រាជធានីភ្នំពេញ ៖ នៅព្រឹកថ្ងៃទី២៤ ខែតុលា ឆ្នាំ២០១៦នេះ កម្លាំងនគរបាលមន្ទីរប្រឆាំងគ្រឿងញៀន ក្រសួងមហាផ្ទៃ បានបញ្ជូនមេក្លោងជនជាតិចិនម្នាក់ទៀតក្នុងចំណោម២នាក់ បញ្ជូនទៅកាន់សាលាដំបូងរាជធានីភ្នំពេញ ក្រោមការសួរនាំពីលោកព្រះរាជអាជ្ញារង ស្រី ស៊ឺ វណ្ណី បន្ទាប់ពីជនសង្ស័យជាជនជាតិចិនម្នាក់ ត្រូវបានបញ្ជូនទៅកាន់តុលាការ កាលពីព្រឹកម្សិលមិញនេះ។
សូមរម្លឹកថា កាលពីថ្ងៃទី២០ តុលា ២០១៦ បានបើកកិច្ចប្រតិបត្តិការបង្ក្រាបក្រុមជួញដូរគ្រឿងញៀនដ៏ធំមួយ ដោយឃាត់ខ្លួនបានជនជាតិចិន២នាក់ និងរឹបអូសវត្ថុតាងជាសារធាតុថ្នាំញៀន ជិត៥០គីឡូក្រាម ។ ប្រតិបត្តិការបង្ក្រាបគ្រឿងញៀនធំមួយនេះ ត្រូវបានធ្វើឡើងនៅក្នុងរាជធានីភ្នំពេញ ។
ជនសង្ស័យដែលជាជនជាតិចិន ត្រូវចាប់ខ្លួនទាំង២នាក់ ម្នាក់ឈ្មោះ ស៊ូ យាំងលាង ភេទប្រុស អាយុ៤១ឆ្នាំ និងម្នាក់ឈ្មោះ YANG DEYING ភេទប្រុស អាយុ៤៤ឆ្នាំ ។ សមត្ថកិច្ចបង្ហើបឱ្យដឹងទៀតថា ពេលនេះកំពុងធ្វើការស្រាវជ្រាវរកបក្សពួកក្រុមជួញដូរគ្រឿងញៀននេះបន្តទៀត ។
ទាក់ទិននឹងការចាប់ខ្លួនជនសង្ស័យត្រូវបានលោកឧត្តមសេនីយ៍ទោ សាន សុទ្ធី នាយករងមន្ទីរប្រឆាំងគ្រឿងញៀនបានឲ្យដឹងថា មុខសញ្ញាជួញដូរគ្រឿងញៀន១ក្រុមនេះ ត្រូវបានមន្ទីរប្រឆាំងគ្រឿងញៀនប្រើប្រាស់កម្លាំងជំនាញតាមដានសកម្មភាពច្រើនខែមកហើយទម្រាំចាប់បាន ។ ដំបូងសមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ស៊ូ យាំងលាង នៅត្រង់រង្វង់មូលទួលគោក សង្កាត់បឹងកក់២ ខណ្ឌទួលគោក រាជធានីភ្នំពេញ ខណៈពេលជននេះកំពុងដឹកជញ្ជូនគ្រឿងញៀនបម្រុងយកទៅប្រគល់ឲ្យមនុស្សផ្សេងទៀត ក្នុងនោះសមត្ថកិច្ចក៏បានដកហូតថ្នាំញៀននៅជាប់នឹងខ្លួនមានជាងកន្លះគីឡូក្រាម ។
ក្រោយពីការឃាត់ខ្លួនជនសង្ស័យសារភាពថា នៅមានលាក់ទុកនៅផ្ទះបក្សពួកខ្លួនមួយចំនួនទៀត ។ ពេលនោះសមត្ថកិច្ចក៏បាននាំជនសង្ស័យទៅដកហូតថ្នាំញៀនបានជាង៤៤គីឡូក្រាមទៀត ចំណែកម្ចាស់គ្រឿងញៀននេះត្រូវបានឈ្មោះ ស៊ូ យាំងលាង អះអាងថា ជាមេខ្លោងបានរត់គេចខ្លួនបាត់ហើយ ។
លោក សាន សុទ្ធី បន្តថា កិច្ចប្រតិបត្តិការនៅបន្តរហូតដល់ថ្ងៃទី២២ តុលា កម្លាំងជំនាញបានស្រាវជ្រាវ និងឈានទៅដល់ការឃាត់ខ្លួនជនសង្ស័យម្នាក់ទៀត គឺឈ្មោះ YANG DEYING និងដកហូតថ្នាំញៀនចំនួន៦ដុំ ស្មើនឹងជាង២គីឡូក្រាម ។ គ្រឿងញៀនដែលដកហូតបានពីជនជាតិចិនទាំងពីរនាក់នោះមាន ៖
១-ប្រភេទមេតំហ្វេតាមីន មានទម្ងន់១៩៨៨,១៨ក្រាម ។
២-ថ្នាំញៀនប្រភេទអិុចស្តាស៊ី មានចំនួន១៩៣០គ្រាប់ ស្មើនឹង៧១៣ក្រាម ។
៣-ថ្នាំញៀនប្រភេទកេតាមីនដប ចំនួន២០០០ដប ស្មើ១០០០ក្រាម ។
៤-សារធាតុម្សៅពណ៌សសម្រាប់កែច្នៃទៅជាគ្រឿងញៀន ចំនួន៤៤គីឡូក្រាម (៤៤គីឡូក្រាមនេះម្ចាស់វារត់បាត់) និងដកហូតពីឈ្មោះ YANG DEYING មានចំនួន៦ដុំស្មើជាង២គីឡូក្រាម សរុបជិត៥០គីឡូក្រាម ។
លោកឧត្តមសេនីយ៍ទោ សាន សុទ្ធី បន្តថា នេះជាលទ្ធផលដែលសមត្ថកិច្ចការិយាល័យទី៥ នៃមន្ទីរគ្រឿងញៀនបង្ក្រាបបាន ចាត់ទុកថាជាលទ្ធផលបណ្តោះអាសន្នប៉ុណ្ណោះ ។ ជាក់ស្តែងរង់ចាំធ្វើសន្និសីទសារព័ត៌មាននៅថ្ងៃនេះ (២៤ តុលា) ។
ទោះជាយ៉ាងណាក្តី ជនសង្ស័យម្នាក់ ត្រូវបានបញ្ជូនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី២៣ តុលា ដែលឃាត់ខ្លួនមុនដំបូងនោះជាការបំពេញនីតិវិធីប៉ុណ្ណោះ ចំណែកម្នាក់ទៀតទុកស្រាវជ្រាវរកចាប់បក្សពួកបន្ត ។
ទាក់ទិននឹងការនាំចូលសារធាតុគ្រឿងញៀនដ៏សន្ធឹកសន្ធាប់នេះ លោកឧត្តមសេនីយ៍ឯក ម៉ក់ ជីតូ បានមានប្រសាសន៍ថា ជនសង្ស័យបានដឹកជញ្ជូនតាមជើងគោកចេញពីប្រទេសឡាវ ចូលមកព្រះរាជាណាចក្រកម្ពុជា ប៉ុន្តែលោកឧត្តមសេនីយ៍មិនបានឱ្យដឹងព័ត៌មានលម្អិតថាចូលមកតាមច្រកខេត្តព្រះវិហារ ឬខេត្តស្ទឹងត្រែងនៅឡើយទេ ទំនងរង់ចាំទម្លាយក្នុងឱកាសសន្និសីទសារព័ត៌មានហើយមើលទៅ ៕
ចែករំលែកព័តមាននេះ