ពួកអ្នកវិទ្យាស្ថានរុស្ស៊ីបានរកឃើញមូលដ្ឋានអាថ៌កំបាំងមួយដែលពួកណាហ្ស៊ីកសាងឡើងនាសម័យសង្គ្រាមលោកលើកទី២ហើយត្រូវបោះបង់ចោលយ៉ាងយូរ ។
ក្រោយបោះបង់ចោលជិត៧០ឆ្នាំមូលដ្ឋានសម្ងាត់នោះដែលពួកណាហ្ស៊ីកសាងកាលពីឆ្នាំ១៩៤២ទើបត្រូវបានរកឃើញដោយពួកអ្នកស្រាវជ្រាវរុស្ស៊ី១ក្រុម ។ មានឈ្មោះថា «SCHATZGRABER» មូលដ្ឋាននោះស្ថិតនៅតំបន់អាក់ទិកលើកោះដែនដីអាឡិចសាន់ដ្រា ចម្ងាយ១.០០០គ.មពីប៉ូលខាងជើង ។ មូលដ្ឋាន «SCHATZGRABER» នាសម័យកាលនោះប្រើជាមូលដ្ឋានយោធា កន្លែងស្តុកទុកគ្រាប់រំសេវព្រមទាំងរបស់របរឧតុនិយមនិងយុទ្ធសាស្ត្រ ។ ឈ្មោះរបស់មូលដ្ឋានយោធានោះដែលមានន័យថាអ្នករុករករតនៈវត្ថុត្រូវបានគេបកស្រាយម្យ៉ាងទៀតថាពួកណាហ្ស៊ីកសាងមូលដ្ឋាននោះក៏មានបេសកកម្មមួយទៀតក្នុងតំបន់ដាច់ស្រយាលនៃផែនដីដែលមានអាថ៌កំបាំងបំផុតតាមរុករករតនៈវត្ថុអាថ៌កំបាំងឬរបស់បុរាណ ។
កាលពីទសវត្សឆ្នាំ១៩៤០ពួកណាហ្ស៊ីបានបង្ខំចិត្តបោះបង់ចោលទីតាំងនោះ ក្រោយពីកងទ័ពដាក់ពង្រាយនៅទីនោះរង ការវាយប្រហារដោយជំងឺធ្លងយ៉ាងសាហាវមួយទាក់ទិនការបរិភោគសាច់ខ្លាឃ្មុំតំបន់ប៉ូល ។ ពួកអ្នកនៅរស់រានមានជីវិតត្រូវបានសង្គ្រោះ ដោយនាវាមុជទឹកអាល្លឺម៉ង់១គ្រឿង ។
ពួកអ្នកវិទ្យាសាស្ត្ររកឃើញនៅលើទីតាំងរូងក្រោមដីដែលរងការបំផ្លាញនូវប៊ីដុងប្រេង គ្រាប់កាំភ្លើងច្រេះចាប់ទាំងឡាយព្រមទាំងក្រដាសឯកសារនានាផង ។ របស់របរអស់ទាំងនោះ ភាគច្រើននៅល្អព្រោះអាចរក្សាបានដោយធាតុអាកាសត្រជាក់ ។
នៅសម័យសង្គ្រាមលោកលើកទី២កោះមានទីតាំងយោធាសម្ងាត់នោះដើរតួនាទីសំខាន់សម្រាប់ការព្យាករណ៍ឧតុនិយមចាំបាច់សម្រាប់រៀបចំផែនការធ្វើចលនាកងទ័ព នាវាមុខទឹក និងនាវាចម្បាំងទាំងឡាយ ។
ចែករំលែកព័តមាននេះ