ក្រុមឈ្មួញនៅតែបន្តលួចនាំសត្វជ្រូករស់ពីប្រទេសយួន ឆ្លងដែនដោយខុសច្បាប់ចូលមកប្រទេសខ្មែរ ទាំងថ្ងៃ ទាំងយប់ ដូចគេហែកឋិនដដែល ប្រមាណ២០០ក្បាលទៅ៥០០ក្បាល នៅត្រង់ចំណុចច្រកទ្វារព្រំដែន
ខេត្តព្រៃវែង ៖ ក្រុមឈ្មួញនៅតែបន្តលួចនាំសត្វជ្រូករស់ពីប្រទេសយួន ឆ្លងដែនដោយខុសច្បាប់ចូលមកប្រទេសខ្មែរ ទាំងថ្ងៃ ទាំងយប់ ដូចគេហែកឋិនដដែល ប្រមាណ២០០ក្បាលទៅ៥០០ក្បាល នៅត្រង់ចំណុចច្រកទ្វារព្រំដែនស្វាយអាង៉ោង ស្ថិតនៅភូមិចាម ឃុំចាម ស្រុកកំពង់ត្របែក ខេត្តព្រៃវែង។
ទាក់ទិនករណីនេះ សមត្ថកិច្ចនគបាលវរការពារព្រំដែនប៉ុស្តិ៍ច្រកទ្វារព្រំដែនស្វាយអាង៉ោង បានបំភ្លឺយ៉ាងខ្លីថា ករណីឈ្មួញលួចនាំជ្រូកពីប្រទេសវៀតណាមចូលមកពិតប្រាកដមែន គឺក្រុមហ៊ុនគេមានអាជ្ញាប័ណ្ណនាំជ្រូករស់ចូល មិនមែនតែមួយច្រកទេ គឺបានលួចនាំចូលតាមច្រករបៀងផ្សេងៗទៀត នៅចំណុចពាមទា មន្ត្រីប៉ុស្តិ៍ការពារព្រំដែនគ្រប់គ្រងមិនបានទេ ដោយនៅឆ្ងាយពីប៉ុស្តិ៍ពិបាកបង្ក្រាប ដោយសារភូមិសាស្ត្រព្រំដែនវែង កៀកភូមិអ្នកស្រុក និងឈ្មួញអាចគេចពីសមត្ថកិច្ចយ៉ាងឆាប់រហ័ស។
បើតាមសមត្ថកិច្ចម្នាក់ សុំមិនបញ្ចេញឈ្មោះ បានបង្ហើបឲ្យដឹងថា នៅថ្ងៃទី១១ ខែឧសភា ឆ្នាំ២០២២ នៅវេលាម៉ោង៧និង០០នាទីព្រឹក រហូតដល់ម៉ោង១និង១៥នាទីរសៀល មានឈ្មួញនាំសត្វជ្រូករស់ពីប្រទេសវៀតណាមប្រមាណ១៥០ក្បាលឆ្លងព្រំដែន តាមច្រករបៀងនៃប៉ុស្តិ៍ច្រកទ្វារព្រំដែនស្វាយអាង៉ោង កាត់មុខវរៈការពារព្រំដែនតែម្តង ដឹកតាមម៉ូតូ និងតាមម៉ូតូរ៉ឺម៉ក ឃ្លុំជិត ទៅទម្លាក់នៅផ្ទះកន្លែងស្តុកជ្រូកដ៏ធំមួយរបស់ឈ្មោះ វឿន ស្ថិតនៅក្នុងភូមិរការធំ ឃុំចាម ស្រុកកំពង់ត្របែក ខេត្តព្រៃវែង រួចសាងលើរថយន្តសាំយ៉ុង និងរថយន្តម៉ាក់ហ៊ីយ៉ាន់ដាយ កូរ៉េចំណុះ២តោន បិទឃ្លុំជិត រួចបើកឡើងតាមផ្លូវកៅស៊ូឆ្ពោះទៅផ្សារកអណ្តើក និងឡើងលើផ្លូវជាតិលេខ១ បត់ឆ្វេងទៅលិច ឲ្យទៅក្រុមហ៊ុនធំមួយ ដឹកទៅរាជធានីភ្នំពេញតែម្តង។
ប្រភពដដែលបន្តថា នៅពេលមានបទល្មើសកើតឡើង សមត្ថកិច្ចនគរបាលវរការពារព្រំដែនប៉ុស្ត៍ច្រកទ្វារព្រំដែនស្វាយអាង៉ោង មិនបានធ្វើការបង្ក្រាបនោះទេ តែងតែឆ្លើយយករួចខ្លួន ទំនងជាត្រូវជាមួយឈ្មួញហើយមើលទៅ។ ហើយចំពោះអ្នករកស៊ីនាំជ្រូករស់ពីប្រទេសវៀតណាម ឆ្លងដែនចូលមកចំណុចប៉ុស្តិ៍ច្រកទ្វារស្វាយអាង៉ោង និងស្លាបទាំងពីរនៃប៉ុស្តិ៍ស្វាយអាង៉ោងភូមិចាម ឃុំចាមនេះ មានច្រើននាក់ ដោយខ្លះគេនាំយកទៅឲ្យក្រុមហ៊ុន ដឹកទៅរាជធានីភ្នំពេញ ដែលគេប្រាប់ថា យកទៅកុងស៊ីកា.ប់ជ្រូកធំបឹងក្រពើលើ ។ ប្រសិនបើមេពេទ្យសត្វធំនៅក្រសួងចង់ទប់ស្កាត់មិនពិបាកទេ ទៅសួរក្រុមហ៊ុននៅទីនោះ ប្រាកដជាដឹងច្បាស់ ឬមួយគ្នាឯង។
បើតាមមន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្មខេត្តព្រៃវែង បានឲ្យដឹងថា បញ្ហាក្រុមហ៊ុនដែលមានអាជ្ញាប័ណ្ណនាំជ្រូករស់ពីប្រទេសវៀតណាម ចូលមកខ្មែរនោះ គឺ ច្បាប់សុំនាំជ្រូកមេពូជ មកផ្គត់ផ្គង់ដល់កសិករចិញ្ចឹម ដោយក្នុង១ថ្ងៃចំនួន៥០ក្បាល ក៏ប៉ុន្តែឈ្មួញបន្លំដឹកជ្រូកសាច់ «កន្ទេលធំបន្លំដេក» ។ កន្លងមក មន្ត្រីពេទ្យសត្វបានចុះល្បាតទប់ស្កាត់ និងបង្ក្រាបដែរ ដោយមានបទបញ្ជាពីឯកឧត្តមអភិបាលខេត្ត ឲ្យមន្ត្រីជំនាញសហការជាមួយសមត្ថកិច្ចពាក់ព័ន្ធចុះទប់ស្កាត់ និងបង្ក្រាប មិនអនុញ្ញាតិឲ្យនាំជ្រូករស់ ឬសាច់ជ្រូកពីប្រទេសជិតខាងទៀតនោះទេ ហើយនៅព្រឹកថ្ងៃទី១១ ខែឧសភា ឆ្នាំ២០២២នេះ មន្ត្រីការិយាល័យផលិតកម្ម និងបសុព្យាបាលខេត្ត និងក្រុមការងារចុះល្បាតនៅតាមតំបន់ព្រំដែន បើមានបទល្មើស ការនាំជ្រូកឆ្លងដែនដោយខុសច្បាប់ គឺបង្ក្រាប ហើយអនុវត្តតាមនីតិវិធី ប៉ុន្តែពេលចុះពិនិត្យ ចុះបង្ក្រាប ដូចបង្ក្រាបខ្យល់ ព្រោះខ្វែងគ្នាស្រឡះ ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ