រាជធានីភ្នំពេញ ៖ អាជ្ញាធរបាននិយាយថា គិតរហូតមកដល់វេលាម៉ោង១០ព្រឹកថ្ងៃទី២១ តុលា ២០១៦ កំណាត់ផ្លូវលេខ២១៧ ហៅផ្លូវចំការដូង នៅតែបន្តបិទចរាចរណ៍នៅឡើយ ដោយយានយន្តគ្រប់ប្រភេទត្រូវហាមឃាត់
រាជធានីភ្នំពេញ ៖ អាជ្ញាធរបាននិយាយថា គិតរហូតមកដល់វេលាម៉ោង១០ព្រឹកថ្ងៃទី២១ តុលា ២០១៦ កំណាត់ផ្លូវលេខ២១៧ ហៅផ្លូវចំការដូង នៅតែបន្តបិទចរាចរណ៍នៅឡើយ ដោយយានយន្តគ្រប់ប្រភេទត្រូវហាមឃាត់ មិនឲ្យធ្វើដំណើរឆ្លងកាត់ទៅមកដដែល ដោយសារស្ថានភាពទឹកនៅតែបន្តលិច មិនទាន់ស្រកអស់នៅឡើយ ។
កំណាត់ផ្លូវលេខ២១៧នេះត្រូវទឹកជន់លិច និងហូរកាត់ប្រវែងជាង២ពាន់ម៉ែត្រ និងមានជម្រៅរហូតដល់ទៅ១ម៉ែត្រ គឺចាប់ពីត្រង់ចំណុចខាងត្បូងស្ពានព្រែកជ្រៃ ភូមិស្ពានថ្ម សង្កាត់ស្ពានថ្ម រហូតដល់ចំណុចរង្វង់មូលដីក្រហម ស្ថិតក្នុងភូមិប្រធាតុ សង្កាត់រលួស ខណ្ឌដង្កោ មានរយៈពេល៤ថ្ងៃមកហើយ ដោយគិតចាប់ពីវេលាល្ងាចថ្ងៃទី១៨ តុលា មក ។
យានយន្តគ្រប់ប្រភេទ និងអ្នកដំណើរទាំងឡាយត្រូវណែនាំឱ្យបានបង្វែរទៅតាមផ្លូវវាងមាន២កន្លែង គឺវាងតាមផ្លូវជាតិលេខ២ ទៅកាន់ផ្លូវលេខ២៧១បានដូចគ្នា ដោយត្រូវឆ្លងកាត់តាមមហាវិថីសម្តេចអគ្គមហាសេនាបតីតេជោ ហ៊ុន សែន ឬផ្លូវ៦០ម៉ែត្រ ក្នុងគម្រោងអភិវឌ្ឍន៍បឹងជើងឯក និងទី២វាងតាមផ្លូវជាតិលេខ២ចូលទៅផ្លូវលេខ២៧១ ត្រូវឆ្លងកាត់តាមស្ពានព្រែកថ្លឹង និងទៅដល់ត្រង់ចំណុចផ្លូវបំបែកជាបួនខាងជើង គល់ស្ពានព្រែកជ្រៃបានដូចគ្នា ។
ដោយឡែកកម្ពស់ទឹកជំនន់ស្ទឹងព្រែកត្នោត បានស្រកច្រើនហើយ នៅក្នុងសង្កាត់ផ្នែកខាងលើ ដូចជាសង្កាត់ប្រទះឡាង ,សាក់សំពៅ, ក្រាំងពង្រ និងគងនយ ហើយបន្តលិចនៅសង្កាត់ផ្នែកខាងក្រោមដដែលមានដូចជា សង្កាត់ព្រែកកំពឹស ,ទៀន ,រលួស, ដង្កោ ,ជើងឯក ជាដើម ប៉ុន្តែសង្ឃឹមថា ទឹកនឹងឆាប់ស្រកទៅវិញ ប្រសិនបើគ្មានភ្លៀងធ្លាក់បន្តនៅឯតំបន់ សំខាន់ៗ នៅក្នុងខេត្តកំពង់ស្ពឺទៀតនោះ ។
នៅព្រឹកថ្ងៃទី២០ តុលា សម្តេចវិបុលសេនាភក្តីសាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជាបានអញ្ជើញទៅពិនិត្យដោយផ្ទាល់នៅផ្លូវលំដែលត្រូវទឹកហូរបុក បណ្ដាលឲ្យដាច់ ប្រវែងជាង៤០ម៉ែត្រ នៅក្នុងភូមិសាលា សង្កាត់ទៀន ខណ្ឌដង្កោ ធ្វើឲ្យទឹកស្ទឹងហូរជន់លិចដីស្រែចម្ការ ភូមិឋានប្រជាពលរដ្ឋ និងផ្លូវថ្នល់ជាច្រើនខ្សែ ជាពិសេសកំណាត់ផ្លូវលេខ២១៧ ហៅផ្លូវចំការដូង រហូតមិនអាចធ្វើចរាចរណ៍បានទេ ។ ខណៈចុះពិនិត្យពីស្ថានភាពផ្លូវដាច់នោះ សម្ដេចបានជួបសំណេះសំណាល សាកសួរពីបញ្ហា ផ្សេងៗជាមួយក្រុមអ្នកបច្ចេកទេសរបស់ក្រសួងធនធានទឹក និងឧតុនិយម ព្រមទាំងអាជ្ញាធរមូលដ្ឋាន ដែលប្រចាំការនៅទីនោះ ព្រមទាំងបានឧបត្ថម្ភប្រាក់ចំនួន២លានរៀល ដល់ក្រុមការងារនោះផងដែរ ៕
ចែករំលែកព័តមាននេះ