ខេត្តសៀមរាប ៖ បន្ទាប់ពីព័ត៌មានក្នុងស្រុក រួមជាមួយកោះសន្តិភាព បានចេញផ្សាយជុំវិញការចាក់សោបិទទ្វាររបងសំណង់គ្មានច្បាប់របស់លោក លឹម សុទ្រី អនុប្រធាន
ខេត្តសៀមរាប ៖ បន្ទាប់ពីព័ត៌មានក្នុងស្រុក រួមជាមួយកោះសន្តិភាព បានចេញផ្សាយជុំវិញការចាក់សោបិទទ្វាររបងសំណង់គ្មានច្បាប់របស់លោក លឹម សុទ្រី អនុប្រធានមន្ទីរសាធារណការ និងដឹកជញ្ជូនខេត្ត ដែលបិទមិនឱ្យពលរដ្ឋ៣គ្រួសារដែលនៅខាងក្រោយចេញចូលបាននោះ ពេលនេះត្រូវបានតំណាងអយ្យការអមសាលាដំបូងខេត្តសៀមរាប បានអនុវត្តដីកាសម្រេចឱ្យបើកទ្វារវិញហើយ កាលពីវេលាម៉ោង១០និង៤៥នាទីព្រឹកថ្ងៃទី២២ តុលា ស្ថិតនៅខាងក្រោយផ្សារសាមគ្គី ក្នុងភូមិស្លក្រាម សង្កាត់ស្លក្រាម ក្រុងសៀមរាប ។
គួររម្លឹកផងដែរថា បន្ទាប់ពីសំណង់របស់លោក លឹម សុទ្រី អនុប្រធានមន្ទីរសាធារណការខេត្ត បានសាងសង់ធ្វើរបងបិទផ្លូវមិនឱ្យប្រជាពលរដ្ឋទាំង៣គ្រួសារ មានផ្លូវចេញចូលទៅលំនៅឋានរបស់ពួកគាត់ ដែលនៅខាងក្រោយ មានរយះពេល៦ថ្ងៃ ចាប់តាំងពីថ្ងៃទី១៧ តុលារហូតដល់ថ្ងៃទី២២នេះ ត្រូវបានបើកជាស្ថាពរហើយ បន្ទាប់ពីតុលាការសំរេចចេញដីកាកាលពីថ្ងៃទី២១ តុលា ក្នុងការបើកសោទ្វាររបងរបស់លោកលឹម សុទ្រី នេះ ដោយមានការចូលរួមពីសំណាក់ លោក សែន ពិសី មេភូមិស្លក្រាម
និងអនុប្រធានប៉ុស្តិ៍នគរបាលសង្កាត់ស្លក្រាម ។
តាមប្រភពពីមន្ត្រីនគរបាលប៉ុស្តិ៍សង្កាត់ស្លក្រាម ដែលបានចុះទៅបើកសោទ្វាររបងរបស់លោក លឹម សុទ្រី បានប្រាប់ឱ្យដឹងនៅព្រឹកថ្ងៃទី២៣ តុលា ថា ក្រោយពីមានហេតុការណ៍កើតឡើងរវាងពលរដ្ឋ៣គ្រួសារ និងម្ចាស់ដីលោក លឹម សុទ្រី ដែលបានចាក់សោបិទទ្វាររបង មិនឱ្យពួកគាត់ចេញចូល អស់រយៈពេលជាយូរថ្ងៃមកហើយនោះ ត្រូវបានខាងតំណាងអយ្យការចេញដីកាសម្រេច កាលពីថ្ងៃទី២១ ខែតុលា ឆ្នាំ២០១៦ដោយចៅក្រមស៊ើបសួរលោក រ៉ែម សុភ័ក្រ បានឱ្យមកខាងប៉ុស្តិ៍នគរបាលសង្កាត់ស្លក្រាម និងលោកមេភូមិស្លក្រាម ចុះអនុវត្តផ្ទាល់ ដើម្បីឱ្យម្ចាស់យកសោមកបើកទ្វាររបងជាបន្ទាន់ ។
ប្រភពបានបន្តថា ក្រោយពីមានដីការបស់តុលាការ យកទៅឱ្យម្ចាស់ដីឈ្មោះ លឹម សុទ្រីអនុប្រធានមន្ទីរសាធារណៈការ និងដឹកជញ្ជូនខេត្តរួចមក លោកមិនបានចូលរួមបើកទ្វាររបងនោះទេ តែបានឱ្យកូនចៅយកសោមកបើក ដោយមានការចូលរួមពីលោកមេភូមិស្លក្រាម ឈ្មោះ សែន ពិសី និងលោកអនុសេនីយ៍ត្រី ធឹម រិទ្ធា
នាយរងប៉ុស្តិ៍នគរបាលសង្កាត់ស្លក្រាម បានអនុវត្ត ។ ខណៈពេលនោះប្រជាពលរដ្ឋទាំង៣គ្រួសារ ដែលរស់នៅខាងក្រោយ បានប្រាប់សមត្ថកិច្ចនិងលោកមេភូមិ ដែលចុះទៅបើកទ្វាររបង ថា ពួកគាត់នៅមានការភិតភ័យនៅឡើយខ្លាចពេលសមត្ថកិច្ចចេញទៅវិញ ម្ចាស់ផ្ទះលួចឱ្យកូនចៅយកសោមកចាក់ទៀត ។ ប៉ុន្តែខាងសមត្ថ
កិច្ចបានប្រាប់ពួកគាត់វិញថា មិនបាច់ខ្លាចទេព្រោះពួកខ្ញុំចុះមកនេះ គឺអនុវត្តតាមបញ្ជារបស់ដីកាតុលាការចេញដោយចៅក្រមស៊ើបសួរលោករ៉ែម សុភ័ក្រ នោះទេ ។ បើមានការអ្វី សូមទាក់ទងមកសមត្ថកិច្ចប៉ុស្តិ៍ទៅ ពួកគាត់នឹងចុះមកភ្លាម ។
គេនៅចាំបានថា ក្នុងពេលលើកគ្នាធ្វើការតវ៉ាឱ្យបើកទ្វារជាផ្លូវចេញចូលនោះ ក្រុមពលរដ្ឋទាំង៣គ្រួសារ បានព្រមានដុតខ្លួនទាំងគ្រួសារបើមិនព្រមបើកផ្លូវឱ្យចូលផ្ទះផងដែរ ៕
ចែករំលែកព័តមាននេះ