ថ្ងៃស្អែក កម្ពុជា-បារាំងរួមគ្នារៀបចំខួបកិច្ចព្រមព្រៀងសន្តិភាពក្រុងប៉ារីស រីឯ CNRP ធ្វើនៅស្នាក់ការ
រាជធានីភ្នំពេញ ៖ រាជរដ្ឋាភិបាល និង ស្ថានទូតបារាំងប្រចាំកម្ពុជានឹងរួមគ្នារៀបចំពិធីខួបឆ្នាំទី២៥ (២៣ តុលា ១៩៩១-២៣ តុលា ២០១៦)
រាជធានីភ្នំពេញ ៖ រាជរដ្ឋាភិបាល និង ស្ថានទូតបារាំងប្រចាំកម្ពុជានឹងរួមគ្នារៀបចំពិធីខួបឆ្នាំទី២៥ (២៣ តុលា ១៩៩១-២៣ តុលា ២០១៦) នៃកិច្ចព្រមព្រៀងសន្តិភាពទីក្រុងប៉ារីស ក្រោមប្រធានបទ «កិច្ចព្រមព្រៀងសន្តិភាពទីក្រុងប៉ារីសនិងសន្តិភាពនៅកម្ពុជា» ។
បើតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិបានឲ្យដឹងទៀតថា ពិធីខាងលើនឹងប្រព្រឹត្តទៅនៅទីស្តីការក្រសួងការបរទេសក្នុងរាជធានីភ្នំពេញនាព្រឹកថ្ងៃទី២៣ តុលា ក្រោមអធិបតីភាពលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ និងមានការចូលរួមពីលោក Jean-Claude POIMBOEUF ឯកអគ្គរដ្ឋទូតនៃសាធារណរដ្ឋបារាំងប្រចាំកម្ពុជា សមាជិកសមាជិកាព្រឹទ្ឋសភា រដ្ឋសភា រាជរដ្ឋាភិបាល និង វាគ្មិនសំខាន់ៗ ដែលបំពេញតួនាទីជាសារវ័ន្តនៅក្នុងដំណើការសន្តិភាព និងអតីតឯកអគ្គរាជទូត ឯកអគ្គរដ្ឋទូតនាន ដែលធ្លាប់បានបំពេញការងារនៅកម្ពុជានាអំឡុងពេលនោះ ដើម្បីចែករំលែកទស្សនៈនិងការយល់ឃើញពីសន្តិភាព និងការអភិវឌ្ឍក្នុងប្រទេសកម្ពុជា។
ដោយឡែកគណបក្សសង្គ្រោះជាតិនោះវិញ បើតាមលោក កឹម សុខា គឺនឹងរៀបចំខួបកិច្ចព្រមព្រៀងសន្តិភាពទីក្រុងប៉ារីសនេះដូចគ្នា នៅទីស្នាក់ការកណ្តាលគណបក្សសង្គ្រោះជាតិ ស្ថិតក្នុងសង្កាត់ចាក់អង្រែលើ ខណ្ឌមានជ័យ ដោយមិនធ្វើនៅទីលានប្រជាធិបតេយ្យដូចតាមការទាមទាររបស់គណបក្សសង្គ្រោះជាតិ(CNRP)នោះទេ ៕
ចែករំលែកព័តមាននេះ