ខេត្តព្រៃវែង ៖ ស្ត្រីវ័យជាង៤០ឆ្នាំម្នាក់ រួមជាមួយកូន និងប្អូន២នាក់ បាននាំគ្នាទៅស្រែកទ្រហោយំទាំងព្រឹកនៅក្នុងតុលាការខេត្តព្រៃវែងដើម្បីទាមទាររកយុត្តិធម៌ឲ្យប្តីរបស់គាត់ដែលត្រូវក្រុមក្មេងទំនើងព្រួតគ្នាចាក់សម្លាប់យ៉ាងសាហាវឃោរឃៅនៅមុខផ្ទះរបស់គាត់ក្នុងភូមិពារាំង ឃុំរាប ស្រុកពារាំង ខេត្តព្រៃវែង កាលពីថ្ងៃទី១៨ ខែមិនា ឆ្នាំ២០១៥ ។
ស្ត្រីខាងលើនេះមានឈ្មោះ អឿន សិត អាយុ៤៥ឆ្នាំ នាងបានរៀបរាប់ប្រាប់ថា ថ្ងៃដែលប្តីរបស់គាត់ត្រូវក្រុមក្មេងទំនើងចាក់ស្លាប់នោះគឺជាថ្ងៃភ្ជាប់ពាក្យកូនស្រីរបស់គាត់ ដោយគ្រួសារគាត់បានរៀបចំកម្មវិធីផឹកស៊ីទទួលខាងដន្លងផង និងអបអរពិធីភ្ជាប់ពាក្យផង ព្រមទាំងមានចាក់ធុងបាស់រាំកំសាន្តផងដែរ ប៉ុន្តែពេលរាំកំសាន្តនោះមានក្រុមក្មេងទំនើងពីខាងក្រៅចូលទៅអុកឡុក ទើបប្តីគាត់ឈ្មោះ ជា ភា អាយុ៤៧ឆ្នាំ ចេញទៅឃាត់ ហើយក៏ត្រូវក្រុមក្មេងទំនើងចាក់ស្លាប់តែម្តង ។
ស្ត្រីដដែលបានបន្តថា ក្រោយពេលចាក់ប្តីគាត់ស្លាប់ភា្លម ក្រុមក្មេងទំនើងបាននាំគ្នារត់បានបាត់អស់ ឯសមត្ថកិច្ចក៏បានទៅដល់កន្លែងកើតហេតុ ធ្វើការស្រាវជ្រាវ និងកំណត់មុខសញ្ញាជនល្មើសបានទាំងអស់ដែរ តែភ្លាមៗចាប់មនុស្សមិនបាន ព្រោះពួកគេរត់ចោលស្រុកអស់ ទើបសមត្ថកិច្ចកសាងសំណុំរឿងបញ្ជូនទៅតុលាការព្រៃវែងចាត់ការបន្ត ហើយតាំងពីពេលនោះរហូតមកដល់បច្ចុប្បន្ននេះជិត២ឆ្នាំហើយ សំណុំរឿងនេះត្រូវតុលាការកប់ទុកចោល មិនចាត់ការអ្វីទាំងអស់ គ្រួសារជនរងគ្រោះក៏មិនហៅសួរ សាក្សីក៏មិនហៅសួរ គឺស្ងាត់ឈឹងដូចចោរលួចសេះតែម្តង ។
បងស្រី អឿន សិត បានបញ្ជាក់ថា ថ្មីៗនេះគាត់ឃើញក្រុមក្មេងទំនើងដែលចាក់សម្លាប់ប្តីររបស់គាត់បាននាំគ្នាចូលស្រុកវិញហើយ ហើយគាត់បានប្តឹងទៅប៉ូលីសប៉ូស្តិ៍រដ្ឋបាលឲ្យចាប់ខ្លួនជនល្មើស តែប៉ូលិសប្រាប់ថា ចាប់មិនបានទេ ព្រោះគ្មានដីកាឲ្យចាប់ខ្លួនពីតុលាការ ធ្វើឲ្យរូបគាត់ និងក្រុមគ្រួសារឈឺចាប់ស្ទើរកកឈាម ទើបសម្រេចចិត្តឡើងមកកាន់តុលាការខេត្តព្រៃវែង ទាមទាររកយុត្តិធម៌ឲ្យប្តីរបស់គាត់កាលពីព្រឹកថ្ងៃទី១៩ ខែតុលា ថ្មីៗនេះ ។
ពាក់ពន្ធ័នឹងករណីខាងលើនេះ លោក ញឹក រ៉ាន្នី អ្នកនាំពាក្យសាលាដំបូងខេត្តព្រៃវែង បានឲ្យដឹងថា សុំណុំរឿងខាងលើគឺចៅក្រម លោក តាក់ គីមសៀ ជាអ្នកស៊ើបសួរ លោកក៏ទទួលស្គាល់ដែរថា សុំណុំរឿងនេះគាំងមែន តែពេលនេះចាត់ការហើយ និងរៀបចំរុញទៅជម្រះហើយ ។ រីឯ លោក តាក់ គីមសៀ មិនអាចសុំការបំភ្លឺបានទេជុំវិញមូលហេតុដែលលោកកប់សំណុំរឿងនេះទុកចោលមិនព្រមចាត់ការនោះ ។
គួរបញ្ជាក់ផងដែរថា ក្រោយពេលគ្រួសារស្ដ្រីខាងលើនាំគ្នាទៅស្រែកយំទាមទាររកយុត្តិធម៌នៅក្នុងតុលាការ ដោយមានទាំងក្រុមអ្នកសារព័ត៌មានជាច្រើននាក់បានទៅសម្ភាស និងសាកសួរព័ត៌មានកាលពីព្រឹកថ្ងៃទី១៩តុលានោះ ស្រាប់តែស្អែកឡើងព្រឹកថ្ងៃទី២០ តុលា លោកឧត្តមសេនីយ័ ស្រេង ជា ស្នងការនគរបាលខេត្ត បានប្រាប់ថា ខាងតុលាការបានបញ្ជូនដីកាចាប់ជនសង្ស័យមកដល់ស្នងការដ្ឋានខេត្តហើយ ប៉ុន្តែដីកានោះមានស្នាមកោសលុបជាច្រើននៅត្រង់លេខដីកា និងថ្ងៃខែ ទើបធ្វើឲ្យគេសង្ស័យថា ដីកានេះធ្វើរួចយូរ ហើយតែមិនចេញ លុះដល់មានរឿង ទើបបញ្ចេញដើម្បីយករួចខ្លួន ៕
ចែករំលែកព័តមាននេះ