ខេត្តសៀមរាប ៖ បុរសចិត្តខ្លាំងអាយុ៣២ឆ្នាំម្នាក់ បានសម្រេចចិត្តធ្វើអត្តឃាត នៅលើផ្ទះតែម្តង បង្កឱ្យមានការភ្ញាក់ផ្អើលដល់ប្រជាពលរដ្ឋនៅជិតខាង ខណៈដែលបានប្រទះឃើញប្តីចងកសម្លាប់ខ្លួន រួចរត់ទៅរាយការណ៍ដល់សមត្ថកិច្ចមូលដ្ឋាន ដើម្បីឱ្យជួយអន្តរាគមន៍។ ហេតុការសម្លាប់បង្កការភ្ញាក់ផ្អើលមួយបានកើតឡើងកាលពីវេលាម៉ោង១៩និង៣០នាទីយប់ ថ្ងៃទី២០ ខែតុលា ឆ្នាំ២០១៦ ស្ថិតនៅភូមិថ្នល់ សង្កាត់ស្រងែ ក្រុង-ខេត្តសៀមរាប។
លោកអនុសេនីយ៍ឯក ដា ចំរើន អធិការរងនគរបាលក្រុងសៀមរាបបានឱ្យដឹងថា ក្រោយពីទទួលបានដំណឹងភ្លាម កម្លាំងសមត្ថកិច្ចនគរបាលមូលដ្ឋានបានសហការណ៍ជាមួយកម្លាំងបច្ចេកទេសនគរបាលខេត្ត ចុះទៅដល់កន្លែងកើតហេតុ រួចកាត់ខ្សែទម្លាក់មកដី ដើម្បីពិនិត្យសាកសព និងដោយផ្អែកទៅតាមសម្តីរបស់ភរិយាសព ដែលបានប្រាប់សមត្ថកិច្ចថា ប្តីគាត់បានផឹកស្រាស្រវឹង ហើយឈ្លោះប្រកែកជាមួយគាត់ ក៏បានដើរចេញពីផ្ទះមិនដឹងទៅណា រួចបានសន្និដ្ឋានថា ជនរងគ្រោះពិតជាបានចងកធ្វើអត្តឃាតមែន។
លោកបានបន្តថា ជនរងគ្រោះមានឈ្មោះ ស្តើង ម៉ៅ ភេទប្រុស អាយុ៣២ឆ្នាំ មានមុខរបរជាកសិករ រស់នៅភូមិកើតហេតុខាងលើ។ បើតាមសម្តីរបស់ប្រពន្ធជនរងគ្រោះបានរៀបរាប់ប្រាប់សមត្ថកិច្ចថា ប្តីគាត់បានផឹកស្រាស្រវឹង ហើយឈ្លោះប្រកែកជាមួយគាត់ ហើយបានដើរចេញពីផ្ទះមិនដឹងទៅណា ដោយបាត់ប្តី២ទៅ៣ថ្ងៃមិនឃើញមកផ្ទះ ប្រពន្ធបានដើររកតែរកមិនឃើញ។ អ្នកស្រីបានរៀបរាប់បន្តថា លុះដល់ថ្ងៃកើតហេតុ ប្រពន្ធបានដើរទៅផ្ទះមួយទៀតសម្រាប់ដាក់ស្រូវ ក៏ប្រទះឃើញប្តី ចងកសម្លាប់ខ្លួនស្លាប់បាត់ទទៅហើយ ហើយបានរាយការណ៍ជូនសមត្ថកិច្ច។
លោកអធិការរងបានបញ្ជាក់បន្ថែមថា សាកសពជនរងគ្រោះមានសភាពហើមរបកស្បែក និងមានក្លិនស្អុយ សពអាចស្លាប់ប្រហែលជា២ទៅ៣ថ្ងៃហើយ ដោយគ្មានអ្នកណាដឹង។ បច្ចុប្បន្ន សពជនរងគ្រោះ ត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ