ប្រជាពលរដ្ឋជិត៤០០គ្រួសាររស់នៅក្នុងភូមិព្រៃព្រែក និងភូមិជ្រុងពពេល ឃុំម្រាម ស្រុករមាសហែក បានអំពាវនាវសុំឲ្យអាជ្ញាធរខេត្ត ក្រសួង មន្ទីរជំនាញ រួមមាន
ខេត្តស្វាយរៀង ៖ ប្រជាពលរដ្ឋជិត៤០០គ្រួសាររស់នៅក្នុងភូមិព្រៃព្រែក និងភូមិជ្រុងពពេល ឃុំម្រាម ស្រុករមាសហែក បានអំពាវនាវសុំឲ្យអាជ្ញាធរខេត្ត ក្រសួង មន្ទីរជំនាញ រួមមានមន្ទីរអភិវឌ្ឍន៍ជនបទខេត្តស្វាយរៀង មន្ទីរសាធារណការ និងដឹកជញ្ជូនខេត្តស្វាយរៀង មេត្តាចុះពិនិត្យ និងស្ថាបនាស្ពានថ្ម១កន្លែង ប្រវែងជាង៣០ម៉ែត្រ ឆ្លងកាត់ព្រែក ដើម្បីឱ្យប្រជាពលរដ្ឋ២ភូមិបានធ្វើដំណើរ និងសម្រួលក្នុងការដឹកផលិតផល កសិកម្ម ក៏ដូចជាសម្រួលដល់សេដ្ឋកិច្ចសង្គម នៅតាមជនបទឲ្យបានល្អប្រសើរ ជាពិសេសពេលសមាជិកគ្រួសារ មានជំងឺ ឬគ្រប់ខែឆ្លងទន្លេ ត្រូវការរថយន្តសង្គ្រោះបន្ទាន់ ហើយរថយន្តសង្គ្រោះមិនអាចចូលទៅបាន។
បើតាមស្ត្រីម្នាក់រស់នៅក្នុងភូមិព្រៃព្រែក បានមានប្រសាសថា កាលពីដើមឡើយ ព្រែកនេះ មានជម្រៅទឹកជ្រៅ ក្នុងរដូវវស្សាទឹកហូរខ្លាំង ហើយប្រជាពលរដ្ឋឆ្លងកាត់គឺហែល ក្រោយមកធ្វើក្បូនទាញឆ្លង ក្រោយៗមកទៀតក៏មានព្រះសង្ឃ ចាស់ទុំ ទាំងពីរភូមិ បានដឹកនាំចលនា ប្រជាពលរដ្ឋក្នុងភូមិ កា.ប់ឈើកសាងស្ពានឈើឆ្លងកាត់ព្រែក ដែលមានទទឹង២ម៉ែត្រ និងបណ្តោយប្រវែងជាង៣០ម៉ែត្រ សម្រាប់ប្រជាពលរដ្ឋធ្វើដំណើរទៅមកទាំង២ភូមិនេះ គឺភូមិព្រៃព្រែក និងភូមិជ្រុងពពេល ដើម្បីដឹកកសិផល កសិកម្ម និងឱ្យសិស្សធ្វើដំណើរទៅសិក្សារៀនសូត្រផងដែរ។
ស្ត្រីខាងលើបន្តទៀតថា ហើយនៅពេលបច្ចុប្បន្ន ស្ពានព្រៃព្រែកនេះ គឺមានសភាពចាស់ទ្រុឌទ្រោម ឈើសសរពុក ទើបធ្វើឱ្យមានការភ័យខ្លាចបាក់រលំ ឬក្មេងជិះម៉ូតូ ឬកង់ អាចនឹងផុងធ្លាក់ចូលទឹកបង្កឱ្យមានគ្រោះថ្នាក់ជាយថាហេតុ ជាពិសេសការដឹកអីវ៉ាន់ធ្ងន់ៗ និងការធ្វើដំណើរពេលយប់ពិតជាលំបាកណាស់ ហើយមិនត្រឹមតែប៉ុណ្ណោះនៅពេលដែលសមាជិកមានជំងឺ ឬឆ្លងទន្លេ ត្រូវការរថយន្តសង្គ្រោះបន្ទាន់នោះ គឺពិបាកខ្លាំងណាស់។
ទាក់ទិននឹងករណីខាងលើនេះដែរ លោកមេភូមិ ក៏ដូចជាំក្រុមប្រិក្សាឃុំម្រាម បានមានប្រសាសន៍ឱ្យដឹងថា ឃុំគ្មានលទ្ធភាព ឆ្លើយតបនឹងសំណើររបស់ប្រជាពលរដ្ឋបានទេ រដ្ឋបាលឃុំបានដាក់សំណើរបន្តទៅលោកអភិបាលស្រុកចំនួន២លើកមកហើយ ប៉ុន្តែដាក់បាត់ ដាក់បាត់ ពុំមានការឆ្លើយតប ហើយក៏មានអ្នកចុះមកពិនិត្យមើលដែរ តែមិនឃើញមានលទ្ធផលឡើយ។
ទាក់ទិនករណីនេះដែរ លោកស៊ូ ម៉ុល អភិបាលស្រុករមាសហែក បានមានប្រសាសន៍នាព្រឹកថ្ងៃទី១០ ខែឧសភា ឆ្នាំ២០២២នេះថា លោកបានទទួលសំណើររបស់ប្រជាពលរដ្ឋហើយ លោកក៏បានស្នើទៅមន្ទីរធន់ធានទឹក និងឧតុនិយមខេត្តរួចហើយ ហើយលោកប្រធានមន្ទីរនឹងឲ្យមន្ត្រីបច្ចេកទេសចុះពិនិត្យនៅសប្តាហ៍ក្រោយនេះហើយ ដើម្បីលើកគម្រោងស្នើសុំទៅឯកឧត្តមអភិបាលខេត្តបន្ត ។
គួរបញ្ជាក់ថា ប្រជាពលរដ្ឋរស់នៅក្នុងភូមិខាងលើនេះ សង្ឃឹមថា នឹងទទួលបានស្ពានថ្មសម្រាប់ធ្វើដំណើរនៅពេលខាងមុខផងដែរ៕
ចែករំលែកព័តមាននេះ