រាជធានីភ្នំពេញ ៖ ក្រុមគោព្រៃកម្ពុជា កាន់តែមានសង្ឃឹមច្រើនថា ពិតជាបានឡើងទៅលេង នៅវគ្គចែកពូល បន្ទាប់ពីលត់ក្រុមឪម៉ាល់ព្រុយណេ ៣-០ ក្នុងវគ្គជម្រុះបឋមពានរង្វាន់ AFF Suzuki Cup 2016
រាជធានីភ្នំពេញ ៖ ក្រុមគោព្រៃកម្ពុជា កាន់តែមានសង្ឃឹមច្រើនថា ពិតជាបានឡើងទៅលេង នៅវគ្គចែកពូល បន្ទាប់ពីលត់ក្រុមឪម៉ាល់ព្រុយណេ ៣-០ ក្នុងវគ្គជម្រុះបឋមពានរង្វាន់ AFF Suzuki Cup 2016 នៅលើទីលានពហុកីឡដ្ឋានជាតិអូឡាំពិកកាលពីល្ងាច ថ្ងៃទី១៨ តុលា ស្ថិតក្រោមក្រសែភ្នែកអ្នកគាំទ្ររាប់ម៉ឺននាក់ ។
ក្រុមគោព្រៃកម្ពុជាពេលនេះកំពុងត្រៀមជើង «ធ្វើស៊ី» ក្រុមព្រះអាទិត្យរះទីម័រខាងកើត នៅល្ងាចថ្ងៃទី២១ ខែតុលា ឆ្នាំ២០១៦ ជាបន្តដើម្បីធានាឱកាសមួយរយភាគរយឡើងទៅលេងនៅវគ្គចែកពូល ។ មុនពេលជួបគ្នា ក្រុមគោព្រៃកម្ពុជាបានផ្ដួលក្រុមខ្លាំងឡាវ២-១ និងលត់ក្រុមព្រុយណេ ៣-០ ឈរនៅកំពូលតារាងបណ្ដោះអាសន្នមាន៦ពិន្ទុ ។ ចំណែកក្រុមព្រះអាទិត្យរះទីម័រខាងកើត ចាញ់ក្រុមព្រុយណេ និងក្រុមឡាវ១-២ដូចគ្នា ឈរនៅបាតតារាងដោយគ្មានពិន្ទុ ។
សូមបញ្ជាក់ថា ក្នុងវគ្គជម្រុះបឋមឈានទៅដណ្តើមពានរង្វាន់ AFF Suzuki Cup2016 ចាប់ពីថ្ងៃទី១៥ ដល់ ២១ តុលា នៅពហុកីឡដ្ឋានជាតិអូឡាំពិក នេះមានក្រុមជម្រើសជាតិ៤ចូលរួមប្រកួត គឺក្រុមកម្ពុជា (ម្ចាស់ផ្ទះ) ទីម័រខាងកើត ព្រុយណេ និងឡាវ ។ ក្រុមដែលមានចំណាត់ថ្នាក់ល្អជាងគេនឹងបានឡើងទៅលេងជាមួយក្រុមជម្រើសជាតិ៧ផ្សេងទៀត ក្នុងតំបន់អាស៊ានដែលកំពុងរង់ចាំនៅវគ្គចែកពូល ។ ក្នុងចំណោមក្រុមទាំង៤ ក្រុមកម្ពុជាហាក់មានសង្ឃឹមច្រើនជាងគេ បន្ទាប់ពីផ្ដួលក្រុមឡាវ និងក្រុមព្រុយណេរួចមកហើយនៅសល់មួយប្រកួតចុងក្រោយ ត្រូវជួបក្រុមទីម័រខាងកើតជាក្រុមខ្សោយដែលក្រុមកម្ពុជាត្រូវការលទ្ធផលត្រឹមស្មើប៉ុណ្ណោះនឹងបានឡើងទៅលេងនៅវគ្គចែកពូលជាមួយក្រុមម្ចាស់ផ្ទះមីយ៉ាន់ម៉ា ម៉ាឡេស៊ី និងវៀតណាមដែលស្ថិតនៅក្នុងពូលB ។
ម្យ៉ាងទៀត សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាតាមរយៈទំព័រហ្វេសប៊ុកផ្លូវការរបស់សម្តេច ក្រៅពីផ្ញើសារចូលរួមអបអរសាទរពេលក្រុមគោព្រៃកម្ពុជា ផ្ដួលក្រុមឡាវនៅវគ្គបើកឆាកដំបូង សម្ដេចនៅបានប្រកាសផ្តល់ប្រាក់រង្វាន់ចំនួន៥ម៉ឺនដុល្លារអាមេរិកថែមទៀត ប្រសិនបើក្រុមគោព្រៃកម្ពុជាបន្តយកឈ្នះ២ប្រកួតចុងក្រោយពេលជួបក្រុមព្រុយណេ និងក្រុមទីម័រខាងកើត ។
ដូច្នេះសូមរង់ចាំទស្សនាទាំងអស់គ្នានៅលើសមរភូមិវាលស្មៅនៃពហុកីឡដ្ឋានជាតិអូឡាំពិកវេលាម៉ាង៦ និង៣០នាទីល្ងាចថ្ងៃទី២១ តុលា ខានស្អែកនេះថា តើក្រុមគោព្រៃកម្ពុជាពិតជាអាច«ធើស៊ី» ក្រុមព្រះអាទិត្យរះទីម័រខាងកើតដោយស្រួលដូចការរំពឹងទុកឬយ៉ាងណា ។ យោងតាមប្រវត្តិជួបគ្នាចំនួន៦លើករវាងក្រុមទាំង២បង្ហាញឱ្យឃើញថា ក្រុមគោព្រៃកម្ពុជាឈ្នះ៤ ចាញ់១ និងស្មើ១ ៕
ចែករំលែកព័តមាននេះ