រាជធានីភ្នំពេញ ៖ ក្រុមគោព្រៃកម្ពុជា បានបង្កើតប្រវត្តិសាស្ត្រលើកដំបូង ចាប់តាំងពីចូលរួមប្រកួតដណ្ដើមពាន AFF Suzuki Cup ដែលជាពានរង្វាន់ធំប្រចាំតំបន់អាស៊ានដោយអាចឆ្លងផុតវគ្គជម្រុះបឋមជាមួយនឹងលទ្ធផលឈ្នះទាំង៣ប្រកួត ពោលគឺឈ្នះឡាវ២-១ ឈ្នះព្រុយណេ៣-០ និងឈ្នះទីម័រខាងកើត៣-២។ តាមរយៈជ័យជម្នះនេះ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ដល់ប្រាក់រង្វាន់ចំនួន៥ម៉ឺនដុល្លារអាមេរិកជាការលើកទឹកចិត្តដល់ការហត់នឿយរបស់ក្រុមកីឡាករកម្ពុជាផងដែរ ។
ទន្ទឹមគ្នានេះ ក្រុមគោព្រៃកម្ពុជាត្រូវបានអនុញ្ញាតឱ្យសម្រាក១សប្ដាហ៍យកកម្លាំង មុនពេលប្រមូលផ្ដុំហ្វឹកហាត់សាជាថ្មីត្រៀមចេញទៅប្រកួតនៅប្រទេសមីយ៉ាន់ម៉ា នៅពាក់កណ្ដាលខែវិច្ឆិកា ជាមួយក្រុមជម្រើសជាតិ៧ផ្សេងទៀតដែលកំពុងរង់ចាំនៅវគ្គចែកពូល ។ នៅវគ្គចែកពូលនេះ ក្រុមគោព្រៃកម្ពុជា ស្ថិតនៅក្នុងពូលBជាមួយក្រុម
មីយ៉ាន់ម៉ា (ម្ចាស់ផ្ទះ) ម៉ាឡេស៊ី និងវៀតណាម ចំណែកពូលAមានក្រុមហ្វ៊ីលីពីន ថៃ សិង្ហបុរី និងឥណ្ឌូណេស៊ី ។ ក្រុមទាំង៨នឹងប្រកួតជម្រុះក្នុងពូលរបស់ខ្លួនក្នុងមួយពូលយក២ក្រុមដែលមានពិន្ទុច្រើនជាងគេទៅប្រកួតនៅវគ្គពាក់កណ្ដាលផ្ដាច់ព័ត្រនិងផ្ដាច់ព័ត្រដែលវគ្គទាំងពីរនេះធ្វើឡើងក្នុងលក្ខណៈក្នុងដីនិងក្រៅដី (Home/Away) ។
តាមកម្មវិធីប្រកួតដែលកោះសន្តិភាពទទួលបាន វគ្គជម្រុះតាមពូលចាប់ផ្ដើមពីថ្ងៃទី១៩ វិច្ឆិកា ដល់១៧ ធ្នូ ឆ្នាំ២០១៦ ដោយពូលA ប្រកួតនៅប្រទេសហ្វ៊ីលីពីន និងពូលBប្រកួតនៅប្រទេសមីយ៉ាន់ម៉ា ។ ក្រុមគោព្រៃកម្ពុជាប្រកួតបើកឆាកដំបូងជាមួយក្រុមម៉ាឡេស៊ី នៅថ្ងៃទី២០ វិច្ឆិកា មុនពេលជួបក្រុមម្ចាស់ផ្ទះមីយ៉ាន់ម៉ា នៅថ្ងៃទី២៣ វិច្ឆិកា និងក្រុមវៀតណាម នៅថ្ងៃទី២៦ វិច្ឆិកា ។ ចំណែកប្រាក់រង្វាន់សម្រាប់ក្រុមដណ្ដើមបានជើងឯកនឹងទទួលបានពាន១និងប្រាក់២០ម៉ឺនដុល្លារ ក្រុមរងជើងឯកនឹងទទួលបានប្រាក់រង្វាន់៧ម៉ឺន៥ពាន់ដុល្លារ និងក្រុមដែលធ្លាក់ត្រឹមវគ្គពាក់កណ្ដាលផ្ដាច់ព្រ័ត្រទទួលបានប្រាក់លួងចិត្តចំនួន៥ម៉ឺនដុល្លារ៕
ចែករំលែកព័តមាននេះ