រាជធានីភ្នំពេញ ៖ យុវជនទំនើងដែលត្រូវសមត្ថកិច្ចខណ្ឌសែនសុខ ឃាត់ខ្លួន ហើយត្រូវបានសមត្ថកិច្ចចាប់កោរសក់ដើម្បីធ្វើការអប់រំ រួចឱ្យវិលត្រឡប់ទៅផ្ទះវិញចំនួន៦៦នាក់ នៅសល់តែ៥នាក់ទៀតដែលជាអ្នកកាន់ដាវ និងកាំបិត ជំពាមកៅស៊ូ ត្រូវបានកសាងសំណុំរឿងបញ្ជូន ទៅកាន់សាលាដំបូងរាជធានីភ្នំពេញ ចាត់ការតាមច្បាប់ពីបទ «កាន់កា.ប់អាវុធ ដោយគ្មានការអនុញ្ញាតិ»។
ជនសង្ស័យទាំង៥នាក់រូបនោះ ត្រូវបានសមត្ថកិច្ចអោយដឹងថា ១- ឈ្មោះ កៅ សុវណ្ណារិទ្ធ ហៅម៉ី ភេទប្រុស អាយុ១៩ឆ្នាំ ជាកម្មកររោងចក្រ ស្នាក់នៅបន្ទប់ជួល ឃុំបែកចាន ស្រុកអង្គស្នួល ខេត្តកណ្តាល, ២- ឈ្មោះ គឹម កក្កដា ភេទប្រុស អាយុ១៥ឆ្នាំ, ៣- ឈ្មោះ ហៀង លឹមហាក់ ភេទប្រុស អាយុ១៨ឆ្នាំ ៤- ឈ្មោះ ថុង សុគុណ ភេទប្រុស អាយុ១៩ឆ្នាំ ជាកម្មកររោងចក្រ និង៥- ឈ្មោះ ស្រ៊ាង ភក្កី ភេទប្រុស អាយុ១៨ឆ្នាំ ជាកម្មកររោងចក្រ ។ ជនសង្ស័យទាំង៥នាក់នោះ ក្នុងចំណោមបក្សពួកចំនួន៧១នាក់ ដែលត្រូវបានសមត្ថកិច្ចឃាត់ខ្លួន ខណៈពេល ដែលប្រមូលផ្តុំគ្នាត្រៀមប្រើហិ.ង្សាទៅលើគូបដិបក្ស ។
ដោយឡែកចំនួន៦៦នាក់ ត្រូវបានសមត្ថកិច្ចចាប់កោរសក់ ហើយអញ្ជើញឪពុកម្តាយបងប្អូនអោយ មកធានា រួចយកទៅអប់រំជាបណ្តើរតាំងពីវេលាល្ងាចថ្ងៃទី០៨ ខែឧសភា ឆ្នាំ២០២២មកម្ល៉េះ ។
គួរបញ្ជាក់ថា យុវជនទំនើងចំនួន៧១នាក់ខាងលើនេះ ត្រូវបានកម្លាំងនគរបាលខណ្ឌសែនសុខ ឃាត់ខ្លួនកាលពីវេលាម៉ោងប្រមាណ១២និង៤០នាទីរំលងអធាត្រឈានចូលថ្ងៃទី០៨ ខែឧសភា ឆ្នាំ២០២២ នៅចំណុចដីឡូត៍មួយកន្លែង តាមផ្លូវលេខ១៩៦៦ ក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ខណៈពេលដែលណាត់ជួបប្រមូលគ្នាម្តុំប្រដាប់ដោយដាវ កាំបិតប៉័ងតោ ជំពាមកៅស៊ូ ប្រុងប្រើហិ.ង្សាជាមួយគូទំនាស់។ ហើយក្នុងហេតុការណ៍នោះ សមត្ថកិច្ចក៏បានដកហូតម៉ូតូចំនួន២៨គ្រឿង និងដាវ កាំបិត ប៉័ងតោ និងជំពាមកៅស៊ូ ដែលលាក់ទុកក្នុងព្រៃផងដែរ ។
បើតាមនគរបាលខណ្ឌសែនសុខ បានឲ្យដឹងថា នៅវេលាយប់នោះ កម្លាំងសមត្ថកិច្ចនគរបាលខណ្ឌសែនសុខ បានជិះល្បាតនៅក្នុងមូលដ្ឋាន ហើយក៏បានប្រទះឃើញយុវជនស្ទាវក្រុម ជួប ប្រមូលផ្តុំគ្នា បន្ទាប់មកក៏ធ្វើការឡោមព័ទ្ធឃាត់ខ្លួនតែម្តង ។ ចំណែកជនសង្ស័យទាំង៥នាក់នោះ គ្រោងនឹងបញ្ជូនទៅកាន់សាលាដំបូងរាជធានីភ្នំពេញ នៅព្រឹកថ្ងៃទី០៩ ខែឧសភា ឆ្នាំ ២០២២នេះ ៕
ចែករំលែកព័តមាននេះ