ខេត្តកំពត ៖ រឿងដែលគួរឲ្យហួសចិត្តពីស្ត្រីចំណាស់រកស៊ីឈើជជុះម្នាក់នៅក្នុងខេត្តកំពត បើតាមប្រភព ព័ត៌មានពីប្រជាពលរដ្ឋនៅក្នុងស្រុកភូមិរបស់ស្ត្រីចំណាស់រូបនេះបានឲ្យដឹងថា ស្ត្រីចំណាស់ដែលរកស៊ីដឹកឈើ ឬដឹកអុសលក់ចេញមកពីក្រុងព្រះសីហនុឆ្លងកាត់ខេត្តកំពតទៅកាន់ស្រុកបន្ទាយមាស ដែលគេឃើញរាល់ថ្ងៃនេះមានឈ្មោះគេនិយមហៅថា យាយឆ្នាំង ពីព្រោះកាលណាគាត់ចេញទៅទិញអុសបាច់ ឬ ទៅទិញឈើជជុះមកលក់តាមស្រុក ទោះបីទៅដេកផ្លូវក្តីមិនដេកផ្លូវក្តីគាត់តែងតែដាក់ឆ្នាំងដាក់ចានទៅ តាមរថយន្តរបស់គាត់ជាប់ជានិច្ច មិនដែលចូលហូបបាយហាងនឹងគេ ដូចឈ្មួញរកស៊ីឈើខុសច្បាប់ធំៗ នោះទេ។
ប្រភពដដែលឲ្យដឹងទៀតថា យាយឆ្នាំងនេះខ្ចីលុយធនាគារធ្វើដើមទុនតាំងពីរថយន្តនៅមើល បានឥឡូវរថយន្តចាស់ទ្រុឌទ្រោមមើលលែងយល់ ហើយក៏នៅជំពាក់បំណុលធនាគារមីក្រូហិរញ្ញវត្ថុយ៉ាងច្រើនដដែល។ ហើយការរកស៊ីរបស់គាត់រាល់ថ្ងៃ បើតាមអ្នកស្រុកដឹងពីក្រុមគ្រួសារគាត់ប្រាប់គេថា ទោះបីរកស៊ីមួយថ្ងៃរស់មួយថ្ងៃស្ទើរមិនចង់បានរស់ប៉ុណ្ណឹងហើយ នៅតែមានក្រុមកុងត្រូលជជុះជាច្រើនកន្លែងធ្វើការគាបសង្កត់ជំរិតទារប្រាក់ពីគាត់ តាំងពីចេញដំណើររហូតដល់គោលដៅអស់ចំនួនពី ៣៥ម៉ឺនរៀលទៅ៤០ម៉ឺនរៀល។ ហើយពេលនេះមិនដឹងជាមានបញ្ហាអ្វីបានជាត្រូវសមត្ថកិច្ចចាប់រថយន្តគាត់ទេ។
ជុំវិញករណីឃាត់រថយន្តដឹកឈើយាយឆ្នាំងនេះ ត្រូវបានលោក ជួន សារ៉ា នាយរងខណ្ឌរដ្ឋបាលព្រៃឈើកំពតបានឲ្យដឹងថា កន្លងមកលោកក៏ដឹងពីជីវភាពរស់នៅរបស់គាត់ដែរ ហើយលោកក៏ធ្លាប់បានឲ្យមន្ត្រីក្រោមឱវាទអប់រំឲ្យឈប់រកស៊ីឈើខុសច្បាប់ដែរ ឲ្យប្តូរមុខរបររកស៊ីទៅ តាំងពីនោះមកលោកក៏ពុំដែលមានព័ត៌មានអ្វីជុំវិញករណីអ្នករកស៊ីឈើខុសច្បាប់នោះរាយការណ៍មកដែរ។ ហើយថ្ងៃដែលកម្លាំងសមត្ថកិច្ចឃាត់រថយន្តនោះគឺ ដោយសារមានអ្នកព័ត៌មានរាយការណ៍ឲ្យថា មានរថយន្តដឹកឈើខុសច្បាប់ជាច្រើនទើបលោកបានទទួលព័ត៌មាននេះហើយ ក៏សុំយោបល់ព្រះរាជអាជ្ញា ព្រះរាជអាជ្ញាក៏ឯកភាពឲ្យឃាត់រថយន្តនេះតែម្តងទៅ។
លោក ជួន សារ៉ា បានឲ្យដឹងទៀតថា នៅពេលកម្លាំងជំនាញរដ្ឋបាលព្រៃឈើឃាត់រថយន្តនាំមកកាន់ខណ្ឌរដ្ឋបាលព្រៃឈើកំពត លោកបានឃើញយាយឆ្នាំង ម្ចាស់ឈើ និងជាម្ចាស់រថយន្ត យំអង្វរយ៉ាងខ្លាំង ដោយសម្ដែងពីការលំបាកក្នុងជីវភាព ពេលនោះលោកក៏បានសុំយោបល់ទៅព្រះរាជអាជ្ញា ហើយព្រះរាជអាជ្ញាក៏ឲ្យយាយឆ្នាំងទៅបញ្ជាក់លិខិតពីអាជ្ញាធរភូមិឃុំ បញ្ជាក់ពីភាពក្រីក្រច្បាស់លាស់លោក និងអនុញ្ញាតឲ្យយករថយន្តចេញទៅប្រកបមុខរបរថ្មី ឈប់ឲ្យរកស៊ីមុខរបរដែលខុសច្បាប់តទៅទៀត៕
ចែករំលែកព័តមាននេះ