយបង់រំលស់តម្លៃគោយន្តដែលទិញបណ្ដាក់ ។ ពួកគាត់និយាយទៀតថា ពួកគាត់ពិបាកណាស់ ទំរាំជីកយកគល់ឈើទាំងនេះបាន ដោយត្រូវចំណាយពេលជាង១០ថ្ងៃនៅក្នុងព្រៃ ឆ្លងទឹកព្រែក អូរ កាត់ព្រៃកាត់ផ្សៃ ទំរាំបានឈើយកមកលក់បានកម្រៃបន្តិចបន្ទួច គ្រាន់ដោះស្រាយជីវភាព ។ ហើយចំនួនឈើអុសគ្រាក់ធ្នង់ដែលពួកគាត់បានយកមកពីក្នុងព្រៃ ដឹកតាមគោយន្តទាំង៦គ្រឿងនេះ មានបរិមាណជិតមួយម៉ែត្រគូបតែប៉ុណ្ណោះ ។
ពួកគាត់ទទួលស្គាល់ថា របរនេះគឺពិតជាខុសច្បាប់ តែគ្មានជម្រើសសំរាប់ពួកគាត់ ខណៈដែលពួកគាត់ទាំងអស់គ្នា សុទ្ឋតែបានទិញគោយន្តបណ្ដាក់តម្លៃ ដោយការបង់រំលស់ទៅក្រុមហ៊ុន និងលួចចូលដឹកឈើតិចតួចគ្រាន់បានកម្រៃចិញ្ចឹមឆ្នាំង ។ ម្យ៉ាងទៀត ពួកគាត់បានមើលឃើញថា ការដឹកជញ្ជូនឈើតាមរូបភាពទ្រង់ទ្រាយធំនៅតែកើតមាន ម្លោះហើយពួកគាត់ក៏លួចឆក់កណ្តៀតទៅជាមួយគេឯង ក្រែងមានកម្រៃខ្លះៗ ។
ពួកគាត់ក៏បានអំពាវនាវដល់មន្ត្រីកងរាជអាវុធហត្ថលើផ្ទៃប្រទេស គួរប្រើប្រាស់កណ្តាប់ដៃធ្ងន់ៗនេះ ទៅលើឈ្មួញរកស៊ីធំៗផង មិនគួរយកកាំបិតបុ័ងតោសម្លាប់កូនមាន់ដែលដឹកជញ្ជូនតិចតួចគ្រាន់ចិញ្ចឹមឆ្នាំងបែបនេះ ហើយការឡោមព័ទ្ឋពួកគាត់ ប្រៀបដូចពួកគាត់ជាអ្នកទោសឧក្រិដ្ឋជនធ្ងន់ធ្ងរ ។ សួរថា ឈ្មួញឈើធំៗ និងពួកគាត់ មួយណាត្រូវបង្ក្រាបមុន ?
មិនអាចរកការបំភ្លឺបាននៅឡើយទេ ពីក្រុមមន្ត្រីកងរាជអាវុធហត្ថ ដែលអនុវត្តច្បាប់បង្ក្រាបគោយន្តដឹកគល់ឈើគ្រាក់ធ្នង់ទាំងនេះ៕
ចែករំលែកព័តមាននេះ