កាលពីថ្ងៃទី១៩ តុលា ក្រុមហ៊ុនបណ្តាញសង្គមហ្វេសប៊ុកបានបង្ហើបឲ្យដឹងថា អ្នកប្រើប្រាស់ទាំងអស់នៅសហរដ្ឋអាមេរិក អាចកុម្មង់អាហារតាមរយៈទំព័រ (Page) របស់ភោជនីយដ្ឋាននីមួយៗបាន ដែលមុខងារនេះនឹងត្រូវដាក់ឲ្យប្រើប្រាស់ចាប់ពីថ្ងៃពុធសប្តាហ៍នេះតទៅ ។ ការធ្វើដូច្នេះ ត្រូវបានចាត់ទុកជាការតភ្ជាប់អ្នកប្រើប្រាស់ឲ្យមានទំនាក់ទំនងជាមួយនឹងមុខជំនួញផ្សេងៗ ។
លើសពីនេះទៀត ក្រុមហ៊ុនបានសរសេរនៅក្នុងប្លុកស្ពត (Blogspot) ថា អ្នកប្រើប្រាស់ក៏អាចចូលទៅកុម្មង់អីវ៉ាន់ ទិញសំបុត្រកុន និងកក់កន្លែងផាត់មុខផងដែរ ។
កាលពីដើមខែនេះ ហ្វេសប៊ុកក៏បានដាក់ឲ្យប្រើប្រាស់នូវមុខងារ «Marketplace» ដែលជាមុខងារសម្រាប់អនុញ្ញាតឲ្យអ្នកប្រើប្រាស់ចូលទៅទិញ និងលក់នៅក្នុងតំបន់ ។
ប្រព័ន្ធបណ្តាញសង្គមដែលមានអ្នកប្រើប្រាស់ប្រហែលជា១,៧ពាន់លានមួយនេះ បានប្រាប់កាលពីថ្ងៃពុធអាទិត្យមុនថា ក្រុមហ៊ុននឹងបន្ថែមមុខងារមួយទៀត ដែលហៅថា «recommendations» ។ មុខងារនេះ គឺប្រើសម្រាប់ឲ្យអ្នកប្រើប្រាស់ចែករំលែក និងផ្តល់ជាយោបល់ពីកន្លែងទិញរបស់ញ៉ាំ ។
ជាមួយគ្នានេះដែរ ភាគហ៊ុនរបស់ហ្វេសប៊ុកបានកើនឡើង០,៨% ស្មើនឹង១២៩.៥៨ដុល្លារសហរដ្ឋអាមេរិកទៀតផង ។ រីឯភាគហ៊ុនរបស់ក្រុមហ៊ុន GrubHub ដែលផ្តល់នូវសេវាស្រដៀងនឹងសេវាខាងលើនេះ បានធ្លាក់ចុះ២,៤% ស្មើនឹង៤១,០៧ដុល្លារសហរដ្ឋអាមេរិក ៕
ចែករំលែកព័តមាននេះ