លើសហើយអាក្អូន ! ដុល្លារនឹងគេមិនចាយទេ
ខេត្តក្រចេះ ៖ បុរសម្នាក់បានយកប្រាក់ដុល្លារទៅទិញឈើពីដេប៉ូឈើមួយកន្លែងយកទៅលក់បន្តបានប្រាក់ចំណេញ២០ម៉ឺនរៀល ក៏ត្រូវសមត្ថកិច្ចចាប់ខ្លួន …
ខេត្តក្រចេះ ៖ បុរសម្នាក់បានយកប្រាក់ដុល្លារទៅទិញឈើពីដេប៉ូឈើមួយកន្លែងយកទៅលក់បន្តបានប្រាក់ចំណេញ២០ម៉ឺនរៀល ក៏ត្រូវសមត្ថកិច្ចចាប់ខ្លួនកាលពីថ្ងៃទី២០ ខែតុលា ឆ្នាំ២០១៦ នៅភូមិត្រពាំងស្រែ ឃុំ២ធ្នូ ស្រុកស្នួល ព្រោះតែដុល្លារដែលយកទៅទិញឈើគេនោះគឺជាដុល្លារខ្មោច (ដុល្លារសម្រាប់សែន)។
ក្រដាស់លុយដុល្លារក្លែងក្លាយចំនួន៣០សន្លឹកដែលនគរបាលបានកំណត់ថា ជាលុយក្លែងក្លាយ(លុយសែន) មានប្រភេទក្រដាស់១០ដុល្លារ និងក្រដាស់៥ដុល្លារ សរុបទាំងអស់ចំនួន២១៥ដុល្លារ ត្រូវបានបុរសម្នាក់មានចេតនាយកទៅទិញឈើពីជនរងគ្រោះម្នាក់នៅភូមិត្រពាំងស្រែ ឃុំ២ធ្នូ ស្រុកស្នួល កាលពីថ្ងៃទី២០ ខែតុលា ឆ្នាំ២០១៦ ។
ជនសង្ស័យដែលរងការចោទថា បានធ្វើចរាចរលុយដុល្លារក្លែងក្លាយនេះឈ្មោះ ផល ចិន្តា អាយុ២២ឆ្នាំ រស់នៅស្រុកស្នួល ត្រូវបាននគរបាលស្រុកស្នួលឃាត់ខ្លួន និងបញ្ជូនទៅស្នងការដ្ឋាននគរបាលខេត្តដើម្បីចាត់ការបន្តនៅថ្ងៃទី២១ ខែតុលា ក្រោយការឃាត់ខ្លួនសួរនាំបាន១ថ្ងៃ ។
បើតាមការឆ្លើយបស់ជនសង្ស័យបានប្រាប់នគរបាលថា លុយទាំងនេះជាលុយក្លែងក្លាយ(លុយសែន)ដែលរូបគេបានទិញពីផ្សារតម្លៃ៧ពាន់រៀល និងបានយកទៅបន្លំទិញឈើពីជនរងគ្រោះម្នាក់នៅចំណុចខាងលើ ។
ជនសង្ស័យបានប្រាប់ឲ្យដឹងទៀត ថា ក្រោយពីរូបគេបានយកលុយក្លែងក្លាយនោះទៅទិញឈើ ហើយបានដឹកឈើនោះទៅលក់បានចំណេញលុយជិត២០ម៉ឺនរៀល ក៏ត្រូវនគរបាលស្រុកចាប់ខ្លួនតែម្តង ។ ហើយការធ្វើចរាចរចាយលុយក្លែងក្លាយនេះក៏ជាលើកទី១របស់គេផងដែរ ៕
ចែករំលែកព័តមាននេះ