រាជធានីភ្នំពេញ ៖ ការព្យាករអាកាសធាតុត្រូវបានក្រសួងធនធានទឹក និងឧតុនិយមប្រកាស កាលពីថ្ងៃសៅរ៍ទី២២ ខែតុលា ឆ្នាំ២០១៦នេះ បានឱ្យដឹងថា ចុងខែតុលាចាប់ពីថ្ងៃទី២២ ដល់ទី៣១ ខែតុលា ២០១៦ ភ្លៀងនឹងបន្តធ្លាក់ឡើងវិញ ក្នុងបរិមាណពីមធ្យមទៅច្រើន នៅតាមបណ្តាខេត្តមួយចំនួន មានដូចជា៖ ខេត្តកណ្តាល កំពង់ស្ពឺ កំពត តាកែវ ស្វាយរៀង កំពង់ឆ្នាំង ត្បូងឃ្មុំ ក្រចេះ កំពង់ចាម និងខេត្តព្រៃវែង ។ រីឯតំបន់មាត់សមុទ្រ អាចនឹងមានភ្លៀងធ្លាក់ច្រើន មានដូចជា៖ ខេត្តកោះកុង និងព្រះសីហនុ ។
ការជូនដំណឹងរបស់ក្រសួងធនធានទឹក និងឧតុនិយម នេះបន្ទាប់ពីបានតាមដានលើស្ថានភាពអាកាសធាតុរួចមកឃើញថា ប្រព័ន្ធសម្ពាធទាប (ITCZ) នៅតែបន្តលាតសន្ធឹងលើព្រះរាជាណាចក្រកម្ពុជា ។ សម្ពាធទាបមួយក្នុង ប្រព័ន្ធសម្ពាធទាប (ITCZ) កំពុងស្ថិតនៅក្នុងសមុទ្រចិនខាងត្បួង នឹងវិវដ្ដទៅជាសម្ពាធទាបសកម្ម ហើយជំរិញអោយប្រព័ន្ធសម្ពាធទាបកាន់តែមានឥទ្ធិពល ។ ក្រសួងធនធានទឹក និងឧតុនិយម បានពន្យល់អោយដឹងថា ព្យុះទី២២ ឈ្មោះថា HAIMA បានធ្វើដំណើរដល់ប្រទេសចិន ។ ព្យុះនេះនឹងថយឥទ្ធិពលមកជាសម្ពាធទាបនៅថ្ងៃទី ២៣ ខែតុលា។
ក្រសួងធនធានទឹក និងឧតុនិយមប្រកាស សូមប្រុងប្រយ័ត្នចំពោះជំនន់ទឹកភ្លៀង ដែលអាចកើតមាន ៕
ចែករំលែកព័តមាននេះ