លេងល្បិចចឹងតើ បានជាចាក់មិនត្រូវ ស៊ីរហូតសល់តែគូទខោ
ខេត្តកណ្ដាល ៖ កាលពីវេលាម៉ោងជាង១២ថ្ងៃត្រង់ ថ្ងៃទី២២ ខែតុលា ឆ្នាំ២០១៦ កម្លាំងនគរបាលស្រុកអង្គស្នួលបានធ្វើការបង្ក្រាបវង់ល្បែងអាប៉ោងបញ្ជាដោយតេឡេកម្មង់ …
ខេត្តកណ្ដាល ៖ កាលពីវេលាម៉ោងជាង១២ថ្ងៃត្រង់ ថ្ងៃទី២២ ខែតុលា ឆ្នាំ២០១៦ កម្លាំងនគរបាលស្រុកអង្គស្នួលបានធ្វើការបង្ក្រាបវង់ល្បែងអាប៉ោងបញ្ជាដោយតេឡេកម្មង់មួយកន្លែង ដោយធ្វើការចាប់ខ្លួនអ្នកបាញ់អាប៉ោងបាន៣នាក់នៅចំណុចក្នុងព្រៃឫស្សីលើទួលអង្គមួយកន្លែង ស្ថិតនៅខាងកើតភូមិស្វាយឧត្តម ឃុំសំរោងលើ ស្រុកអង្គស្នួល ។
ប្រភពពីសមត្ថកិច្ចបានឲ្យដឹងថា ក្រុមអ្នកញៀនល្បែងទាំង៣នាក់នោះមាន ១-ឈ្មោះ ឆេង ស្រេង ភេទប្រុស អាយុ៥២ឆ្នាំ ជនជាតិខែ្មរ មុខរបរលក់ផែ្លឈើ មានទីលំនៅក្នុងភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល ជាអ្នកបាញ់អាប៉ោង, ២-ឈ្មោះ ចុក ចក់ ភេទប្រុស អាយុ៧៤ឆ្នាំ ជនជាតិខែ្មរមុខរបរកសិករ មានទីលំនៅក្នុងភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ ជាអ្នកបាញ់អាប៉ោង, ៣-ឈ្មោះ សូ រាវុធ ភេទប្រុស អាយុ៥១ឆ្នាំ ជនជាតិខែ្មរ មុខរបរកសិករ មានទីលំនៅក្នុងភូមិខ្ចៅ សង្កាត់បឹងធំ ខណ្ឌពោធិ៍សែនជ័យជាអ្នកបាញ់មេអាប៉ោង។
ប្រភពបន្តថា ខណៈបង្ក្រាបនោះកម្លាំងនគរបាលដកហូតបានសម្ភារមួយចំនួននៅនឹងវង់អាប៉ោងរួមមាន លុយចំនួន២.៧៤៣.៤០០រៀល និង៤៤៥ដុល្លារ, ទូរសព្ទដៃ៥គ្រឿង ជើងអាប៉ោងធ្វើអំពីដើមឫស្សី១៣ និងតេឡេកែច្នៃសម្រាប់បញ្ជាមេអាប៉ោង៥គ្រឿង, កាបូបស្ពាយ១, កាបូបដៃ១, ហ្វឺតសរសេរ២ដើម, ស្កុតសម្រាប់រុំ១ដុំ, សោខ្សៀរ១, អត្តសញ្ញាណប័ណ្ណសញ្ជាតិខែ្មរ១សន្លឹក, កាត ATM ១ និងកំរាលអាប៉ោង១ផងដែរ ។
ប្រភពបានឲ្យដឹងទៀតថា ក្រុមមេអាប៉ោងទាំងនេះបានលេងបែបទុច្ចរិត ដោយប្រើមេអាប៉ោងបញ្ជាដោយតេឡេកុម្ម៉ង់ ហើយអ្នកចូលទៅចាក់មិនងាយនឹងឈ្នះមេទាំងនោះឡើយ ត្រូវមេស៊ីអស់នៅសល់តែគូទខោប៉ុណ្ណោះ ព្រោះអាប៉ោងចេញស្រេចតែមេបញ្ជាប៉ុណ្ណោះ បើរន្ធណាមានកូនចាក់ច្រើន ពួកគេបញ្ជាឲ្យចេញរន្ធដែលកូនចាក់តិច ឬរន្ធដែលគ្មានកូនចាក់តែម្ដង ។ ដោយឡែកអ្នកចាក់មិនបានដឹងនោះទេ ស្មានថា មេអាប៉ោងធម្មតា មិនដឹងថាជាមេអាប៉ោងមានតេឡេកុម្ម៉ង់នោះឡើយ ហើយម្នាក់ៗបានចាញ់អស់លុយរាប់ពាន់ដុល្លារ អស់ម៉ូតូ និងរបស់របរនៅក្នុងផ្ទះ រហូតមានអំពើហិង្សានៅក្នុងក្រុមគ្រួសារថែមទៀតផង។
ប្រភពដដែលបានបន្តថា ក្រុមអាប៉ោងតេឡេកុម្ម៉ង់នោះបានបើកលេងយូរហើយនៅក្នុងព្រៃឫស្សីខាងលើ ហើយមិនមាននរណាដឹងផ្សេងក្រៅពីអ្នកញៀនល្បែងនោះឡើយ ប៉ុន្តែក្រោយមកត្រូវបានប្រជាពលរដ្ឋដឹង ហើយមិនអាចអត់ឱនឲ្យបាន ព្រោះខ្លាចកើតមានចោរកម្មចេញពីប្រភពល្បែងនោះ ទើបរាយការណ៍ជូនកម្លាំងនគរបាលឲ្យចុះទៅបង្ក្រាប និងចាប់ខ្លួនបាន៣នាក់ រួចនាំទៅអធិការដ្ឋាននគរបាលស្រុកអង្គស្នួល ដើម្បីកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ