ខេត្តព្រៃវែង ៖ ក្រុមឈ្មួញលួចនាំសត្វជ្រូករស់ពីប្រទេសយួន ឆ្លងដែនដោយខុសច្បាប់ចូលមកប្រទេសខ្មែរទាំងថ្ងៃ ទាំងយប់ ប្រមាណ៤០០ក្បាលទៅ៥០០ក្បាល នៅត្រង់ចំណុចច្រកទ្វារព្រំដែនស្វាយអាង៉ោង ស្ថិតនៅភូមិចាម ឃុំចាម ស្រុកកំពង់ត្របែក ខេត្តព្រៃវែង។
ទាក់ទិនករណីនេះ សមត្ថកិច្ចនគរបាលវរការពារព្រំដែនប៉ុស្តិ៍ច្រកទ្វារព្រំដែនស្វាយអាង៉ោង បានទទួលស្គាល់ថា ពិតជាមានករណីឈ្មួញលួចនាំជ្រូកពីប្រទេសវៀតណាមចូលមកពិតប្រាកដមែន គឺក្រុមហ៊ុនគេមានអាជ្ញាប័ណ្ណនាំជ្រូករស់ ជ្រូកមេពូជ ចូលក្នុង១ថ្ងៃចំនួន៥០ក្បាលទៅ១០០ក្បាល តាមច្រកទ្វារព្រំដែនស្វាយអាង៉ោងនេះ ក៏ប៉ុន្តែក្រុមឈ្មួញបានលួចនាំចូលផ្សេងទៀត នៅចំណុចពាមទា រាប់រយក្បាលដែរ លោកគ្រប់គ្រងមិនបានទេ នៅឆ្ងាយពីប៉ុស្តិ៍ ពិបាកបង្ក្រាប ដោយសារភូមិសាស្ត្រព្រំដែន គៀកភូមិអ្នកស្រុក និងឈ្មួញអាចគេចពីសមត្ថកិច្ចយ៉ាងងាយស្រួល។
បើតាមសមត្ថកិច្ចម្នាក់ សុំមិនបញ្ចេញឈ្មោះបានបង្ហើបឲ្យដឹងថា នៅវេលាម៉ោង៨និង០០នាទីយប់ ថ្ងៃទី៨ ខែឧសភា ឆ្នាំ២០២២ មានឈ្មួញវៀតណាមដឹកសត្វជ្រូករស់ប្រមាណ៥០ក្បាលមកឆ្លងព្រំដែន តាមស្ពានប៉ុស្តិ៍ច្រកទ្វារព្រំដែនស្វាយអាង៉ោង និងជិត៣០០ក្បាលទៀត ដឹកតាមសាឡង់ ដោយទទឹងព្រែកតូច ប្រវែង៣០ម៉ែត្រដល់ដីខ្មែរ រួចចាប់លើកជ្រូកដាក់ម៉ូតូរ៉ឺម៉ក និងរថយន្តសាំយ៉ុង រួចបើកចូលតាមផ្លូវស្លាបប៉ុស្តិ៍ច្រកទ្វារព្រំដែនស្វាយអាង៉ោង ផ្លូវត្រង់ និងខ្លះវាង តាមស្លាបស្តាំ និងស្លាបឆ្វេង (គឺដឹកមួយយប់ទល់ម៉ោង៣ទៀបភ្លឺ) មានរាប់រយក្បាល បន្ទាប់មកដឹកឆ្ពោះទៅផ្សារកអណ្តើក ផ្ទេរសត្វជ្រូករស់ទាំងនោះ ដាក់រថយន្តធុនធំដឹកទៅរាជធានីភ្នំពេញ ចំណែកខាងវៀតណាម គឺនៅខេត្តឡុងអាង។
ប្រភពដដែលបន្តថា នៅពេលមានបទល្មើសកើតឡើង សមត្ថកិច្ចនគរបាលវរការពារព្រំដែនប៉ុស្តិ៍ច្រកទ្វារព្រំដែនស្វាយអាង៉ោង មិនបានធ្វើការបង្ក្រាបនោះទេ ទំនងជាត្រូវថ្នាំសណ្តំហើយមើលទៅ។ ហើយចំពោះអ្នករកស៊ីនាំជ្រូករស់ពីប្រទេសវៀតណាមឆ្លងដែនចូលមកចំណុចប៉ុស្តិ៍ច្រកទ្វារស្វាយអាង៉ោង និងស្លាបទាំងពីរនៃប៉ុស្តិ៍ស្វាយអាង៉ោង ភូមិចាម ឃុំចាមនេះ មានច្រើននាក់ ខ្លះគេនាំយកឲ្យក្រុមហ៊ុន ដឹកទៅរាជធានីភ្នំពេញ។
បើតាមមន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្មខេត្តព្រៃវែង បានឲ្យដឹងថា បញ្ហាក្រុមហ៊ុន ដែលមានអាជ្ញាប័ណ្ណនាំជ្រូករស់ពីប្រទេសវៀតណាមចូលមកខ្មែរនោះ គឺច្បាប់សុំនាំជ្រូកមេពូជ មកផ្គត់ផ្គង់ដល់កសិករចិញ្ចឹម ដោយក្នុង១ថ្ងៃចំនួន៥០ក្បាល ក៏ប៉ុន្តែឈ្មួញបន្លំដឹកជ្រូកសាច់ អត់មានជ្រូកមេទេ សុទ្ធតែភូតកុហក។
មន្ត្រីពេទ្យសត្វច្រកទ្វារតំបន់នោះ និយាយថា មេនៅខាងលើបានហាមមិនឱ្យចាប់ទេ ព្រោះមេប្រាប់ថាគេមានច្បាប់ ម្ល៉ោះហើយគេនាំចូលប៉ុន្មាននាំទៅ គ្រាន់តែដឹងថា ទាំងយប់ ទាំងថ្ងៃប្រមាណ៥០០ក្បាល នាំឱ្យទៅក្រុមហ៊ុនមួយនៅបឹងក្រពើ លើនៅភ្នំពេញ គេមិនប្រាប់ឈ្មោះទេ ។ គេថា គេមិនហ៊ាននិយាយទេ រឿងឈ្មោះស្រេចតែអ្នកកាសែតសួរខ្លួនឯងទៅ ។
រហូតមកដល់ថ្ងៃនេះ អត់មានច្បាប់ឱ្យនាំជ្រូករស់ពីប្រទេសជិតខាងទេ ព្រោះការដេញថ្លៃនាំជ្រូកអត់ទាន់មាន ។ ម្ល៉ោះហើយ ក្រុមហ៊ុនណា ទាក់ទងត្រូវជាមួយមេពេទ្យសត្វធំ នៅក្រសួងកសិកម្ម អាចនាំចូលបាន ព្រោះគាត់ស្រួលទាក់ទងណាស់ឱ្យតែនិយាយត្រូវគ្នា ។ ចំណែកគយនៅតំបន់នោះ ក៏អត់ចាប់ដែរ គេត្រូវគ្នាអស់ហើយ ។
តើឈ្មោះក្រុមហ៊ុនណាដែលថ្លើមធំហ៊ាននាំចូល? យើងនឹងផ្សាយជូន ក្រោយពេលទទួលបានព័ត៌មានថ្មីទៀត។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ