សហរដ្ឋអាមេរិកនឹងស្នើឱ្យមានការពន្យល់មួយរបស់ប្រធានាធិបតីហ្វ៊ីលីពីនលោកRODRIGO DUTERTE ដែលប្រកាសកាលពីថ្ងៃទី២០ តុលា នៅប្រទេសចិនពីការចែកផ្លូវគ្នាជាមួយអាមេរិក ។
បុរសខ្លាំងថ្មីហ្វ៊ីលីពីនថ្លែងបែបនោះពេលមកបំពេញទស្សនកិច្ចនៅក្រុងប៉េកាំងជាមួយបំណងធ្វើសម្ព័ន្ធភាពពាណិជ្ជកម្មថ្មីមួយជាមួយចិន ។ ក្រសួងការបរទេសអាមេរិកចាត់ទុកសេចក្តីថ្លែងការណ៍នោះថាគួរឱ្យងឿងឆ្ងល់ហើយផ្ទុយទៅនឹងទំនាក់ទំនងជិតស្និទ្ធដែលមានចាប់តាំងពីច្រើនទសវត្សមកហើយរវាងហ្វ៊ីលីពីននិងសហរដ្ឋអាមេរិក ។
លោកJOHN KIRBY អ្នកនាំពាក្យក្រសួងការបរទេសអាមេរិកថ្លែងថា យើងនឹងស្វែងរកឱ្យទទួលបានការពន្យល់មួយលើអ្វីដែលប្រធានាធិបតីហ្វ៊ីលីពីនចង់និយាយតាមរយៈការលើកឡើងពីការចែកផ្លូវគ្នាជាមួយសហរដ្ឋអាមេរិក ។
តាំងពីឡើងកាន់អំណាចមកលោកRODRIGO DUTERTE តែងរិះគន់ចំពោះសហរដ្ឋអាមេរិក ដែលថ្កោលទោសយ៉ាងខ្លាំងដល់យុទ្ធនាការប្រឆាំងគ្រឿងញៀនរបស់លោក ហើយនិយាយពីការគ្រោងកាត់ផ្តាច់ទំនាក់ទំនងជាមួយអតីតមហាអំណាចអាណានិគមនោះ ។
ហ្វ៊ីលីពីនជាប្រទេសទទួលបានជំនួយយោធាអាមេរិកច្រើនទី៣នៅអាស៊ី បន្ទាប់ពីអាហ្វហ្គានីស្ថាននិងប៉ាគីស្ថានរួចជាដៃគូសំខាន់សម្រាប់ក្រុងវ៉ាស៊ីនតោនក្នុងតំបន់ ។
ពេលបំពេញទស្សនកិច្ចរបស់ប្រធានាធិបតីហ្វ៊ីលីពីននៅក្រុងប៉េកាំងប្រធានាធិបតីចិនលោកស៊ីជីនពីង អំពាវនាវឱ្យកែលម្អទំនាក់ទំនងរវាងក្រុងប៉េកាំងនិងក្រុងម៉ានីលទោះបីជាមានទំនាស់ដែនដីនៅសមុទ្រចិនខាងត្បូងក៏ដោយ។ នៅក្រុងប៉េកាំងលោកDUTERTE ប្រកាសថា «ខ្ញុំសូមប្រកាសពីការចែកផ្លូវគ្នាជាមួយសហរដ្ឋអាមេរិក»។ ការប្រកាសគួរឱ្យភ្ញាក់ផ្អើលនោះបង្ហាញពីការងាករបស់លោកទៅរកចិនវិញ ។ នាថ្ងៃទី២០ តុលា ពេលជួបពិភាក្សាគ្នាប្រធានាធិបតីចិនលោកស៊ីជីនពីង និងសមភាគីហ្វ៊ីលីពីនបានព្រមព្រៀងគ្នាដោះស្រាយដោយសមស្របបណ្តាទំនាស់ដើម្បីឱ្យសម្រេចបានការកែលម្អទាំងស្រុង និងការពង្រីកកាន់តែខ្លាំងទំនាក់ទំនងទ្វេភាគី ។ ដោយចាត់ទុកប្រទេសទាំង២ជាអ្នកជិតខាងបែងចែកគ្នាដោយសមុទ្រលោកស៊ីគូសបញ្ជាក់ថា ទោះបីមានរឿងល្អអាក្រក់កើតមានក្តីក៏មូលដ្ឋាននៃមិត្តភាពចិន-ហ្វ៊ីលីពីននិងឆន្ទៈរួមសហការគ្នាពុំមានការផ្លាស់ប្តូរឡើយ ។
ប្រធានាធិបតីចិនគូសបញ្ជាក់ថា ចិនវាយតម្លៃខ្ពស់ដល់ទំនាក់ទំនងជាមួយហ្វ៊ីលីពីន ហើយត្រៀមធ្វើការជាមួយប្រទេសនោះដើម្បីផ្សារភ្ជាប់ការជឿទុកចិត្តគ្នាខាងនយោបាយ និងកិច្ចសហប្រតិបត្តិការឈ្នះ-ឈ្នះ ដោះស្រាយដោយសមស្របបណ្តាទំនាស់ហើយប្រែក្លាយទៅជាដៃគូល្អ ។ យោងតាមលោកស៊ីថា ការដោះស្រាយទំនាស់នៅសមុទ្រចិនខាងត្បូងតាមរយៈការចរចាគឺជាមូលដ្ឋានសំខាន់សម្រាប់ការពង្រីក ដោយល្អប្រសើរ និងស្ថិតស្ថេរទំនាក់ទំនងចិន-ហ្វ៊ីលីពីន ។ ចិនគាំទ្រការខិតខំប្រឹងប្រែងរបស់រដ្ឋាភិបាលហ្វ៊ីលីពីនក្នុងការតស៊ូប្រឆាំងគ្រឿងញៀន ភេរវកម្ម និងឧក្រិដ្ឋកម្ម ហើយប៉ុនប៉ងសហការជាមួយហ្វ៊ីលីពីនលើវិស័យទាំងនោះ ៕
ចែករំលែកព័តមាននេះ