ផ្លូវបេតុងចំនួន៥ខ្សែ ដែលជាគម្រោងរបស់ក្រសួងអភិវឌ្ឍន៍ជនបទតាមរយៈធនាគារពិភពលោក បានត្រូវស្ថាបនានៅក្នុងស្រុកត្បូងឃ្មុំ ស្រុកអូររាំងឪ និងក្រុងសួង ដើម្បីជួយសម្រួលដល់
ខេត្តត្បូងឃ្មុំ ៖ ផ្លូវបេតុងចំនួន៥ខ្សែ ដែលជាគម្រោងរបស់ក្រសួងអភិវឌ្ឍន៍ជនបទតាមរយៈធនាគារពិភពលោក បានត្រូវស្ថាបនានៅក្នុងស្រុកត្បូងឃ្មុំ ស្រុកអូររាំងឪ និងក្រុងសួង ដើម្បីជួយសម្រួលដល់ការធ្វើដំណើររបស់ប្រជា
ពលរដ្ឋ ក៏ដូចជាការដឹកជញ្ជូនកសិផលទៅផ្សារបានឆាប់រហ័ស និងទាន់ពេលវេលា ។
លោក អាន ស៊ីណា ប្រធានមន្ទីរអភិវឌ្ឍន៍ជនបទខេត្ត នារសៀលថ្ងៃទី១០ ខែឧសភា ឆ្នាំ២០២២ បានឲ្យដឹងថា ដោយសារមានការស្នើសុំពីប្រជាពលរដ្ឋ និងក្រោមការចង្អុលបង្ហាញពីសំណាក់ឯកឧត្តមឧបនាយករដ្ឋមន្ត្រី ជា សុផារ៉ា ប្រធានក្រុមការងារថ្នាក់ជាតិចុះជួយខេត្តត្បូងឃ្មុំ និងឯកឧត្តម អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានយកចិត្តទុកដាក់ជួយស្ថាបនាផ្លូវបេតុង ដោយចាប់ពីចំណុចក្បែរសាលាឃុំទន្លេបិទ បន្តមកដល់ស្ពានព្រែកតាខ្វាន់ ក្នុងឃុំទន្លេបិទ ស្រុកត្បូងឃ្មុំ តែដោយសារគ្រោះធម្មជាតិនៅរដូវទឹកជំនន់ពីទន្លេមេគង្គ ធ្វើឱ្យផ្លូវបេតុងនៅព្រែកតាខ្វាន់រងការខូចខាតដោយអន្លើកាលពីឆ្នាំ២០១៨ ។
លោកប្រធានមន្ទីរបន្តទៀតថា ពេលដែលគម្រោងជួសជុលបានទម្លាក់មកនៅក្នុងរដូវប្រាំងឆ្នាំ២០២១ ផ្លូវបេតុងនិងស្ពានព្រែកតាខ្វាន់ត្រូវបានធ្វើការជួសជុលកែលម្អឲ្យប្រសើរឡើងវិញ។ ជាមួយនេះ ក៏បានបន្តការស្ថាបនាផ្លូវបេតុងបន្តរហូតទៅដល់វត្តព្រះធាតុ ក្នុងស្រុកអូរាំងឪ ដែលមានចម្ងាយ១២,៥០គីឡូម៉ែត្រ មកដល់ពេលនេះ ស្ថាបនាបានប្រមាណ ៩៧%ហើយ ។ ក្រៅពីនេះក៏មានផ្លូវបេតុងចំនួន៤ខ្សែទៀតរួមមាន ៖
១-ចាប់ពីចំណុចផ្សារអូររាំងឪ ឆ្ពោះមកដំណាក់ព្រីង មានចម្ងាយ១២គីឡូម៉ែត្រ ។
២-ចាប់ពីគល់ស្ពានពាមជីលាំង បន្តមកដល់សាលាឃុំថ្មពេជ្រ មានចម្ងាយ១២គីឡូម៉ែត្រ ។
៣-ចាប់ពីចំណុចវត្តវិហារហ្លួង ក្រុងសួង មកដល់ភូមិព្នៅ ឃុំល្ងៀង ស្រុកត្បូងឃ្មុំ មានចម្ងាយ ៧,៥០គីឡូម៉ែត្រ ។
៤-ចាប់ពីចំណុចសាលាឃុំរកាពប្រាំ មកដល់ភូមិព្រលិត មានចម្ងាយ ១៤,៥០គីឡូម៉ែត្រ ។
លោក អាន ស៊ីណា បញ្ជាក់ថា មកដល់បច្ចុប្បន្ន ក្រុមជំនាញវិស្វករកំពុងចុះសិក្សាពីគម្រោងសាងសង់ស្ពានបេតុងអង់កូ ដែលបានបាក់ស្រុតប្រវែងជិត១០០ម៉ែត្រ ដែលគ្រោងនឹងសាងសង់នៅពេលឆាប់ៗខាងមុខ ។ នេះជាការយកចិត្តទុកដាក់របស់ថ្នាក់ដឹកនាំមូលដ្ឋាន រហូតដល់ថ្នាក់ដឹកនាំខេត្ត ព្រមទាំងក្រសួង ដើម្បីជួយដល់ប្រជាពលរដ្ឋរស់នៅតាមដងទន្លេមេគង្គ ។
សូមបញ្ជាក់ថា ផ្លូវបេតុងមួយខ្សែក្នុងឃុំទន្លេបិទ ប្របតាមដងទន្លេមេគង្គ ងាយស្រួលក្នុងការធ្វើដំណើររបស់ប្រជាពលរដ្ឋតាមមធ្យោបាយយានយន្តគ្រប់ប្រភេទ មកកាន់ជីហែក្នុងស្រុកកោះសូទិន ងាយស្រួលនិងចំណាយពេលវេលាឆាប់ ដែលអាចចំណេញវាងផ្លូវសែនតស៊ូ ប្រហែលជាងកន្លះម៉ោងនៅក្នុងរដូវប្រាំង។
ដោយឡែកក្នុងរដូវវស្សា បើទឹកទន្លេឡើងមកលិចផ្លូវបេតុង នោះចាំបាច់ត្រូវតែជិះវាងតាមផ្លូវសែនតស៊ូ ៕
ចែករំលែកព័តមាននេះ