រាជធានីភ្នំពេញ ៖ បញ្ហាស្មុំកូនត្រូវបានរាជរដ្ឋាភិបាលកម្ពុជាយកចិត្តទុកដាក់ ពិសេសលើកស្ទូយសិទ្ធិសេរីភាពរបស់កុមារ នេះបើតាមការលើកឡើងរបស់លោករដ្ឋមន្ត្រីក្រសួងយុត្តិធម៌
រាជធានីភ្នំពេញ ៖ បញ្ហាស្មុំកូនត្រូវបានរាជរដ្ឋាភិបាលកម្ពុជាយកចិត្តទុកដាក់ ពិសេសលើកស្ទូយសិទ្ធិសេរីភាពរបស់កុមារ នេះបើតាមការលើកឡើងរបស់លោករដ្ឋមន្ត្រីក្រសួងយុត្តិធម៌ ។
លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ បានថ្លែងក្នុងសិក្ខាសាលាផ្សព្វផ្សាយស្តីពី «សេចក្តីពន្យល់អំពីស្មុំកូនក្នុងប្រទេស» នាព្រឹកថ្ងៃទី១៩ ខែតុលា នៅសណ្ឋាគារអាំងទែរកុងទីណង់តាល់ថា កន្លងមកតាមរយៈនៃការស្មុំកូនពីកម្ពុជា មានជនខិលខូចមួយចំនួនបានជ្រកក្រោមឈ្មោះអង្គការ ហើយយកកុមារកម្ពុជាមួយចំនួនទៅលក់ ហេតុនេះហើយទើបប្រមុខរាជរដ្ឋាភិបាលកម្ពុជាឱ្យមានការប្រុងប្រយ័ត្នជានិច្ច ចៀសវាងត្រូវជនខិលខូចប្រើរូបភាពបោកបញ្ឆោតយកកុមារកម្ពុជា ទៅជួញដូរ។
លោករដ្ឋមន្ត្រីបញ្ជាក់ថា «តាមប្រសាសន៍របស់សម្តេចតេជោ ឱ្យមានការប្រុងប្រយ័ត្នជានិច្ច កុំឱ្យការស្មុំកូនណាមួយយកទៅធ្វើជាអាជីវកម្ម ។ តាមខ្ញុំចាំ មានអង្គការមួយនោះ បានធ្វើអាជីវកម្មលើកូនខ្មែរ តាមរយៈការស្មុំកូនយកទៅលក់បានចំណេញរាប់លាន ។ រឿងនេះបានកើតឡើងប្រមាណ២០ឆ្នាំមុន ហេតុនេះហើយទើបនាពេលនេះយើងបានធ្វើច្បាប់ឱ្យបានម៉ត់ចត់ និងត្រឹមត្រូវឡើង» ។
លោករដ្ឋមន្ត្រីបន្តថា កុមារគ្រប់រូបតែងតែទទួលបាននូវការថែទាំ ការរីកចម្រើនធំធាត់ និងអភិវឌ្ឍន៍នៅក្នុងសង្គម និងនៅក្នុងគ្រួសារមួយដ៏ល្អ ប្រកបដោយភាពកក់ក្តៅ និងពេញសិទ្ធិ ។
ដោយមើលឃើញនូវសារប្រយោជន៍ទាក់ទង នឹងការយកចិត្តទុកដាក់កុមារនៅក្នុងគ្រួសារនេះហើយ ទើបកន្លងមកក្រសួងយុត្តិធម៌បានរៀបចំនូវបញ្ញត្តិគតិយុត្ត ស្តីពីការស្មុំកូននៅក្នុងក្រមរដ្ឋប្បវេណីព្រមទាំងបញ្ញត្តិផ្សេងៗមួយចំនួនទៀត។ ម្យ៉ាងទៀត ដើម្បីជាមូលដ្ឋានសម្រាប់ជំនួយស្មារតីដល់មន្ត្រីអនុវត្តច្បាប់ ក្រសួងយុត្តិធម៌ និងអង្គការយូនីសេហ្វ បានសហការគ្នារៀបចំឱ្យមានសេចក្តីពន្យល់នេះឡើង ។
លោករដ្ឋមន្ត្រីបានធ្វើការបញ្ជាក់ថា សេចក្តីពន្យល់នេះ គឺជាសមិទ្ធផលមួយថ្មីបន្ថែមទៀត គួរឱ្យមោទនៈរបស់ក្រសួងយុត្តិធម៌ និងក៏ជាស្នាដៃមួយដែលបានរៀបចំដោយក្រុមការងារដែលមានជំនាញផ្នែកច្បាប់ច្បាស់លាស់ និងមានបទពិសោធន៍ច្រើនឆ្នាំ ដោយមានការពន្យល់បកស្រាយបំភ្លឺចំពោះចំណុចនីមួយៗ ស្របទៅនឹងខ្លឹមសារនៃច្បាប់ដែលពាក់ព័ន្ធទាំងអស់ ព្រមទាំងលើកនូវឧទាហរណ៍ជាក់ស្តែង ងាយយល់ បែងចែកច្បាស់លាស់អំពីភាពខុសគ្នាពីចំណុចមួយ ទៅចំណុចមួយ ហើយគ្របដណ្តប់នូវទិដ្ឋភាពទាំងអស់ ដែលទាក់ទងទៅនឹងការស្មុំកូននៅក្នុងព្រះរាជាណាចក្រកម្ពុជា ។
លោកស្រី Debora Commini តំណាង អង្គការយូនីសេហ្វ បានបញ្ជាក់នៅក្នុងពិធីនេះដែរថា បទប្បញ្ញត្តិគតិយុត្តស្តីពីការស្មុំកូននៅក្នុងក្រមរដ្ឋប្បវេណី ដែលបានអនុម័តនៅឆ្នាំ២០០៧ ពិតជាមានសារៈសំខាន់ណាស់ដល់ប្រទេសកម្ពុជា ដើម្បីជាវិធានការមួយការពារដល់អនីតិជន ដែលត្រូវបានគេរំលោភបំពាន និងក៏ដូចការពារសិទ្ធិសេរីភាពរបស់គេ ។ ក្រៅពីនេះ កម្ពុជាក៏មានអនុសញ្ញាស្តីពីទិដ្ឋភាពផ្នែកស៊ីវិលនៃការចាប់ពង្រត់កុមារជាអន្តរជាតិ ដើម្បីការពារកុមារ ទាំងនៅក្នុងគ្រួសារក៏ដូចជាត្រូវបានគេស្មុំទៅ ។
លោកស្រីបន្តថា តាមរយៈការស្មុំកូននៅប្រទេសកម្ពុជា កន្លងមកគេឃើញមានការចន្លោះប្រហោង ហេតុនេះហើយក្រសួងយុតិ្តធម៌បានធ្វើការចេញសៀវភៅសេចក្តីពន្យល់អំពីការស្មុំកូនក្នុងប្រទេសបន្ថែម ។ គោលបំណងនៃការចេញសៀវភៅឯកសារនេះ គឺបង្ហាញពីគោលការណ៍សំខាន់ៗមួយចំនួន ពិសេសបែបបទក្នុងការស្នើសុំដើម្បីឱ្យគោលការណ៍នៃការស្មុំកូននេះ ប្រព្រឹត្តទៅដោយស្របច្បាប់ហើយច្បាស់លាស់ និងទប់ស្កាត់ការកើតមានបញ្ហាល្មើសច្បាប់ណាមួយ។ ការធ្វើបែបនេះ គឺសំដៅយ៉ាងណាឱ្យកុមាររស់នៅក្រោមការថែទាំបានល្អ ។
លោកស្រីបន្តថា ឯកសារនៃការស្មុំកូន គឺជារបស់មួយយ៉ាងសំខាន់ដើម្បីឱ្យការអនុវត្តការស្មុំកូននេះ ប្រព្រឹត្តទៅដោយភាពត្រឹមត្រូវ និងពិសេសកុមារទទួលបាននូវសិទ្ធិសេរីភាពពេញលេញ ហើយគេអាចរស់នៅក្នុងគ្រួសារថ្មីមួយប្រកបដោយភាពកក់ក្តៅ និងមានអនាគតភ្លឺស្វាងផងដែរ ៕
ចែករំលែកព័តមាននេះ