រាជធានីភ្នំពេញ ៖ នៅលើសង្វៀនទូរទស្សន៍ស៊ីធីអិននាល្ងាចថ្ងៃសៅរ៍ ទី២២ តុលា ការប្រកួតប្រដាល់មិត្តភាពអន្តរជាតិរវាងកីឡាករកម្ពុជា-ថៃមានចំនួន២គូគឺអាំង សំអាត មកពីក្លិបតាព្រហ្មមានជ័យ ប្រកួតជាមួយកីឡាករថៃឈ្មោះVigo Sor.Dachai ក្នុងប្រភេទទម្ងន់៥៤គីឡូក្រាម និងថុល មករា មកពីក្លិបឃ្លាំងមឿងកីឡាខេត្តពោធិ៍សាត់ ប្រកួតជាមួយកីឡាករថៃឈ្មោះPanthorng Sit.Jaka ក្នុងប្រភេទទម្ងន់៦៣,៥គីឡូក្រាម ។
សម្រាប់ការប្រកួតលើកនេះអាំង សំអាត មានជំនឿចិត្តយ៉ាងខ្លាំងក្នុងការយកឈ្នះលើគូប្រកួត ព្រោះបើប្រៀបធៀបទៅលើប្រវត្តិប្រកួតរវាងកីឡាករទាំង២ឃើញថា អាំង សំអាត មានបទពិសោធន៍ប្រកួតច្រើនជាងគឺមានរហូតដល់ទៅ៩១ដង ឈ្នះ៦៩ដង ចាញ់១៧ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១១ដង។ ចំណែកកីឡាករថៃវិញធ្លាប់ប្រកួតបាន៥២ដង ឈ្នះ៤៣ដង ចាញ់៩ដង និងផ្ដួលគូប្រកួតឱ្យសន្លប់បាន៦ដង ។ យោងតាមប្រវត្ដិនិងភាពប៉ិនប្រសប់ក្នុងការប្រើស្នៀតកែង និងជង្គង់ទៀតផងនោះ អាំង សំអាត សង្ឃឹមឈ្នះច្រើន ។
ចំណែកថុល មករា ទោះបីជាគេមានប្រវត្តិប្រកួតតិចជាងកីឡាករថៃក្ដី ក៏អ្នកគាំទ្រនៅតែមានជំនឿចិត្ដលើកីឡាកររូបនេះដែរព្រោះគេជាអ្នកប្រដាល់មួយរូបដែលមានចិត្តសឿងខ្លាំងណាស់ ។ ថុល មករា ធ្លាប់ប្រកួត៥៥ដង ឈ្នះ៣៧ដង ចាញ់១៧ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន១៤ដង ។ រីឯកីឡាករថៃវិញធ្លាប់ប្រកួតបាន៨២ដង ឈ្នះ៦០ដង ចាញ់២០ដង ស្មើ២ដង និងផ្ដួលគូប្រកួតឱ្យសន្លប់បាន១០ដង ។
ក្រៅពីគូអន្តរជាតិនៅលើសង្វៀនដដែលក៏មានគូមិត្តភាពរវាងកីឡាករកម្ពុជា និងកម្ពុជាផងដែរដូចជាកីឡាករទេស សុខហេង មកពីក្លិបកងពលតូចលេខ៧០ ប្រកួតជាមួយកីឡាករខាំ រស្មី មកពីក្លិបរ៉ាហាប់ស្វាយប៉ាក ។ កីឡាកររស់ វិបុល មកពីក្លិបសាលវ័ន្តកីឡា ប្រកួតជាមួយកីឡាករសេក មករា មកពីក្លិបអង្គរមានជ័យខេត្តសៀមរាប និងគូចុងក្រោយកីឡាករប្រាក់ ស៊ីណាត មកពីក្លិបតាឯកមានរិទ្ធ ប្រកួតជាមួយកីឡាករសៅ ប៊ុនធឿន មកពីក្លិបតាព្រហ្មមានជ័យ ។
ដោយឡែកសមាសភាពគូដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាមនៅលើសង្វៀនទូរទស្សន៍ស៊ីអិនស៊ី នាយប់ថ្ងៃសៅរ៍ទី២២ តុលានេះមានដូចជាកីឡាករ ឃុន សំខាន់ មកពីក្លិបកងពលតូចលេខ៧០ ប្រកួតជាមួយកីឡាករថៃឈ្មោះManavthorng Netnamchai ។ គេនៅចាំបានថា សម្រាប់ការប្រកួតនៅក្នុងជុំទី១ ឃុន សំខាន់ បានផ្ដួលកីឡាករថៃឈ្មោះKongmethy SitPumpeun ឱ្យសន្លប់នៅមុនស្នូរជួងបញ្ចប់ទឹកទី៥ ។ សម្រាប់ការប្រកួតលើកនេះគេមានជំនឿចិត្តច្រើនថានឹងរកបាន៣ពិន្ទុបន្ថែម។ ឃុន សំខាន់ ធ្លាប់ប្រកួតបាន៨២ដង ឈ្នះ៦១ដង ចាញ់១៨ដង ស្មើ៣ដង និងផ្ដួលគូប្រកួតឱ្យសន្លប់បាន១៣ដង ។
មួយគូទៀតកីឡាករ ផង់ សុភាព មកពីក្លិបតាឡីដំរីមានរិទ្ធ ដែលមាន៣ពិន្ទុនឹងជួបប្រកួតជាមួយកីឡាករថៃឈ្មោះKongmethy Sit Pumpeun ដែលធ្លាប់ប្រកួតបានរហូតដល់១០២ដង ឈ្នះ៨០ដង ចាញ់១៩ដង ស្មើ៣ដង និងផ្ដួលគូប្រកួតឱ្យសន្លប់បាន១០ដង ។ ចំណែកផង់ សុភាព វិញធ្លាប់ប្រកួតបាន៧៦ដង ឈ្នះ៦១ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន១៣ដង ។
សម្រាប់គូប្រកួតមិត្តភាពវិញមានកីឡាករភិន សុទី មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយកីឡាករចាន់ សច្ចា មកពីក្លិបតាព្រហ្មមានជ័យ និងកីឡាករសុខ ចិន្ដា មកពីក្លិបឃ្លាំងមឿងកីឡា ប្រកួតជាមួយកីឡាករផៃ គឹមហឿត មកពីក្លិបគីសែមានរិទ្ធ ។
នៅថ្ងៃអាទិត្យ ទី២៣ តុលា ក៏មានការប្រកួតប្រដាល់លក្ខណៈអន្ដរជាតិផងដែរ ។ គូអន្ដរជាតិមានកីឡាករឡុង ជិន មកពីក្លិបខ្លារខិនមានរិទ្ធ ប្រកួតជាមួយកីឡាករថៃឈ្មោះPhitkangvan Sor Samnik ក្នុងប្រភេទទម្ងន់៥៧គីឡូក្រាម និងកីឡាករគង់ សំបូរ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃឈ្មោះDenlampao Sor Phungsit ក្នុងប្រភេទទម្ងន់៦០គីឡូក្រាម ។ ចំណែកគូប្រកួតមិត្តភាពរវាងកីឡាករកម្ពុជា និងកម្ពុជាមានដូចខាងក្រោម ។ កីឡាករ សឹង្ហ រាជសីហ៍ មកពីក្លិបកុលបុត្រគុនខ្មែរ ប្រកួតជាមួយកីឡាករ ស៊ិន សុវណ្ណដេត មកពីក្លិបសាមគ្គីកូនខ្មែរ ។ កីឡាករ សាន ឡាក់ហាយ មកពីក្លិបសុភានូមានជ័យ ប្រកួតជាមួយកីឡាករលីន កុសល មកពីក្លិបបុរីរាជសីហ៍ ។ កីឡាករ នួន ដេវីត មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ពេញ កុសល មកពីក្លិបកុមារទេព និងកីឡាករ ឡុង ចំរើន មកពីក្លិបខ្លារខិនមានរិទ្ធ ប្រកួតជាមួយកីឡាករ ហុង ហ៊ីម មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ