រាជធានីភ្នំពេញ ៖ រដ្ឋបាលរាជធានីភ្នំពេញ កាលពីថ្ងៃ២១ ខែតុលា បានផ្ញើលិខិតផ្លូវការជូនដល់តំណាងរាស្ត្រគណបក្សសង្គ្រោះជាតិ ស្ដីពីការជូនដំណឹងពីការប្រារព្ធពិធី
រាជធានីភ្នំពេញ ៖ រដ្ឋបាលរាជធានីភ្នំពេញ កាលពីថ្ងៃ២១ ខែតុលា បានផ្ញើលិខិតផ្លូវការជូនដល់តំណាងរាស្ត្រគណបក្សសង្គ្រោះជាតិ ស្ដីពីការជូនដំណឹងពីការប្រារព្ធពិធីអបអរសាទរខួបលើកទី២៥ នៃកិច្ចព្រមព្រៀងសន្តិភាពទីក្រុងប៉ារីស ។ ខ្លឹមសារលិខិតបានលើកឡើងថា ចំពោះការជូនដំណឹងប្រារព្ធពិធីអបអរសាទរខួបលើកទី២៥ នៃកិច្ចព្រមព្រៀងទីក្រុងប៉ារីស នាថ្ងែទី២៣ ខែតុលា ឆ្នាំ២០១៦ នៅទីលានប្រជាធិបតេយ្យ របស់តំណាងក្រុមអ្នកតំណាងរាស្ត្រគណបក្សសង្គ្រោះជាតិនោះ រដ្ឋបាលរាជធានីភ្នំពេញយល់ឃើញថា ខ្លឹមសារនៃកិច្ចព្រមព្រៀងទីក្រុងប៉ារីស ត្រូវបានសភាធម្មនុញ្ញរៀបចំជាធាតុផ្សំចូលក្នុងរដ្ឋធម្មនុញ្ញនៃព្រះរាជាណាចក្រកម្ពុជា និងបានប្រកាសឱ្យប្រើប្រាស់ចាប់តាំងពីឆ្នាំ១៩៩៣ រហូតដល់បច្ចុប្បន្ននេះ ។
ចំពោះការប្រមូលផ្ដុំជួបជុំ ដើម្បីសម្ដែងមតិរបស់ប្រជាពលរដ្ឋសម្រាប់ខួបលើកទី២៥នៃកិច្ចព្រមព្រៀងទីក្រុងប៉ារីស នៅទីលានប្រជាធិបតេយ្យ រដ្ឋបាលរាជធានីភ្នំពេញយល់ឃើញថា ជាប្រធានបទមិនសមស្របទៀតទេ ដូចនេះស្នើតំណាងក្រុមអ្នកតំណាងរាស្ត្រគណបក្សសង្គ្រោះជាតិ គួរបានប្រារព្ធពិធីខាងលើនៅទីស្នាក់ការគណបក្សរបស់ខ្លួន ឬទីតាំងឯកជនសមស្របណាមួយវិញ ។
គួររំឭកថា ក្នុងកិច្ចប្រជុំជាមួយតំណាងគណបក្សសង្គ្រោះជាតិ នៅសាលារាជធានីភ្នំពេញ នាព្រឹកថ្ងៃទី១៩ ខែតុលា ភាគីអាជ្ញាធរបានបដិសេធចំពោះការស្នើសុំដោយមិនអនុញ្ញាតឲ្យគណបក្សសង្គ្រោះជាតិយកទីលានប្រជាធិបតេយ្យ ដើម្បីរៀបចំពិធីអបអរខួបឆ្នាំទី២៥នៃកិច្ចព្រមព្រៀងសន្តិភាពទីក្រុងប៉ារីស នៅថ្ងៃទី២៣ ខែតុលា ខាងមុខនេះទេ តែអនុញ្ញាតឲ្យធ្វើនៅក្នុងទីស្នាក់ការគណបក្សរបស់ខ្លួន ឬទីតាំងណាផ្សេងដែលសមស្រប ។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី ឲ្យដឹងថា រដ្ឋបាលរាជធានីភ្នំពេញអនុញ្ញាតឲ្យគណបក្សសង្គ្រោះជាតិយកទីស្នាក់ការរបស់ខ្លួន ឬទីតាំងសមស្របណាមួយទៀតរៀបចំពិធីនេះបាន ប៉ុន្តែទីលានប្រជាធិបតេយ្យមិនអនុញ្ញាតឲ្យធ្វើទេ ទាល់តែមានការអនុញ្ញាតពីក្រសួងមហាផ្ទៃជាមុនសិន ។
តំណាងរាស្ត្រគណបក្សសង្គ្រោះជាតិ លោក ម៉ៅ មុនីវណ្ណ បានថ្លែងថា នៅថ្ងៃទី២៣ ខែតុលា ឆ្នាំ២០១៦ ចាប់ពីម៉ោង៧ព្រឹកដល់ម៉ោង១២ថ្ងៃត្រង់ ក្រុមអ្នកតំណាងរាស្ត្រគណបក្សសង្គ្រោះជាតិមានបំណងរៀបចំពិធីអបអរសាទរខួបលើកទី២៥នៃកិច្ចព្រមព្រៀងសន្តិភាពទីក្រុងប៉ារីស នៅទីលានប្រជាធិបតេយ្យ ដោយមានអ្នកចូលរួមជាច្រើនពាន់នាក់ ។ ចំណែកលោក ឡុង រី បានឲ្យដឹងថា អ្នកចូលរួមមានចំនួនយ៉ាងតិច៧.០០០នាក់ ហើយចំពោះអ្នកចូលរួមពិធីមកពីតាមខេត្ត នឹងត្រូវចាត់ចែងពេលវេលាសមស្របមិនឱ្យមានការកកស្ទះចរាចរណ៍ឡើយ ។
ឯលោក ហូរ វ៉ាន់ បានឲ្យដឹងដែរថា ថ្ងៃទី២៣ ខែតុលា គឺជាថ្ងៃបុណ្យដែលមានការកំណត់ជាផ្លូវការរបស់រាជរដ្ឋាភិបាល ហើយគណបក្សសង្គ្រោះជាតិមានបំណងអបអរសាទរកិច្ចព្រមព្រៀងសន្តិភាពទីក្រុងប៉ារីស ដោយគ្មានប្រែក្លាយពិធីនេះទៅជាការហែក្បួន ឬធ្វើបាតុកម្មអ្វីមួយឡើយ ។ ពិធីនឹងធ្វើឡើងដោយអហិង្សា ស្ងៀមស្ងាត់ និងគ្រាន់តែមានជាសេចក្តីថ្លែងការណ៍តាមក្រុមប៉ុណ្ណោះ ហើយចំនួនអ្នកចូលរួមមិនអាចកំណត់ជាក់លាក់បានឡើយ ព្រោះពុំមែនជាការចាត់តាំងរៀបចំពិធី គឺជាការអំពាវនាវជាសាធារណៈ តែមិនក្រោម ៧.០០០នាក់ឡើយ ។
លោក មាន ចាន់យ៉ាដា នាយករដ្ឋបាលសាលារាជធានីភ្នំពេញ បានលើកឡើងថា នៅថ្ងៃទី២៣ ខេតុលានោះ មានអង្គការសង្គមស៊ីវិល គណបក្សនយោបាយ និងក្រុមដទៃទៀត ប្រើប្រាស់ទៅតាមគោលបំណងរៀងៗខ្លួន ។ ជាក់ស្តែង មានសមាគមជ័យលាភីបញ្ញាជនកម្ពុជា បានស្នើសុំដាក់ញត្តិតាមស្ថាប័នមួយចំនួន ប៉ុន្តែរដ្ឋបាលរាជធានីភ្នំពេញមិនអនុញ្ញាតជូនឡើយ ព្រោះប៉ះពាល់ដល់សណ្តាប់ធ្នាប់សាធារណៈ ក្នុងនោះក៏មានគណបក្សសង្គ្រោះជាតិប្រារព្ធពិធីផងដែរ ។
លោក ឃួង ស្រេង អភិបាលរងរាជធានីភ្នំពេញ បានលើកឡើងថា ដោយចំនួនអ្នកចូលរួមមានរហូតដល់ច្រើនពាន់នាក់ ហួសពីលទ្ធភាពសម្រេចរបស់រដ្ឋបាលរាជធានីភ្នំពេញ ដូច្នេះនឹងត្រូវសុំគោលការណ៍ពីក្រសួងមហាផ្ទៃ ៕
ចែករំលែកព័តមាននេះ