រាជធានីភ្នំពេញ ៖ ចៅក្រមសាលាដំបូងរាជធានី លោក ស្វាយ តុញ កាលពីព្រឹកថ្ងៃទី២០ តុលា បានប្រកាសសាលក្រមផ្ដន្ទាទោសអតីតឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិ និងបុរសជនជាតិអាមេរិកាំង២នាក់ផ្សេងទៀត ដាក់ពន្ធនាគារក្នុងម្នាក់ៗ១ឆ្នាំ និងបង្គាប់ឱ្យរួមគ្នាសងសំណងជាប្រាក់១លានដុល្លារដល់ដើមបណ្ដឹងរដ្ឋប្បវេណី រួមទាំងសំណងជំងឺចិត្ត៣០០លានរៀលផងដែរដល់លោកស្រី អេង លីគង់ ក្រោមការចោទប្រកាន់ពីបទឆបោក ។
ជនត្រូវចោទក្នុងសំណុំរឿងឆបោកនេះ គឺជាអតីតឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិលោក ស៊ីវ ស៊ីចាន់ ដែលមានដើមកំណើតខ្មែរ និងលោក សាន រិឆ័រ ជាអ្នកជំនួញសញ្ជាតិអាមេរិកដើមកំណើតខ្មែរ រួមទាំងជនជាតិអាមេរិកាំង២នាក់ទៀតមាន ឈ្មោះ Thomas Willems ជាអ្នកជំនួញ និងលោក William Nojay ជាសមាជិកសភាប្រចាំរដ្ឋញូវយ៉ក ។ ប៉ុន្តែលោក William nojay បានសម្លាប់ខ្លួនកាលពីពាក់កណ្ដាលខែកញ្ញា ដែលគេសង្ស័យថា ការធ្វើអត្តឃាតនោះមានជាប់ពាក់ព័ន្ធនឹងបទឆបោកដែលមានទឹកប្រាក់រាប់លានដុល្លារនៅអាមេរិក បូករួមទាំងសំណុំរឿង១លានដុល្លារនេះផង ។
សូមរំលឹកថា ក្នុងសវនាការបើតាមអង្គហេតុនៃរឿងបានឱ្យដឹងថា កាលពីឆ្នាំ២០១២ ឈ្មោះ សាន រិឆ័រ បានបញ្ចុះបញ្ចូលអ្នកស្រី អេង លីគង់ ម្ចាស់មន្ទីរព្យាបាលធ្មេញម៉ាស្ទ័រឲ្យបោះទុន១លានដុល្លារទៅក្នុងក្រុមហ៊ុនមួយឈ្មោះ ថាអាក្រា(AKRA) ។ ក្រុមហ៊ុននេះត្រូវបានបង្កើតឡើងដោយជនជាប់ចោទទាំង៤នាក់ ដែលមានចុះបញ្ជីនៅសហរដ្ឋអាមេរិក និងនៅកម្ពុជាផងដែរ ។ ក្នុងការបោះទុននេះក្រុមហ៊ុនអាក្រាដែលមានលោក William Nojay ជាប្រធានហេរញ្ញិកបានសន្យាថានឹងឲ្យអ្នកស្រីធ្វើជាសមាជិកគណៈកម្មការក្រុមហ៊ុន ដើម្បីឲ្យអ្នកស្រីមានសិទ្ធិទៅរស់នៅសហរដ្ឋអាមេរិកដោយស្របច្បាប់ទាំងគ្រួសារតែម្ដង ។ ប៉ុន្តែក្រោយពេលអ្នកស្រីអេង លីគង់ បានផ្ទេរលុយទៅឲ្យបុគ្គលទាំង៤នាក់ហើយ លោក សាន រិឆ័រ និងលោក ស៊ីវ ស៊ីចាន់ បានលាឈប់ពីក្រុមហ៊ុនដើម្បីផ្តាច់ការទាក់ទងរវាងអ្នកស្រី អេង លីគង់ និងក្រុមហ៊ុននេះតែម្តង រីឯអ្នកស្រីក៏មិនដែលបានធ្វើជាសមាជិកគណៈកម្មការក្រុមហ៊ុនដូចការសន្យានោះដែរ ។ អ្នកស្រីក៏បានដាក់ពាក្យបណ្តឹងប្រឆាំងនឹងបុគ្គលទាំង៤នាក់នេះទាមទារប្រាក់១លានដុល្លារមកវិញបូករួមទាំងជំងឺចិត្ត២០ម៉ឺនដុល្លារ ។
ក្នុងសវនាការកាលពីថ្ងៃទី២០ តុលា ក្រុមមេធាវីទាំងសងខាងបានឆ្លើយការពារកូនក្តីរៀងៗខ្លួនដោយលើកអំណះអំណាងផ្សេងៗ ។ លោក អ៊ន ហ៊ីង មេធាវីការពារឲ្យអ្នកស្រី អេង លីគង់ បានថ្លែងថា ជនជាប់ចោទទាំង៤នាក់ដែលគ្មានវត្តមានក្នុងសវនាការ គឺជាក្រុមឆបោកដែលមានអង្គការចាត់តាំងច្បាស់លាស់ ។ លោកថ្លែងថា ពួកគេរៀបចំដើម្បីបោកលុយពីកូនក្តីលោក។ ក្រោយពេលឆបោកបានហើយអ្នកខ្លះបានលាឈប់ ដើម្បីផ្តាច់ទំនាក់ទំនងពីកូនក្តីរបស់លោក ពីក្រុមហ៊ុន គឺពួកគេមានគម្រោងទុកមុនជាស្រេច ដូច្នេះនេះជាអំពើឆបោកពិតប្រាកដ ។
លោកថ្លែងទៀតថា ក្រុមហ៊ុនអាក្រាមិនមានសកម្មភាពទេ ទោះជាបានចុះបញ្ជីក៏ដោយ ដោយសារអ្នកស្រី អេង លីគង់ ដែលបានវិនិយោគក្នុងក្រុមហ៊ុននេះមិនដែលទទួលបានរបាយការណ៍ហិរញ្ញវត្ថុម្តងណាឡើយ ។ លើសពីនេះទៀតក្រុមនេះបានក្លែងតួនាទីថា គាត់ជាឯកអគ្គរដ្ឋទូតអាមេរិកប្រចាំ អ.ស.ប. តែតាមពិតគាត់បានចប់អាណត្តិជាយូរមកហើយ ។ ចំណែកក្រុមមេធាវីការពារជនជាប់ចោទបីនាក់បានអះអាងថា ក្រុមហ៊ុនអាក្រានៅតែមានដំណើរការដោយបានលើកយករបាយការណ៍ហិរញ្ញវត្ថុពីអាមេរិកដែលបញ្ជាក់ថា ក្រុមហ៊ុននេះនៅមានប្រាក់២,៨លានដុល្លារ ហើយថាក្រុមហ៊ុនបានចេញលិខិតបញ្ជាក់ថា អ្នកស្រី អេង លីគង់ គឺជាសមាជិកគណៈកម្មការក្រុមហ៊ុន ។
ក្រុមមេធាវីបន្តថា ក្រុមហ៊ុនអាក្រានៅកម្ពុជាមិនអាចដំណើរការបានទេ ដោយសារតែពាក្យបណ្ដឹងនេះ និងមានការស្នើសុំមិនឲ្យជនជាប់ចោទចាកចេញពីកម្ពុជាកាលពីដំបូង។ ក្រុមមេធាវីការពារក្តីជនជាប់ចោទបានស្នើឲ្យតុលាការអនុញ្ញាតឲ្យកូនក្តីរបស់លោករួចផុតពីបទចោទ ។ ក៏ប៉ុន្តែមេធាវីរបស់ដើមបណ្តឹង និងតំណាងអយ្យការបានស្នើឲ្យតុលាការផ្តន្ទាទោសជនជាប់ចោទក្នុងកម្រិតអតិបរមានៃបទឆបោក ។
តំណាងអយ្យការលោក ចែ សុង បានស្នើទៅចៅក្រមថា «តំណាងអយ្យការយល់ឃើញថា មានភ័ស្តុតាង និងធាតុផ្សំគ្រប់គ្រាន់ដែលបញ្ជាក់ថា ពិតជាមានករណីឆបោកមែន ។ តំណាងអយ្យការសូមស្នើឲ្យតុលាការផ្តន្ទាទោសជនជាប់ចោទតាមមាត្រា៣៧៧ និង៣៨០ចំណុចទី៥នៃក្រមព្រហ្មទណ្ឌ» ។ រហូតដល់ព្រឹកថ្ងៃទី២០ តុលា ទើបចៅក្រមតុលាការបានប្រកាសសាលក្រមផ្ដន្ទាទោសជនជាប់ទាំង៤នាក់ ដាក់ពន្ធនាគារក្នុងម្នាក់ៗ១ឆ្នាំ បង្គាប់ឱ្យរួមគ្នាសងដល់ដើមបណ្ដឹង១លានដុល្លារ និងជំងឺចិត្ត៣០០លានរៀល បើកផ្លូវប្ដឹងឧទ្ធរណ៍តាមកំណត់នៃច្បាប់ ៕
ចែករំលែកព័តមាននេះ