រាជធានីភ្នំពេញ ៖ លោក កាំង សេន ប្រធានគណៈកម្មការរៀបចំការប្រកួតបាល់ទាត់ពានរង្វាន់ KMH Champions Leaque 2016-2017 រដូវកាលទី២នៅក្នុងពិធីបើកការប្រកួតកាលពីថ្ងៃសៅរ៍ទី២២ តុលា កន្លងទៅនេះនៅលើទីលាន KMH ក្នុងខណ្ឌដង្កោបានប្រាប់ឱ្យដឹងថា ឆ្នាំនេះមានការបង្កើនប្រាក់រង្វាន់សម្រាប់ក្រុមជើងឯកចាប់ពី៨.០០០ដុល្លាររហូតដល់ទៅ១០.០០០ដុល្លារ ។ លោកបញ្ជាក់ថា គោលបំណងសំខាន់ក្នុងការបង្កើនប្រាក់រង្វាន់នេះ គឺដើម្បីជំរុញឱ្យការប្រកួតកាន់តែមានភាពស្វិតស្វាញ និងចាប់អារម្មណ៍កាន់តែខ្លាំងជាងមុន ។
កាលប្រកួតលើកមុនលោកបានត្រៀមប្រាក់រង្វាន់សម្រាប់ក្រុមជើងឯកត្រឹមពី៣.០០០ដល់៨.០០០ដុល្លារប៉ុណ្ណោះ ។ ប៉ុន្តែដោយសារតែមានការគាំទ្រកាន់តែច្រើនពីម្ចាស់ឧបត្ថម្ភកម្មវិធីធ្វើឱ្យរូបលោកសម្រេចចិត្តបង្កើនប្រាក់រង្វាន់ទ្វេដងបែបនេះ ។ លោកសង្ឃឹមថា ក្រុមទាំងអស់ក៏ដូចជាកីឡាករនឹងខិតខំធ្វើឱ្យការប្រកួតដំណើរការទៅកាន់តែល្អប្រសើរ និងទទួលបានការគាំទ្រកាន់តែខ្លាំង និងមានភាពល្បីល្បាញពីមួយឆ្នាំទៅមួយឆ្នាំ ។
ព្រឹត្តិការណ៍បាល់ទាត់ដណ្ដើមពានរង្វាន់ KMH Champions Leaque 2016-2017 ជាការប្រកួតពាក់កណ្ដាលអាជីពធំជាងគេនៅក្នុងប្រទេសដែលស្រដៀងទៅនឹងការប្រកួតបាល់់ទាត់អឺរ៉ុប ព្រោះថាការប្រកួតមានលក្ខណៈក្នុងដីនិងក្រៅដី (Home&Away)។
ដោយឡែកចំពោះលទ្ធផលនៃការប្រកួតថ្ងៃបើកឆាក ក្រុមម្ចាស់ជើងឯកឆ្នាំចាស់ Salt Fc បានត្រឹមស្មើ១-១ជាមួយក្រុម ISI Group ខណៈមួយប្រកួតទៀតក្រុម Anachak Baitong Fcបានយកឈ្នះក្រុម MV Fc នៅក្នុងលទ្ធផល៤-២ ៕
ចែករំលែកព័តមាននេះ