ខេត្តពោធិ៍សាត់ ៖ អស់រយៈពេលជាង២ថ្ងៃមកហើយ ដែលក្រុមចោរបាននាំគ្នាចូលគាស់ទូដែកតម្កល់លុយរាប់លានដុល្លារនៅរោងចក្រ «តៃអ៊ីហ្ស៊ី» ស្ថិតក្នុងស្រុកក្រគរ ហើយសមត្ថកិច្ចចម្រុះកំពុងបន្តស្រាវជ្រាវស្វែងរកជនល្មើស។
នៅថ្ងៃទី១២ ខែឧសភា ឆ្នាំ២០២២នេះ មន្ត្រីប៉ូលិសក្រសួងមហាផ្ទៃ នឹងប្រើសត្វសុនខ (សត្វឆ្កែ) ពិសេស ជំនាញខាងហិតក្លិន ដើម្បីស្រាវជ្រាវបន្ត។
បើតាមសមត្ថកិច្ចបានឲ្យដឹងថា ក្រុមចោរមានគ្នា៤នាក់ បានប្រើស្រោមដៃ, បិទរបាំងមុខបំភាន់ អត្តសញ្ញាណធ្វើសកម្មភាពអំឡុងម៉ោង១ទៀបភ្លឺ ថ្ងៃទី១០ ខែឧសភា ហើយបានកាច់បំបាក់កាមេរ៉ាសុវត្ថិភាពនៅតាមគោលដៅសំខាន់ៗមុនពេលចូលទៅប្លន់យកលុយទាំងនោះ។
សមត្ថកិច្ចបន្តថា ក្រុមចោរបានកាត់សោទ្វារបងខាងមុខ និងចូលក្នុងបន្ទប់ដោយរើកកាយ គាស់កំទេចទូដែកចំនួន៤ហើយ រួចប្រមូលលុយដុល្លារ និងឯកសារ សម្ភារៈមានតម្លៃមួយចំនួននៅក្នុងទូដែក បន្ទាប់មកក៏រត់គេចខ្លួនបាត់ដោយសុវត្ថិភាព។
បើតាមប្រភពខ្លះក៏បានឲ្យដឹងថា លុយនៅក្នុងទូដែកនោះ គឺមានរាប់លានដុល្លារ ដោយសារ ទើបដកមកពីធនាគារ ដើម្បីត្រៀមបើកប្រាក់ខែដល់កម្មកររាប់ពាន់នាក់។
តាមការសន្និដ្ឋានជាបឋមពីសមត្ថកិច្ច បានបង្ហើបឱ្យដឹងថា ក្រុមចោរអាចជាមនុស្សធ្វើការក្នុងរោងចក្រនោះ ព្រោះដឹងសព្វកន្លែងផ្ទៃក្នុងរបស់រោងចក្រ។ មេក្រុមសំខាន់ៗជាច្រើននាក់ រួម ទាំងជនបរទេសផង ត្រូវបានប្រមូលឲ្យមកផ្ដិតមេដៃ ដើម្បីធ្វើកោសល្យវិច័យ ហើយក្រុមជំនាញក៏កំពុងប្រើសត្វសុនខ (ឆ្កែ) ពូកែហិតក្លិន ដើម្បីចុះស្រាវជ្រាវដល់ទីតាំងនោះផ្ទាល់ទៀតផង៕
ចែករំលែកព័តមាននេះ