ការប្រយុទ្ធគ្នាយ៉ាងសាហាវនានាផ្ទុះឡើងជាថ្មីកាលពីយប់ថ្ងៃទី២២ តុលា នៅទីក្រុងអាឡែបភាគខាងជើងស៊ីរីរវាងកងទ័ពរដ្ឋាភិបាលនិងពួកឧទ្ទាម ក្រោយការផុតកំណត់បទឈប់បាញ់គ្នារយៈពេល៣ថ្ងៃប្រកាសដោយរុស្ស៊ីសម្ព័ន្ធមិត្តក្រុងដាម៉ាស់ ។
អង្គការសិទ្ធិមនុស្សស៊ីរី OSDH មានប្រភពព័ត៌មានច្រើនក្នុងប្រទេសគូសបញ្ជាក់ថា ការបាញ់កាំភ្លើងធំនិងការប៉ះទង្គិចគ្នាយ៉ាងសាហាវកើតមានក្នុងសង្កាត់ជាច្រើននៃទីក្រុងធំទី២នោះរបស់ស៊ីរីក្នុងក្លាយទៅជានិមិត្តរូបសំខាន់នៃជម្លោះដែលប្រទេសនោះចាប់តាំងពីឆ្នាំ២០១១មកបណ្តាលឱ្យមនុស្សស្លាប់ជាង៣០០.០០០នាក់ហើយ ។
ក្រោយបង្កើនការវាយប្រហារតាមអាកាសយ៉ាងខ្លាំងក្លាបំផុតលើផ្នែកក្រុងអាឡែបកាន់កាប់ដោយពួកឧទ្ទាមមានប្រជាជនរស់នៅប្រមាណជា២៥០.០០០នាក់ ពីថ្ងៃទី២២ កញ្ញាមក រុស្ស៊ីប្រកាសពីបទឈប់បាញ់គ្នាមនុស្សធម៌រយៈពេល៣ថ្ងៃដែលផុតកំណត់ត្រឹមម៉ោង១៩ម៉ោងក្នុងស្រុក ថ្ងៃទី២២ តុលា ។ អំឡុងពេលនៃបទឈប់បាញ់គ្នានោះនាថ្ងៃចុងក្រោយពុំមានជនស៊ីវិលឬពួកជីហាដនាំគ្នាចាកចេញតាមច្រកមនុស្សធម៌ទាំងឡាយដែលបង្កើនឡើងឡើយ ។
បទឈប់បាញ់គ្នានៅក្រុងអាឡែបរយៈពេល៣ថ្ងៃកំណត់ពីថ្ងៃទី២០ទៅ២២តុលា ។ ច្រកមនុស្សធម៌៩ត្រូវបានបង្កើតឡើងក្នុងនោះច្រក៦សម្រាប់ជនស៊ីវិលនិងច្រក២សម្រាប់ពួកយុទ្ធជនឧទ្ទាមដែលឡោមព័ទ្ធជាប់ក្នុងផ្នែកខាងកើតក្រុងអាឡែប ។ លោករ៉ាមីអាប់ដែល រ៉ាហ៍ម៉ាន់ នាយករបស់ OSDH អះអាងប្រាប់ AFP ថាគ្មានមនុស្សណាម្នាក់ព្រមចាកចេញតាមច្រកទាំងនោះឡើយ ។
ការផ្ទុះឡើងវិញការប្រយុទ្ធគ្នានៅក្រុងអាឡែបដែលរងខ្ទេចខ្ទាំរួចហើយដោយការទម្លាក់គ្រាប់បែកនិងការបាញ់ផ្លោងរយៈពេលច្រើនខែនាំឱ្យគេមានការបារម្ភដល់គ្រោះមហន្តរាយខាងមនុស្សធម៌ពិសេសក្នុងបណ្តាសង្កាត់កាន់កាប់ដោយពួកឧទ្ទាម ។ រយៈពេល៤សប្តាហ៍ចុងក្រោយនេះការទម្លាក់គ្រាប់បែកខ្លាំងក្លាបំផុតបណ្តាលឱ្យមនុស្សស្លាប់ប្រមាណជា៥០០នាក់និងរបួស២០០០នាក់ បើតាមអ.ស.ប។ អាជ្ញាធររុស្ស៊ីនិងបណ្តាសារព័ត៌មានរដ្ឋស៊ីរីបានចោទប្រកាន់ពួកឧទ្ទាមថាធ្វើការរារាំងគ្រប់បែបយ៉ាងរួចរដ្ឋមន្ត្រីការបរទេសរុស្ស៊ីលោកស័រហ្គេយឡាវរ៉ូវអះអាងថាពួកឧទ្ទាមបានធ្វើការគំរាមកំហែងនិងប្រើកម្លាំងរាំងខ្ទប់ច្រកចេញមនុស្សធម៌ទាំងឡាយ ៕
ចែករំលែកព័តមាននេះ