ខេត្តព្រៃវែង ៖ ស្ត្រីវ័យជាង៤០ឆ្នាំម្នាក់ រួមជាមួយកូននឹងប្អូន២នាក់ផងនោះ កាលពីព្រឹកថ្ងៃ១៩ តុលា បាននាំគ្នាមកស្រែកទ្រហ៊ោយំទាំងព្រឹក នៅក្នុងបរិវេណសាលាដំបូងខេត្ត ទាមទាររកយុត្តិធម៌ឱ្យប្តីរបស់គាត់ ដែលត្រូវក្រុមក្មេងទំនើងព្រួតគ្នាចាក់សម្លាប់យ៉ាងសាហាវឃោឃៅ នៅមុខផ្ទះរបស់គាត់ ក្នុងភូមិពារាំង ឃុំរាប ស្រុកពារាំង កាលពីថ្ងៃទី១៨ មីនា កន្លងមក ។
ស្ត្រីខាងលើនេះមានឈ្មោះ អឿន សិត អាយុ៤៥ឆ្នាំ បានរៀបរាប់ថា ថ្ងៃដែលប្តីរបស់គាត់ត្រូវក្រុមក្មេងទំនើងចាក់ស្លាប់នោះ គឺជាថ្ងៃភ្ជាប់ពាក្យកូនស្រីរបស់គាត់ ដោយគ្រួសារគាត់ បានរៀបចំកម្មវិធីផឹកស៊ីទទួលខាងដន្លងផង និងអបអរកម្មវិធីភ្ជាប់ពាក្យផង ដោយមានការចាក់ធុងបាស់រាំកំសាន្តផងដែរ ។ ប៉ុន្តែពេលរាំកំសាន្តនោះ មានក្រុមក្មេងទំនើងពីខាងក្រៅចូលទៅអុកឡុក ទើបប្តីគាត់ឈ្មោះ ជា ភា អាយុ៤៧ឆ្នាំ ចេញទៅឃាត់ ហើយក៏ត្រូវក្រុមក្មេងទំនើងចាក់ស្លាប់តែម្តង ។
ស្ត្រីដដែលនេះបានបន្តថា ក្រោយពេលចាក់ប្តីគាត់ស្លាប់ភា្លម ក្រុមក្មេងទំនើងទាំងនោះ បាននាំគ្នារត់បាត់អស់ ឯសមត្ថកិច្ចក៏បានទៅដល់កន្លែងកើតហេតុ ធ្វើការស្រាវជ្រាវនិងកំណត់មុខសញ្ញាជនល្មើសបានទាំងអស់ តែភ្លាមៗចាប់មនុស្សមិនបាន ព្រោះពួកគេរត់ចោលស្រុកអស់ ទើបសមត្ថកិច្ចកសាងសំណុំរឿងបញ្ជូនទៅសាលាដំបូងចាត់ការបន្ត ។ ស្ត្រីដដែលបានចោទថា តាំងពីពេលនោះរហូតមកដល់បច្ចុប្បន្នជិត២ឆ្នាំហើយ សំណុំរឿងនេះ ត្រូវតុលាការកប់ទុកចោលមិនចាត់ការអ្វីទាំងអស់ គ្រួសារជនរងគ្រោះក៏មិនហៅសាកសួរ សាក្សីក៏មិនហៅសួរ សំណុំរឿងអ្នកក្រីក្រ គឺស្ងាត់ឈឹងតែម្តង ។
អ្នកស្រី អឿន សិត បានបញ្ជាក់ថា ថ្មីៗនេះគាត់បានឃើញក្រុមក្មេងទំនើងដែលចាក់សម្លាប់ប្តីរបស់គាត់ បាននាំគ្នាចូលស្រុកវិញរស់នៅធម្មតា ហើយគាត់ក៏បានប្តឹងទៅប៉ូលីសប៉ុស្ដិ៍រដ្ឋបាលអោយចាប់ខ្លួនជនល្មើស តែប៉ូលីសប្រាប់ថា ចាប់មិនបានទេ ព្រោះគ្មានដីកាអោយចាប់ខ្លួន ធ្វើអោយរូបគាត់នឹងក្រុមគ្រួសារឈឺចាប់ស្ទើរតែកកឈាម ទើបសម្រេចចិត្តឡើងមកសាលាដំបូងខេត្ត ទាមទាររកយុត្តិធម៌អោយប្តីរបស់គាត់ ដែលស្លាប់ទៅ ។
ពាក់ពន្ធ័និងករណីខាងលើនេះលោក ញឹក រ៉ាន្នី អ្នកនាំពាក្យសាលាដំបូងខេត្ត បានឲ្យដឹងថា សំណុំរឿងខាងលើ គឺចៅក្រមលោក តាក់ គីមសៀ ជាអ្នកស៊ើបសួរ លោកក៏ទទួលស្គាល់ដែរថា សុំណុំរឿងនេះគាំងមែន តែពេលនេះចាត់ការហើយ និងរៀបចំរុញទៅជម្រះហើយ។ រីឯលោកចៅក្រមស៊ើបសួរលោក តាក់ គីមសៀ មិនអាចសុំការបំភ្លឺបានទេ ជុំវិញមូលហេតុដែលលោកកប់សំណុំរឿងនេះទុកចោលមិនព្រមចាត់ការ ។
គួរបញ្ជាក់ផងដែរថា ក្រោយពេលគ្រួសារស្ដ្រីខាងលើ នាំគ្នាទៅស្រែកយំទាមទាររកយុត្តិធម៌នៅមុខសាលាដំបូង ដោយមានទាំងក្រុមអ្នកសារព័ត៌មានជាច្រើននាក់ បានទៅសម្ភាសន៍និងសាកសួរព័ត៌មាន កាលពីព្រឹកថ្ងៃទី១៩ តុលា ស្រាប់តែស្អែកឡើងព្រឹកថ្ងៃទី២០ តុលា លោកឧត្តមសេនីយ ស្រេង ជា ស្នងការនគរបាលខេត្តបានប្រាប់ថា ខាងតុលាការបានបញ្ជូនដីកាចាប់ជនសង្ស័យមកដល់ស្នងការដ្ឋានខេត្តហើយ ប៉ុន្តែដីកានោះមានស្នាមកោសលុបជាច្រើននៅត្រង់លេខ និងថ្ងៃខែ ទើបធ្វើអោយគេសង្ស័យថា ដីកានេះធ្វើរួចយូរហើយតែមិនចេញ ។ លុះដល់មានរឿងតវ៉ាពីក្រុមគ្រួសារអ្នករងគ្រោះ ទើបបញ្ចេញឱ្យប៉ូលីស ៕
ចែករំលែកព័តមាននេះ