រាជធានីភ្នំពេញ ៖ មកទល់ពេលនេះ រវាងតារាពីរដួង គឺលោកប៉ែន ចំរ៉ុង និងអ្នកនាង ភិន សុដាលិស បានបន្តរាលដាលនូវកំដៅកាន់តែខ្លាំងឡើងៗ បន្ទាប់ពីមានការយល់ឃើញផ្សេងៗគ្នា និងវាយប្រហារដាក់គ្នាពីភាគីអ្នកគាំទ្រអ្នកទាំងពីរ ខណៈដែលលោក
អ៊ិន សុភិន ជាឪពុកអ្នកនាងភិន សុដាលិស ហើយអតីតស្វាមីនាងលោកប៉ែន ចំរ៉ុង បានស្នើសុំឱ្យបញ្ចប់នូវការចុះផ្សាយបញ្ហាមួយនេះ ។
គេសង្កេតឃើញថា បន្ទាប់ពីតារាសម្តែងមេម៉ាយវ័យក្មេងនាងភិន សុដាលិស បានសម្រាលកូនស្រីម្នាក់ ដែលជាតំណក់ឈាមតែមួយរបស់លោកប៉ែន ចំរ៉ុង រួចមក មានមហាជនជាច្រើនបានដាក់បន្ទុក និងមានការស្តីបន្ទោសយ៉ាងខ្លាំងចំពោះលោកប៉ែន ចំរ៉ុង ដែលបានកាត់ផ្តាច់និស្ស័យពីអ្នកនាងភិន សុដាលិស និងកូនដែលទើបតែចាប់កំណើតនាពេលនេះ ។
លោកប៉ែន ចំរ៉ុង ត្រូវបានគេស្តីបន្ទោសថា មិនបាននឹកនាដល់កូនស្រីរបស់ខ្លួន ក្នុងពេលដែលមិនមានវត្តមាន ទៅមើលកូនស្រីដែលទើបចាប់កំណើតនោះ ។ ប៉ុន្តែ បើក្រឡេកមើលពីអ្នកគាំទ្រភាគីខាងលោកប៉ែន ចំរ៉ុង វិញ ពួកគេបានវាយបកមកលើអ្នកនាង ភិន សុដាលិស ដែលមានចិត្តរឹងរូស និងមិនមានការអត់ឱនអធ្យាស្រ័យ នៅពេលដែលលោក ប៉ែន ចំរ៉ុង បានព្យាយាមស្កាត់ជួបមុខកូន នៅឯមន្ទីរពេទ្យ តែត្រូវសុដាលិស មិនព្រមឱ្យជួបទៅវិញ។
យ៉ាងណាក៏ដោយ មានការលើកឡើងថា ការដែលភិន សុដាលិស មិនអនុញ្ញាតឱ្យលោក ប៉ែន ចំរ៉ុង ចូលជួបមុខកូន នាពេលនេះដោយសារតែមូលហេតុ ភិន សុដាលិស មានការឆ្អែតចិត្តចំពោះលោកប៉ែន ចំរ៉ុង ដែលបានអះអាងប្រាប់តុលាការថា កូនក្នុងផ្ទៃរបស់ភិន សុដាលិស ទំនងអាចមិនមែនជាកូនរបស់ខ្លួនឡើយ។
បញ្ហាដែលបានលើកឡើងនាពេលនេះ បានធ្វើឲ្យលោក ប៉ែន ចំរ៉ុង បានចេញមកប្រតិកម្មលើកដំបូង តាមបណ្តាញសង្គមហ្វេស
ប៊ុក ក្នុងនោះ លោកបានចាត់ទុកការលើកឡើងនោះ មិនមានមូលដ្ឋានច្បាស់លាស់ ហើយលោកបានស្នើឲ្យបណ្តាញសារព័ត៌មានដែលមិនបានដឹងរឿងផ្ទៃក្នុងច្បាស់លាស់ ឱ្យបញ្ចប់ការចុះផ្សាយ។
តាមសំណេររបស់លោកប៉ែន ចំរ៉ុង បានឱ្យដឹងថា «ភិនសុដាលិស ឆ្អែតចិត្តនឹងសម្តី ប៉ែន ចំរ៉ុង កាលគ្រានៅតុលាការ ទើបមិនឲ្យជួបមុខកូនស្រី) រឿងនៅតុលាការ តុលាការបានសំរេចសាលក្រមរួចរាល់ហើយ ហើយពេលនោះ នៅក្នុងតុលាការយ៉ាងណាមានតែតុលាការ ចៅក្រម មេធាវី និងសាមីខ្លួន ទើបដឹងរឿងពិតយ៉ាងច្បាស់ ។ សូមមេត្តាបណ្តាសារព័ត៌មាន និងអ្នកអត់ដឹងរឿងច្បាស់ បញ្ឈប់សកម្មភាព ដែលធ្វើអោយសម្ពន្ធភាព និងជីវភាពរស់នៅរបស់អ្នកដទៃ មានបញ្ហាបានទេ ឬគ្រាន់តែជាអាជីព ។ លោកបញ្ជាក់ថា ខ្ញុំមិនបកស្រាយ គឺខ្ញុំមានហេតុផលរបស់ខ្ញុំ ហើយក៏គ្រាន់តែមិនចង់បន្តបញ្ហាជាមួយអ្នកណាទៀត ព្រោះអ្វីៗត្រូវបានបញ្ចប់ហើយ ។ តែរឿងកូន និងឪពុក គឺរឿងមនោសញ្ចេតនាមួយផ្សេងទៀត សូម្បីតែច្បាប់ ក៏មិនអាចកាត់ផ្តាច់បានដែរ ។សូមទោសទុកជាមុន បើការបញ្ចេញមតិរបស់ខ្ញុំប៉ះពាល់ដល់សតិអារម្មណ៍អ្នកណាម្នាក់ (ថ្ងែស្អែកមានរឿងអីកើតឡើង គ្មានអ្នកណាដឹងទេ សូមរក្សាទឹកចិត្តល្អ ការគិតល្អ ស្វែងរកអនាគតល្អ ដើម្បីរស់ក្នុងពិភពលោកដ៏ស្រស់ស្រាយនេះបន្តទៀត» ។
ជាការកត់សម្គាល់ ក្រោយពីការបញ្ចេញសារខាងលើនេះ លោកអ៊ិន សិភិន ក៏បានបញ្ចេញជាវីដេអូឃ្លីបមួយ និងបានបញ្ជាក់ពីមូលហេតុសំខាន់ៗនៃរឿងរ៉ាវរវាងលោក ប៉ែន ចំរ៉ុង និងកូនស្រីរបស់លោក ភិន សុដាលិស ។
តាមរយៈវីដេអូឃ្លីប លោក អ៊ិន សុភិន បានឱ្យដឹងថា លោកប៉ែន ចំរ៉ុង ដែលបានធ្វើកន្លងមក គឺហាក់ដូចជាជ្រុលបន្តិចហើយ ដោយគាត់បានបោកកូនស្រីខ្ញុំ និងគ្រួសារខ្ញុំយកទៅលែងសើច បំរើអារម្មណ៍គាត់រយៈពេលមួយឆ្នាំហើយ គឺសមល្មម ដែលគាត់ត្រូវបញ្ចប់ ។ លោកបញ្ជាក់ថា លោក ប៉ែន ចំរ៉ុង បានបញ្ជាកូនស្រីរបស់លោកមកមើលងាយឪពុកម្តាយ និងក្រុមគ្រួសារខ្លួនឯង និងធ្វើអ្វីទៅតាមចិត្តគាត់ធ្វើ ហើយអ្វីដែលគាត់បានធ្វើទៅហើយ ហើយគាត់បានប្តឹងលែងលះកូនស្រីរបស់ខ្ញុំយ៉ាងថោកទាបបំផុត។
ដោយឡែក សម្រាប់កូនស្រីដែលទើបតែចាប់កំណើតនាពេលនេះ ត្រូវបានលោក ប៉ែន ចំរ៉ុង តែងតែដាក់ទំនាយតាំងពីគ្នាមានអាយុ៣ខែថា កូននឹងកើតមកអត់គ្រប់ដៃ គ្រប់ជើង កូននឹងកើតមកឆ្កួតដូចម្តាយរបស់វា ប៉ុន្តែខុសពីការពិត គឺចៅស្រីរបស់ខ្ញុំកើតមកគ្រប់ដៃជើង មានសុខភាពល្អទាំងម្តាយនិងកូន ហើយគ្មានអ្វីកើតឡើង តែយើងនៅតែបារម្ភទៅថ្ងៃមុខនឹងទៅជាយ៉ាងមេច ព្រោះខ្ញុំមិនដឹងថា ឪពុករបស់គេជាឪពុករបៀបណាទេ ដែលបានដាក់ទំនាយកូនខ្លួនឯងតាំងពីកូនមិនមានអវះយវះពេញនៅក្នុង
ផ្ទៃ។
យ៉ាងណាក៏ដោយ លោក អ៊ិន សុភិន បានស្នើសុំឲ្យបញ្ចប់រឿងរ៉ាវកូនស្រីរបស់លោកត្រឹមនេះ ព្រោះរឿងទាំងអស់ គ្មានអ្នកណាចង់កើតបែបនេះឡើយ ហើយលោកក៏បានស្នើឲ្យប្រិយមិត្តគាំទ្រ និងតារាមួយចំនួនដែលតែងតែគាំទ្រលោកប៉ែន ចំរ៉ុង សុំឲ្យបញ្ឈប់ត្រឹមនេះ ព្រោះខ្លួនក៏ជាស្រី ហើយមានម្តាយ និងប្អូនជាស្រីដូចគ្នា ប្រសិនបើកើតឡើងចំពោះក្រុមគ្រួសារខ្លួនវិញនោះ គឺមានការឈឺចាប់ដូចគ្នា ។
ចែករំលែកព័តមាននេះ