ខេត្តក្រចេ៖ សត្វក្តាន់ប្រមាណ៧០ក្បាល ដែលជាសត្វកម្រនៅលើពិភពលោក ត្រូវបានអ្នកវិទ្យាសាស្ត្រតាមដានរកឃើញកំពុងរស់នៅក្នុងតំបន់ទីជម្រកព្រៃវាលស្មៅនៃតំបន់ព្រៃទេសភាពមេគង្គក្នុងខេត្តក្រចេះ ។ នេះបើយោងតាមរបាយការណ៍មួយដែលបង្ហាញរបស់ក្រសួងបរិស្ថានដែលបានឱ្យយដឹង កាលពីប៉ុន្មានថ្ងៃមុននេះ ។
លទ្ធផលនៃការស្រាវជ្រាវក៏បានបង្ហាញផងដែរពីវត្តមាននៃសត្វក្តាន់វ័យជំទង់ និងកូនជាច្រើន ដែលជាកត្តាចង្អុលបង្ហាញពីការបន្តពូជរបស់សត្វដ៏កម្រប្រភេទនេះនៅក្នុងតំបន់ទីជម្រក ខណៈក្រសួងបរិស្ថាន និងអង្គការ WWF កំពុងរៀបចំរបាយការណ៍ស្តីពីស្ថានភាព និងចំនួនសត្វក្តាន់ សម្រាប់ការចេញផ្សាយនាពេលខាងមុខនេះ។
សូមបញ្ជាក់ថា សត្វក្តាន់ត្រូវបានកំណត់ក្នុងបញ្ជីក្រហមរបស់អង្គការ IUCN ថា ជាប្រភេទសត្វរងគ្រោះថ្នាក់ជិតផុតពូជជាសកល ហើយនៅក្នុងប្រទេសកម្ពុជា សត្វក្តាន់នេះធ្លាប់ត្រូវបានអ្នកវិទ្យាសាស្ត្រប៉ាន់ប្រមាណថា បានផុតពូជទៅហើយរហូតដល់មានការរកឃើញឡើងវិញនៅក្នុងឆ្នាំ ២០០៦ នៅក្នុងខេត្តក្រចេះ ។ ក្រុមអ្នកស្រាវជ្រាវបាននិយាយថា សត្វក្តាន់បាននិងកំពុងទទួលរងការគំរាមកំហែងដោយការបាត់បង់ទីជម្រក ការបរបាញ់ និងវិបត្តិអន្ទាក់ ដែលបានរាលដាលឡើងដោយការជួញដូរសត្វព្រៃខុសច្បាប់។
សម្រាប់ខេត្តក្រចេះព្រៃសត្វក្តាន់ គឺនៅមាននៅសល់តិចតួចប៉ុណ្ណោះ ដែលត្រូវបាននិងកំពុងតែបន្តអភិរក្សដោយមន្ទីរបរិស្ថានខេត្ត ជាមួយនិងដៃគូរអភិរក្សនានា។ ព្រៃដែលសត្វក្តាន់ទាំងនោះកំពុងតែរស់នៅ គឺលាតសន្ធឹងនៅក្រោយឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ នៅលើផ្ទៃទំហំជិត១០០ហិកតា ។ ដោយសារកន្លងមកការបរបាញ់ក៏ដូចជាការដាក់អន្ទាក់ និងការកាប់ទន្រ្ទានយកដីធ្វើជាកម្មសិទ្ធិ ជាមួយនិងការកាប់អាច្រៀកយកឈើ បានធ្វើឲ្យចំនួនសត្វព្រៃក៏ដូចជាដីព្រៃដែនជម្រកសត្វតំបន់នោះប្រឈមនិងការវិនាស។
តែបើទោះជាបែបណាដីតំបន់នោះសព្វថ្ងៃ ត្រូវបានការពារយ៉ាងតឹងរឹងពីមន្រ្តីអភិរក្ស ដោយមានការបំផុសឲ្យមានចលនាចូលរួមពីអាជ្ញាធរគ្រប់មជ្ឈដ្ឋាន បានធ្វើឲ្យចំនួនសត្វព្រៃពិសេសសត្វក្តាន់មានតួរលេខកើនឡើងវិញ ។
ចែករំលែកព័តមាននេះ