លោក ធន សារាយ ប្រធានសមាគមអាដហុកអវត្តមានក្នុងចូលបំភ្លឺ
រាជធានីភ្នំពេញ ៖ លោក ធន សារាយ ប្រធានសមាគមអាដហុក នៅព្រឹកថ្ងៃទី២៤ ខែតុលា ឆ្នាំ២០១៦ នេះ បានអវត្តមានក្នុងការចូលទៅបំភ្លឺតាមដីកាកោះរបស់ …
រាជធានីភ្នំពេញ ៖ លោក ធន សារាយ ប្រធានសមាគមអាដហុក នៅព្រឹកថ្ងៃទី២៤ ខែតុលា ឆ្នាំ២០១៦ នេះ បានអវត្តមានក្នុងការចូលទៅបំភ្លឺតាមដីកាកោះរបស់លោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ ។
យោងតាមដីកាកោះចុះថ្ងៃទី០៧ ខែតុលា ឆ្នាំឆ្នាំ២០១៦ លោកចៅក្រម ធាម ច័ន្ទពិសិដ្ឋ បានកោះហៅឈ្មោះ ធន សារាយ ប្រធានសមាគមអាដហុក ក្នុងឋានៈជាសាក្សីឲ្យចូលទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរជុំវិញពីដំណើររឿងសូកប៉ាន់សាក្សី តាមមាត្រា៥៤៨ នៃក្រមព្រហ្មទណ្ឌ ប្រព្រឹត្តនៅរាជធានីភ្នំពេញ កាលពីអំឡុងខែមិនា-មេសា ឆ្នាំ២០១៦ ។
សូមបញ្ជាក់ថា ពាក់ព័ន្ធករណីអវត្តមានក្នុងការចូលខ្លួនរបស់លោក ធន សារាយ នៅពុំទាន់មានប្រភពណាបញ្ជាក់ពីមូលហេតុសមស្របឡើយ ក៏ប៉ុន្តែមន្ត្រីរដ្ឋបាលនៃសមាគមអាដហុកបានសរសេរលើដីកាកោះថា លោកធន សារាយ បានជាប់បំពេញបេសកកម្មនៅក្រៅប្រទេស ។
គួរបញ្ជាក់ថា មន្ត្រីសមាគមអាដហុក៤រូបត្រូវបានលោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ សម្រេចចេញដីកាឃុំខ្លួនជាបណ្តោះអាសន្នកាលពីល្ងាចថ្ងៃទី០២ ខែឧសភា ឆ្នាំ២០១៦ ក្រោយពីជនជាប់ចោទទាំង៤រូបនេះត្រូវបានលោក គុជ គីមឡុង ព្រះរាជអាជ្ញារងអមសាលាដំបូងរាជធានីភ្នំពេញសម្រេចចោទប្រកាន់ឈ្មោះ នី សុខា ប្រធានផ្នែកស៊ើបអង្កេតសមាគមអាដហុក, ឈ្មោះ ណៃ វ៉ង់ដា ជាអនុប្រធានផ្នែកស៊ើបអង្កេតសមាគមអាដហុក, ឈ្មោះ យី សុខសាន្ត អនុប្រធានផ្នែកស៊ើបអង្កេតសមាគមអាដហុក និងឈ្មោះ លឹម មុនី មន្ត្រីអង្កេតជាន់ខ្ពស់សមាគមអាដហុក ពីបទសូកប៉ាន់សាក្សី យោងតាមមាត្រា៥៤៨ នៃក្រមព្រហ្មទណ្ឌកម្ពុជា និងលោក នី ចរិយា អគ្គលេខាធិការរង គ.ជ.ប ពីបទសមគំនិតសូកប៉ានសាក្សី បទបញ្ញត្តិមានចែងតាមមាត្រា២៩ និងមាត្រា៥៤៨ នៃក្រមព្រហ្មទណ្ឌកម្ពុជា រហូតមកដល់ពេលនេះជនជាប់សង្ស័យ៤នាក់មិនទាន់ត្រូវបានវិនិច្ច័យទោសនៅឡើយទេ ពោលគឺឃុំខ្លួនស្ថិតក្នុងការស៊ើបអង្កេត ៕
ចែករំលែកព័តមាននេះ