ញាក់សាច់ ! ចាប់ចិន២នាក់ ដកហូតសារធាតុញៀនបានជិត៥០គីឡូក្រាម
រាជធានីភ្នំពេញ ៖ ជនសង្ស័យជាជនជាតិចិន២នាក់ត្រូវបានសមត្ថកិច្ចបើកប្រតិបត្តិការចុះបង្ក្រាប និងឃាត់ខ្លួនបន្តបន្ទាប់គ្នា ព្រមទាំងដកហូតបានថ្នាំញៀនជិត៥០គីឡូក្រាម …
រាជធានីភ្នំពេញ ៖ ជនសង្ស័យជាជនជាតិចិន២នាក់ត្រូវបានសមត្ថកិច្ចបើកប្រតិបត្តិការចុះបង្ក្រាប និងឃាត់ខ្លួនបន្តបន្ទាប់គ្នា ព្រមទាំងដកហូតបានថ្នាំញៀនជិត៥០គីឡូក្រាមកាលពីថ្ងៃទី២០ ខែតុលា ឆ្នាំ២០១៦នេះ ។
ជនសង្ស័យជនជាតិចិនដែលត្រូវចាប់ខ្លួននោះ ម្នាក់ឈ្មោះ ស៊ូ យាំងលាង ភេទប្រុស អាយុ៤១ឆ្នាំ និងម្នាក់ទៀតឈ្មោះ YANG DEYING ភេទប្រុស អាយុ៤៤ឆ្នាំ សមត្តកិច្ចកំពុងធ្វើការស្រាវជ្រាវរកបក្សពួកបន្តទៀត ។
ប្រតិបត្តិការនេះ ដឹកនាំបញ្ជាពីសំណាក់លោកឧត្តមសេនីយ៍ឯក ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន និងមានការចង្អុលបង្ហាញពីលោកឧត្តមសេនីយ៍ឯក ខៀវ សាម៉ន នាយកមន្ទីរប្រឆាំងគ្រឿងញៀន និងប្រើប្រាស់កម្លាំងផ្ទាល់ដោយលោកឧត្តមសេនីយ៍ទោ សាន សុទ្ធី នាយករងមន្ទីរគ្រឿងញៀន ។
លោកឧត្តមសេនីយ៍ទោ សាន សុទ្ធី នាយករងមន្ទីរប្រឆាំងគ្រឿងញៀន បានឲ្យដឹងថា មុខសញ្ញាជួញដូរគ្រឿង១ក្រុមនេះត្រូវបានមន្ទីរប្រឆាំងគ្រឿងញៀនប្រើប្រាស់កម្លាំងជំនាញតាមដានសកម្មភាពច្រើនខែមកហើយទម្រាំចាប់បាន ។ ជាក់ស្តែង ដំបូងសមត្ថកិច្ចឃាត់ខ្លួនជនសង្ស័យម្នាក់ឈ្មោះ ស៊ូ យាំងលាង នៅត្រង់រង្វង់មូលទួលគោក សង្កាត់បឹងកក់២ ខណ្ឌទួលគោក ខណៈជនសង្ស័យកំពុងដឹកជញ្ជូនគ្រឿងញៀនបម្រុងយកទៅប្រគល់ឲ្យមនុស្សផ្សេងទៀត ។ ពេលនោះសមត្ថកិច្ចដកហូតថ្នាំញៀននៅខ្លួនជនសង្ស័យបានជាងកន្លះគីឡូក្រាម ។
លោកឧត្តមសេនីយ៍ទោ សាន សុទ្ធី ក្រោយពេលឃាត់ខ្លួន ជនសង្ស័យសារភាពថា នៅមានលាក់ទុកនៅផ្ទះបក្សពួកស្នាក់អាស្រ័យមួយចំនួនទៀត ពេលនោះសមត្ថកិច្ចក៏បាននាំជនសង្ស័យទៅដកហូតថ្នាំញៀនបានជាង៤៤គីឡូក្រាមទៀត ចំណែកម្ចាស់វាដែលឈ្មោះ ស៊ូ យាំងលាង អះអាងថាជារបស់មេខ្លោងបានរត់គេខ្លួនបាត់ ។
លោក សាន សុទ្ធី បន្តថា កិច្ចប្រតិបត្តិការនៅបន្តរហូតដល់ថ្ងៃទី២២ ខែតុលា កម្លាំងជំនាញបានស្រាវជ្រាវ និងឈានទៅដល់ការឃាត់ខ្លួនជនសង្ស័យម្នាក់ទៀតឈ្មោះ YANG DEYING នេះ និងដកហូតថ្នាំញៀនចំនួន៦ដុំ ស្មើជាង២គីឡូក្រាម ។ ជាតិថ្នាំញៀនដែលដកហូតបានពីជនសង្ស័យទាំង២នាក់នោះមានដូចជា ១-ប្រភេទមេតំហ្វេតាមីន មានទម្ងន់១៩៨៨,១៨ក្រាម, ២-ថ្នាំញៀនប្រភេទអ៊ិចស្តាស៊ី មានទម្ងន់១៩៣០,គ្រាប់ ស្មើនឹង៧១៣ក្រាម, ៣-ថ្នាំញៀនប្រភេទកេតាមីនដបចំនួន២០០០ដប ស្មើ១០០០ក្រាម, ៤-សារធាតុម្សៅពណ៌ស សម្រាប់កែច្នៃទៅជាគ្រឿងញៀនចំនួន៤៤គីឡូក្រាម (៤៤គីឡូក្រាមនេះម្ចាស់វារត់បាត់) និងដកហូតពីឈ្មោះ YANG DEYING មានចំនួន៦ដុំ ស្មើជាង២គីឡូក្រាម សរុបជិត៥០គីឡូក្រាម ។
លោកឧត្តមសេនីយ៍ទោបន្តថា នេះជាលទ្ធផលដែលសមត្ថកិច្ចការិយាល័យទី៥ នៃមន្ទីរគ្រឿងញៀនបង្ក្រាបបាន ចាត់ទុកថាជាលទ្ធបណ្តោះអាសន្ត ជាក់ស្តែងរង់ចាំធ្វើសន្និសិទសារព័ត៌មាននៅថ្ងៃចន្ទ័ទី២៤ ខែតុលា នេះ ។
តែទោះជាយ៉ាងណាក្តី ជនសង្ស័យម្នាក់ត្រូវបានបញ្ជូនទៅកាន់សាលាដំបូងរាជធានីភ្នំពេញកាលពីព្រឹកថ្ងៃទី២៣ ខែតុលា ដែលឃាត់ខ្លួនមុនដំបូង នោះជាការបំពេញនិតិវិធី ចំណែកម្នាក់ទៀតទុកស្រាវជ្រាវរកចាប់បក្សពួកបន្តទៀត ។
ទាក់ទិននឹងការនាំចូលសារធាតុថ្នាំគ្រឿងញៀនយ៉ាងច្រើនសន្ធឹកសន្ធាប់នេះ លោកឧត្តមសេនីយ៍ឯក ម៉ក់ ជីតូ បានមានប្រសាសន៍ថា ជនសង្ស័យបានដឹកជញ្ជូនតាមជើងគោកពីប្រទេសឡាវមកកាន់ព្រះរាជាណាចក្រកម្ពុជា ៕
ចែករំលែកព័តមាននេះ