ទិញត្រាក់ទ័ររួចបើកត្រឡប់ទៅផ្ទះ ពាក់កណ្ដាលផ្លូវត្រូវសមត្ថកិច្ចចាប់ខ្លួន
ខេត្តប៉ៃលិន ៖ បុរសម្នាក់បន្ទាប់ពីទិញត្រាក់ទ័របានហើយកំពុងបើកត្រឡប់ទៅផ្ទះវិញបានពាក់កណ្ដាលផ្លូវត្រូវពលរដ្ឋម្នាក់ឃើញនិងស្គាល់ថា …
ខេត្តប៉ៃលិន ៖ បុរសម្នាក់បន្ទាប់ពីទិញត្រាក់ទ័របានហើយកំពុងបើកត្រឡប់ទៅផ្ទះវិញបានពាក់កណ្ដាលផ្លូវត្រូវពលរដ្ឋម្នាក់ឃើញនិងស្គាល់ថា …
ខេត្តប៉ៃលិន ៖ បុរសម្នាក់បន្ទាប់ពីទិញត្រាក់ទ័របានហើយកំពុងបើកត្រឡប់ទៅផ្ទះវិញបានពាក់កណ្ដាលផ្លូវត្រូវពលរដ្ឋម្នាក់ឃើញនិងស្គាល់ថាជាប្តីរបស់ស្ត្រីមេតុងទីនដែលបាននាំគ្នាវេចលុយរត់គេចខ្លួននោះក៏បានប្តឹងសមត្ថកិច្ចឲ្យចាប់ខ្លួនកាលពីវេលាម៉ោង១០ និង៣០នាទីព្រឹក ថ្ងៃទី២៣ ខែតុលា ឆ្នាំ២០១៦ តាមបណ្តោយផ្លូវជាតិលេខ៥៧ ក្នុងភូមិស្តៅ ឃុំស្តៅ ស្រុករតនមណ្ឌល ខេត្តបាត់ដំបង ។
បុរសជាប្តីស្ត្រីមេតុងទីនដែលត្រូវចាប់ខ្លួននេះមានឈ្មោះ ឈួន ប៉ែត អាយុ៣២ឆ្នាំ ប្រពន្ធឈ្មោះ ឆន ស្រីពៅ អាយុ៣៦ឆ្នាំ ជាមេតុងទីន មានកូន៣នាក់ ប្រុស១នាក់ ស្រី២នាក់ មានស្រុកកំណើតនៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល បច្ចុប្បន្នជួលផ្ទះគេស្នាក់នៅខាងក្រោយផ្សារប៉ាងរលឹម ក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីនគរបាលប៉ុស្តិ៍អូរតាវ៉ៅបានឱ្យដឹងថា ជនសង្ស័យ២នាក់ប្តីប្រពន្ធខាងលើបានវេចលុយកូនតុងទីនប្រមាណជិត១០ម៉ឺនដុល្លាររត់គេចខ្លួនអស់រយៈពេលជាតិ១ខែមកហើយ លុះនៅថ្ងៃកើតហេតុខណៈយកលុយមកទិញត្រាក់ទ័រនៅក្នុងខេត្តប៉ៃលិន រួចបើកបម្រុងត្រឡប់ទៅផ្ទះវិញនៅឯខេត្តកំពង់ធំ ស្រាប់តែប្រជាពលរដ្ឋម្នាក់ឃើញស្គាល់ ក៏ប្តឹងសមត្ថកិច្ចឱ្យចាប់ឃាត់ខ្លួនតែម្តង ។ ក្រោយពេលឃាត់ខ្លួនប្តីរួច ខាងនគរបាលបានទាក់ទងទៅប្រពន្ធដើម្បីចូលខ្លួនដោះស្រាយ តែអត់មានអ្នកលើកទូរស័ព្ទ ។
បើតាមសម្តីស្ត្រីម្នាក់ឈ្មោះ ពេជ្រ ផល្លា ហៅយាយលក់បាយ អាយុ៤០ឆ្នាំ បានឱ្យដឹងថា គាត់បានលេងតុងទីនជាមួយស្ត្រីខាងលើអស់រយៈពេលជាង២ឆ្នាំមកហើយ ដោយដាក់លុយចូលលេងចំនួន៣លាន៧០ម៉ឺនរៀល ហើយមិនទាន់បានដេញយកផង ត្រូវគេវេចលុយរត់គេចខ្លួនតែម្តង ។ ស្ត្រីម្នាក់ឈ្មោះ យាយគុន អាយុ៥៧ឆ្នាំ បានឱ្យដឹងថា គាត់បានចូលលេងជិត២ឆ្នាំមកហើយដែរ ដោយដាក់លុយអស់ចំនួន៧លានរៀល នៅចុងក្រោយនេះមិនទាន់ដេញយកលុយខ្លួននៅឡើយទេ ។ ចំណែកស្ត្រីម្នាក់ទៀតឈ្មោះ ចាន់ ធូ អាយុ២៨ឆ្នាំ ត្រូវស្ត្រីខាងលើបោកអស់ជាង៣លានរៀលដែរ ។
ពួកគាត់បន្តទៀតថា អ្នកដែលចូលរួមលេងតុងទីនខាងលើមានគ្នាជាង៧០នាក់ ហើយបើគិតជាទឹកប្រាក់អស់ជិត១០ម៉ឺនដុល្លាររួមទាំងប្រាក់ចងការ និងលុយរាប់ប្រចាំថ្ងៃថែមទៀត ត្រូវគេវេចយកទៅទាំងអស់ ។ លើសពីនេះពួកគាត់មិនចង់ប្តឹងផ្តល់ប្តីស្ត្រីខាងលើដាក់គុកច្រវាក់នោះទេ គ្រាន់តែចង់ឱ្យសងលុយពួកគាត់ត្រឡប់មកវិញនោះជាការស្រេច ។
ទោះបីជាយ៉ាងណាក៏ដោយ ក្រោយពេលចាប់ឃាត់ខ្លួនរួច កូនតុងទីនជាច្រើនបាននាំគ្នាមកចោមរោមទារលុយពីប្តីស្ត្រីមេតុងទីន ហើយក៏មានអ្នកខ្លះបន្តដាក់ពាក្យទៅស្នងការនគរបាលខេត្តឱ្យជួយអន្តរាគមន៍ និងដោះស្រាយជូនពួកគេទាំងអស់នោះផងដែរ ៕
ចែករំលែកព័តមាននេះ